شارپرێس:
ئەمشەو فڕۆکە جەنگییەکانی تورکیا بۆردوومانی بناری قەندیل لە سنووری پشدەرو دەڤەری برادۆست لە سنووری قەزای سۆران کرد.
بەپێی زانیارییەکانى پەیامنێری شارپرێس ئەمشەو کاتژمێر ١١ ئەمشەو فڕۆکە جەنگییەکانى تورکیا لە یەک کاتدا بۆردومانى گوندەکانی بۆکریسکان و ئێندزێ و لێوژە لە بناری قەندیل و ناوچەکانى برادۆست و چیای بێرمکە لە دۆڵی شاورێیان کردوەو بنکەو بارەگاکانی گەریلاکانى پەکەکەیان کردوەتەوە ئامانج.
لە ماوەی 12 کاژێری رابردوودا لە سنووری بناری قەندیل چوار جار فڕۆکەکانی تورکیا بۆردوومانی بەرزاییەکانی ناوچەکەیان کردووە و ئەو شوێنانەی تورکیا بەئامانجیان دەگرێت دڕەبی، زارگەلی و گەلی بەدرانن.
هەروەها بۆردومانەکەى ئەمشەو بەشێوەیەکى زۆر چڕو فراوان کراوەو تەنانەت نزیک ناحیەى سەنگەسەرو لە دۆڵی رەسو و بەردە قەڵشیوی گرتووەتەوە.
بەهۆى بۆردومانەکەوە ئاگر لە دارستان و پووش و پاوانى ناوچەکە کەوتووەتەوەو ترس و دڵەراوکێشى لای هاوڵاتیان دروستکردوە، بەڵام تا ئێستا نازانرێت زیانەکانى ئەو بۆردومانە چی بوون.
بەوتەى پەیامنێری شارپرێس تا کاتى ئەم هەواڵە فرۆکە جەنگییەکانى تورکیا بەسەر ئاسمانى قەندیل و ناوچەکانى برادۆستەوە دەسوڕێنەوە و لە هەندێ ناوچەش بۆردومان بەردەوامە.
لە 23ی مانگی نیسانی ئەمساڵەوە سوپای توركیا ئۆپراسیۆنێكی نوێی بۆسەر ناوچەكانی ژێر دەسەڵاتی پەكەكە دەستپێكردوە، بەپێی ئامارەكانی رێكخراوی سی پی تی، لەو ئۆپراسیۆنەدا زیاتر لە 10 هەزار دۆنم و ڕەز و باخ و پوش و پاوەنی ئەو ناوچەانەی بۆردومان كراون سوتاوە.
س.هـ