شارپرێس:
عەبدوڵڵا ئۆجەلان لەپەیامێکی نوێدا له‌دورگه‌ى ئیمراڵیه‌وه، هۆشداریدەدات لەبونی پیلانێکی نێودەوڵەتی بۆ تێکدانی هەوڵەکانی ئاشتی لەتورکیا، داواشدەکات، هه‌سه‌ده ببێته بەشێک لەپێكهاته‌ى سوپای سوریا، بۆ ئه‌وه‌ش مه‌رجێك ڕاده‌گه‌یه‌نێت.
به‌گوێره‌ى ئه‌و زانیاریانه‌ى گوڵستان کڵچ ئەندامی کۆمسیۆنی ئاشتی لەپەرلەمانی تورکیاو پەرلەمانتاری دەم پارتی، وردەکاریی دیدارەکەی وه‌فدى کۆمسیۆنەکەی لەگەڵ ئۆجەلان بۆ میدیاکان ئاشکراکرد.
كڵچ باسى له‌وه‌كرد، تەوەرێکی سەرەکیی دیدارەکەیان له‌گه‌ڵ ئۆجه‌لان له‌ئیمراڵى تایبەتبوە بەکاریگەریی دۆخی سوریا لەسەر پرۆسەی ئاشتیی، بۆ ئه‌وه‌ش ئۆجەلان وتویه‌تى، "پێشنیاز ده‌كه‌م‌و داواشده‌كه‌م، دەبێت ڕێککەوتنی 10ی ئادار جێبەجێبکرێت‌و لەو چوارچێوەیەدا هێزەکانی هەسەدە بچنە نێو پێکهاتەی سوپای سوریا".
وه‌كو كڵچ جه‌ختى له‌سه‌ركرده‌وه، "ئۆجه‌لان ئه‌وه‌شى باسكرد، كه چونى هه‌سه‌ده بۆ ناو سوپاى سوپاى سوریا به‌مه‌رجێكه، ئه‌ویش بریتیه له‌وه‌ى، کورد هێزی ئاسایشی ناوخۆیی تایبەت بەخۆی هەبێت بۆ پاراستنی ناوچەکانی‌و هیچ هێزێكى دیكه نه‌یه‌ته ناوچه كوردنشینه‌كان".
كڵچ كه خۆى ڕوبه‌ڕوو له‌گه‌ڵ ئۆجه‌لان دیدارى كردوه ده‌ڵێت، "لەبەشێکی دیکەی پەیامەکەیدا، ئۆجه‌لان هەڵوێست‌و گوتارەکانی ئەمدواییەی ڕەجەب تەیب ئەردۆغان‌و دەوڵەت باخچەلی سەبارەت بەپرۆسەی ئاشتی بەرزنرخاندوە، لەهەمانکاتدا هۆشداریدا کە چەند زلهێزێکی نێودەوڵەتی بونیان هەیەو نایانەوێت هاوپەیمانی‌و ئاشتەوایی لەنێوان کوردو تورکدا بەدیبێت، بۆیە کار بۆ تێکدانی پرۆسەکە دەکەن".
ئەو پەیامەی ئۆجەلان لەکاتێکدایە، ماوەیەکە لەتورکیا جموجۆڵێکی سیاسیی نوێ بەدەستپێشخەریی دەوڵەت باخچەلی سەرۆکی مەهەپە دەستیپێکردوە بۆ چارەسەرکردنی پرسی کوردو کۆتاییهێنان بەشەڕی چەکداریی.
پێشتریش لەدانوستانەکانی نێوان ئیدارەی خۆسەری ڕۆژئاواو حکومەتی دیمەشق، خاڵی ناکۆکیی سەرەکی بریتیبوو لەچارەنوسی هێزەکانی سووریای دیموکرات (هه‌سه‌ده)، به‌جۆرێك، دیمەشق داوای هەڵوەشاندنەوە یان تێکەڵکردنی تەواوەتی دەکرد بەبێ مەرج، بەڵام فه‌رمانده‌كانى هه‌سه‌ده داوای پاراستنی تایبەتمەندیی هێزەکانیان دەکرد لەچوارچێوەی سیستەمێکی یه‌كگرتوى بەرگریی له‌سوریادا.
