شارپرێس:
دواى ئه‌وه‌ى كۆمارى ئیسلامى ئێران ڕاگرتنى هه‌نارده‌ى غازى بۆ عێراق ڕاگه‌یاند، وەزارەتی کارەبای عێراقیش هاته‌ده‌نگ‌و ڕایده‌گه‌یه‌نێت، "ماوەی سێ ڕۆژە ئێران هیچ بڕه غازێكى پێنه‌داوین"، وته‌بێژى وه‌زاره‌تى كاره‌باى عێراقیش ده‌ڵێت، "بڕیارە چوار ڕۆژی دیکە له‌ئێرانه‌وه هه‌نارده‌ى غاز ده‌ستپێبكاته‌وه".
دوێنێ لایەنی ئێرانی بەفەرمیی وەزارەتی کارەبای عێراقی ئاگادارکردوەتەوە کە بەهۆی کاری چاکسازیی لەبۆرییە گواستراوەکانی غاز لەناو خاکی ئێران، هەناردەی غاز بۆ ماوەی هەفتەیەک بەتەواوی دەوەستێت، تاوەکو ئێستا سێ ڕۆژ بەسەر وەستانی غازەکەدا تێپەڕیوەو بڕیارە دوای چوار ڕۆژی دیکەو تەواوبونی چاکسازییەکان، هەناردەکردن دەستپێبکاتەوە.
ئەحمەد موسا وتەبێژی وەزارەتی کارەبا ئاشكرایكردوه، وەزارەتی کارەبا بۆ ئەوەی ڕێگە لەکەمبونەوەی کاتژمێرەکانی پێدانی کارەبا بگرێت، پەنای بۆ بەکارهێنانی سوتەمەنیی بەدیلی خۆماڵی بردوە بۆ وێستگەکان، بەڵام ئەم چارەسەرە وێستگەکانی (مەنسورییە، سەدری غازی‌و بەسمایە) ناگرێتەوە، چونکە ئەو وێستگانە تەنها لەسەر غاز کاردەکەن.
عێراق بۆ بەگەڕخستنی دوو لەسەر سێی وێستگەکانی کارەبا، پشت بەهاوردەی غازی ئێرانی دەبەستێت‌و ئەمریکاش بەردەوامە لەگوشارەکانی بۆ ئه‌وه‌ى عێراق لەدابینکردنی وزە سەربەخۆبێت، بۆیە بەخشینەکانی کڕینی غازی ئێرانی لەسەر عێراق هەڵگرت.
