شارپرێس:
ئەندامێکی لیژنەی نەوت
و غاز و سامانە سرووشتییەکان لە پەڕلەمانی عێراق رایگەیاندووە کە هەموارکردنەوەی
یاسای نەوت و غازی هەرێمی کوردستان مەبەست لێی جێبەجێ نەکردن و پابەند نەبوونە بە
بڕیارەکەی دادگای فیدراڵیی بۆ هەڵوەشاندنەوەی یاساکە، جەختیشی کردۆتەوە کە دوای
پێکهێنانی حکومەتی بەغدا، بڕیاری توند لەدژی حکومەتی هەرێمی کوردستان دەردەکرێت.
ئینتیسار جەزائیری
ئەندامی لیژنەی نەوت و غاز و سامانە سرووشتییەکان لەلێدوانێکی رۆژنامەوانیدا
سەبارەت بە هەموارکردنەوەی یاسای نەوت و غازی هەرێم وتویەتی: لیژنەکەیان چاوەڕێی
کۆتایی هاتنی پشووی یاسادانان و پێکهێنانی حکومەتی نوێی بەغدا دەکات بۆئەوەی
بڕیاری توند دژ بە حکومەتی هەرێمی کوردستان دەربکرێت و ڕووبەڕووی ئەو ئاڵنگاریانە
ببێتەوە کە بەرانبەر بە جێبەجێکردنی یاسای نەوت و غازی فیدراڵی وەستاونەتەوە.
جەزائیری هەروەک
وتویەتی: رۆیشتنی بەشێک لە کۆمپانیا بیانییەکان لە هەرێمی کوردستان ئەوە پشتراست
دەکاتەوە کە بڕیارەکەی دادگای فیدراڵی دژ بە یاسای نەوت و غازی هەرێمی کوردستان
لەجێبەجێکردندایە و پارێزگاکانی عێراق و فەرمانگە حکوومییەکان لەناویاندا حکومەت
ملکەچی دەستوورن.
رۆژی چوارشەممە، پەڕلەمانی کوردستان یاسای نەوت و غازی هەرێمی کوردستان
ژمارە 22ی ساڵی 2007ی هەموار کردەوە، هەرچەندە لەماوەی
رابردوودا دادگای فیدراڵی بەبڕیارێک ئەو یاسایە و دۆسیەی نەوت و غازی هەرێمی
کوردستانی بەناسایی ناساندبوو، بەوپێیەی لەگەڵ دەستووری فیدراڵییدا نایەتەوە.
ئامادەکردن: ئاکۆ ئاڵی