شارپرێس:
مەحمود محەممەد وتەبێژی پارتی دیموكراتی كوردستان ڕایگەیاند، دووشەممەی داهاتوو، شاندی پارتی لەگەڵ یەكێتی و گۆڕان و بزووتنەوەی ئیسلامیدا كۆ دەبێتەوە.
وتەبێژی پارتی ئەمرۆ چوارشەممە 14/12/2016 لە راگەیەنراوێكدا ئەوەی خستۆتەروو، ئەو سەردان و كۆبوونەوانەی هەفتەی داهاتوو لە چوارچێوەی ئەو هەنگاوانەیە بۆ جێبەجێكردنی ناوەڕۆكی پەیامەكەی مەسعوود بارزانی و دۆزینەوەی نەخشەڕێگایەك بۆ چارەكردنی كێشە ناوخۆییەكان.
ئاماژەی بەوەشداوە، بڕیارە ڕۆژی دووشەممەی داهاتوو 19/12/2016، شاندی پارتی دیموكراتی كوردستان بە مەبەستی كۆبوونەوە لەگەڵ هەر یەك لە یەكێتیی نیشتمانیی كوردستان و بزووتنەوەی گۆڕان و بزووتنەوەی ئیسلامی كوردستاندا، سەردانی شاری سلێمانی بكات.
بە پێی راگەیەنراوەكە، شاندی دەستنیشانكراوی پارتی پێكهاتووە لە فازڵ میرانی سكرتێری مەكتەبی سیاسی و عێزەدین بەرواری و مەحموود محەممەد و كاكەمین نەجاڕ ئەندامانی مەكتەبی سیاسیی و، ئەحمەد كانی و دڵشاد شەهاب ئەندامانی ئەنجوومەنی سەركردایەتی.
ر ـــ ح