شارپرێس:
زانایەکی بواری سیستەمی بەرگریی جەستەی مرۆڤ لە روسیا بە رۆژنامەی
" ئیزڤیستیا"ی وتووە کە دوای هەموو تووشبوونێک بە ڤایرۆسی کۆڕۆنا،
کاریگەرییە نەرێنییەکانی ڤایرۆسەکە لەسەر تەندرووستی مرۆڤ قورستر دەبێت.
نیکۆلای کریوچکۆڤ لەچاوپێکەوتنەکەیدا بە رۆژنامە رووسییەکەی وتووە:
مەترسیی دووبارە تووشبوونەوە بە کۆڕۆنا لەوەدایە کە دوای هەموو تووشبوونەوەیەک
ئاکامی تەندرووستیی مەترسیدارتری لێدەکەوێتەوە، تەنانەت لەناو کەسانی ساغ و
ئەوانەی لەناوەراستی تەمەنیاندان.
وتوشیەتی: دووبارەبوونەوەی تووشبوون بە کۆڕۆنا وادەکات کەسەکە هەست
بە وڕیی و سەرئێشە و دڵەڕاوکێ و نەمانی تەرکیز و تەنانەت خەمۆکیش بکات.
هەروەک دەڵێت: جگە لەمانە، کەسەکە ئارەقکردنەوەی زیاد دەکات و لێدانی
دڵیشی خێرادەبێت، لای هەندێک کەسیش دەبێتە هۆی رووتانەوەی قژ و نەمانی هەستی
بۆنکردن، بەڵام دوای دەرکەوتنی شێوەگۆراوی ئۆمیکرۆن، تاڕاددەیەک ئەو نیشانانە
نەمان.
ئاماژەی بەوەشکردووە کە حاڵەتەکانی دووبارەبوونەوەی تووشبوون بە
ڤایرۆسی کۆڕۆنا بۆتە بابەتێکی باو و زۆرکەس تووشی دەبێتەوە.
بەوتەی ئەو پسپۆرە ڕووسییە، دوای تێپەڕبوونی شەش مانگ بەسەر یەکەم
کوتانی دژە کۆڕۆنا، واباشترە کوتانی دووەمیش بکرێت، بۆئەوەی سیستەمی بەرگریی
کەسەکە بەهێز بکرێت و پێشگریی بکات لە تووشبوون بە شێوە توندەکەی نەخۆشییەکە.
ئامادەکردن: ئاکۆ ئاڵی