شارپرێس:
وتەبێژی یەکێتیی نیشتمانیی کوردستان ئاشکرای دەکات حیزبەکەی و پارتی دیموکراتی کوردستان بەشداربوون لە نووسینەوەی کارنامەی هاوپەیمانیی بەڕێوەبردنی دەوڵەت و واژۆیان لەسەر کردووە.
سۆران جەمال تاهیر، وتەبێژی یەکێتیی نیشتمانیی کوردستان بە کەناڵی رووداوی راگەیاندوە، یەکێتیی نیشتمانیی کوردستان و پارتی دیموکراتی کوردستان بەشداربوون لە نووسینەوەی کارنامەی هاوپەیمانیی بەڕێوەبردنی دەوڵەت و واژۆیان لەسەر کردووە.
لەبارەی ئەگەری گۆڕینی کاندیدی پۆستی سەرۆککۆماری عێراق، وتەبێژی یەکێتی جەختیکردوەتەوە کە یەکێتی سوورە لەسەر بەربژێری خۆی بۆ ئەو پۆستە، چونکە پۆستەکە بەرکەوتەی کوردە و لە کوردیش بەرکەوتەی یەکێتییە، لەوبارەشەوە قسەمان لەگەڵ هێز و لایەنە عێراقییەکان کردووە و لە ئاستی باڵاش لەگەڵ پارتی گفتوگۆمان کردووە.
دسۆران جەمال تاهیر ئاماژەی بەوەش کردوە لە دوو مانگی رابردوودا، چەند کۆبوونەوەیەک لە ئاستی باڵا لەنێوان پارتی و یەکێتیدا کراون، بەڵام تاوەکو ئێستا نەگەیشتووینەتە رێککەوتن و بەهیواین پێی بگەین.
هەروەها ناوبراو روونیکردوەتەوە، ئێستا زەمینەسازی هەیە بۆ دانیشتنی پەرلەمان، ئێمە و پارتیش جەختمان لەسەر کۆبوونەوەی پەرلەمان بوو، چونکە سەرۆککۆمار و پێکهێنانی حکومەتیش لە رێگەی پەرلەمانەوە یەکلایی دەبێتەوە.
سۆران جەمال تاهیر دەشڵێت: لە دوای هەڵبژاردنی مانگی تشرینی دووەمی 2021، یەکێتی پێی باشبووە لەگەڵ پارتی و لایەنە کوردییەکان بە یەک شاند و بەرنامەی هاوبەشی هەبێت لە بەغدا، بەڵام بەداخەوە دۆخەکە بە ئاقارێکی دیکەدا برا، ئێستاش دەخوازین یەک وەرەقەی سیاسی هاوبەشمان هەبێت.
س.هـ