شارپرێس
ئەندامێكی لیژنەی پەروەردە و خوێندنی
باڵا و توێژینەوەی زانستی ڕایدەگەیەنێت، ڕاگرتنی خوێندنی زانكۆكان تەنها لە سنوری
سلێمانیدایە و هۆكارەكەیشی ترسە لە دروستبونی خۆپیشاندانی خوێندكاران.
ئێوارەی ئەمڕۆ زانكۆكانی كۆیە و
ڕاپەڕین و سلێمانی و هەڵەبجە و گەرمیان ڕاگرتنی دەوامی زانكۆكانیان چوار ڕۆژی تر
درێژكردەوە و بەپێی بڕیارەكەیان، لە رۆژی یەک شەممە ٢٠٢١/١١/٢٨ تاوەکو ڕۆژی چوارشەممە ٢٠٢١/١٢/١ ، دەوامی
خوێندکاران لە سەرجەم کۆلێژ و بەشەکانی زانکۆ ڕاگیرا.
لەسەر
هۆكاری ڕاگرتنی دەوامی زانكۆكان، موسلێم عەبدوڵا، جێگری سەرۆكی لیژنەی پەروەردە و
خوێندنی باڵا لە پەرلەمانی كوردستان بە شارپرێسی وت: داخستنی زانكۆ و پەیمانگاكان ترسە
لە دروستبونی خۆپیشاندان و ناڕەزایەتی خوێندكاران، داخستنەكەش هەمووی نیە و ئەوەی
هەیە زاتر تەركیزە لە زانكۆكانی سنوری سلێمانی.
جێگری
سەرۆكی لیژنەی پەروەردە و خوێندنی باڵا وتیشی: داخستنی
زانكۆ و پەیمانگاكان زیانی گەورە بە پرسەی خوێندن دەگەینێت و قەرەبوو ناكرێتەوە،
لەگەڵ ئەوەشدا ناڕەزایی خوێندكاران بەوە دانامركێتەوە و گرفتەكەش چارەسەر نابێت.
ئاماژەی بەوەكرد، پرۆسەی خوێندان خۆی
لە لێواری مەرگدایە و گرفتەكانیش بەزۆری پەیوەندی بە لایەنی مادییەوە هەیە و
وەزارەت دەتوانێت بودجەی خۆی بۆخۆی بەكاربێنێت و چارەسەران بكات.
لەبارەی توانای دارایی حكومەتی
هەرێمەوە بۆ جێبەجێكردنی داواكاری خوێندكاران وتی: بە دڵنیاییەوە دەتوانێت
داواكاری خوێندكاران جێبەجێبكات.
ڕۆژی 20ی ئەم مانگە، خۆپیشاندانی خوێندكارانی زانكۆ و پەیمانگاكانی سنوری پارێزگای
سلێمانی و هەولێر و هەڵەبجە و ئیدارەكانی سۆران و ڕاپەڕین و گەرمیان بۆ
گەڕاندنەوەی دەرماڵەكانیان دەستیپێكرد، بەڵام حكومەتی هەرێم نەچووە ژێر باری
داواكارییەكانیانەوە و خۆپیشاندانەكان بە زەبری هێز كۆتایی پێهێنرا.
س.س