شارپرێس:
دەستەی گشتیی ناوچە کوردستانیەکانی دەرەوەی ئیدارەی هەرێم وه‌ڵامى وه‌زاره‌تى پلاندانانى حكومه‌تى عێراق ده‌داته‌وه‌و ڕایده‌گه‌یه‌نێت، "بڕیاری هاوبەشی هەردوو وەزارەتی پلاندانانی به‌غداو هەرێم ئەوەبوو کە لەکەرکوک‌و ناوچە کوردستانییەکان، سەرژمێریی ساڵی 1957 بکرێتە بنەما"، ده‌شڵێت، "بەداخەوە، هیچ جۆرە پابەندبونێک بەم بڕیارەوە بەدیناکرێت، بۆیه هۆشداریده‌ده‌ین‌و جه‌ختده‌كه‌ینه‌وه، هه‌موو دەستبردنێک بۆ گۆڕینی ناسنامەو دیموگرافیای شاری کەرکوک، خانەقین، شەنگال‌و تەواوی ناوچە کوردستانییەکان، قبوڵناكه‌ین".
لەڕاگەیەندراوێکدا دەستەی گشتیی ناوچە کوردستانیەکانی دەرەوەی ئیدارەی هەرێم ڕایگەیاندوه؛ "ڕۆژى 26ى ئه‌م مانگه دوای ئەوەی وەزارەتی پلاندانانی عێراق دەرئەنجامی سەرژمێریی گشتیی عێراقی ڕاگەیاند، بەپێویستی دەزانین جەخت لەچەند خاڵێکی گرنگ بکەینەوە".
ئاماژه‌ى به‌وه‌شكردوه، "وەک ئاشکرایە، بڕیاری هاوبەشی هەردوو وەزارەتی پلاندانانی حکوومەتی عێراقی فیدراڵ‌و حکومەتی هەرێم ئەوەبوو کە لەکەرکوک‌و ناوچە کوردستانییەکان، سەرژمێریی ساڵی 1957 بکرێتە بنەما".
باسى له‌وه‌شكردوه، "لەو چوارچێوەیەشدا، ئەنجومەنی وەزیرانی عێراق لەکۆبونەوەی ئاسایی خۆیدا لە5ى ئه‌م مانگه‌دا، بڕیاریدا پێش ڕاگەیاندنی دەرئەنجامەکان، دۆسیەی تەواوی ئەو هاوڵاتییانەی لەناوەڕاست‌و خواروی عێراقەوە هاتون‌و ئێستا لەکەرکوک نیشتەجێن (واتە ئەوانەی بەشێک نین لەسەرژمێریی 1957)، بۆ ناوچەکانی خۆیان بگەڕێندرێتەوە".
نیگه‌رانى خۆى ڕاگه‌یاندوه‌و جه‌ختده‌كاته‌وه، "بەڵام بەداخەوە، هیچ جۆرە پابەندبونێک بەو بڕیارەوە بەدیناکرێت، ئێمە ئەمە بەمەترسییەکی جدی لەسەر ئەو ناوچانەى دەبینین‌و بەپێچەوانەی بنەما گشتییەکانی مادەی 140ی دەستوری دەزانین، بێگومان ئەم پێشهاتە مەترسیدارە، نیگەرانییەکانی پێشوی ئێمەی بەڕاست دەرخست".
له‌و ڕوه‌شه‌وه دەستەی گشتیی ناوچە کوردستانیەکانی دەرەوەی ئیدارەی هەرێم وتویه‌تى، "ئەگەر ڕونکردنەوەی پێویست‌و بڕواپێکراو لەلایەن بەغداوە بەحکومەتی هەرێم نەدرێت، ململانێ دەستورییەکانی نێوانمان دەگوازێتەوە بۆ قۆناغێکی دژوارتر، لای هەمولایەکیش ڕون بێت کە هەرجۆرە دەستبردنێک بۆ گۆڕینی ناسنامەو دیموگرافیای شاری کەرکوک، خانەقین، شەنگال‌و تەواوی ناوچە کوردستانییەکان، بەهیچ شێوەیەک قبوڵکراو نییە".
له‌كۆتاییشدا هاتوه، "پێویستە لەدەرەوەی ململانێ ناوخۆییەکانی هەرێم، حکومەت‌و سەرجەم لایەنە سیاسییەکان ئەم دۆخە بەهەند وەربگرن‌و ئەرکی لەپێشینەمان پاراستنی ناسنامەی کوردستانیبونی کەرکوک‌و تەواوی ناوچە کێشەلەسەرەکان بێت".
