تاوانێكی‌ دەگمەن
چیرۆكی ئەو ئاوارە موسڵییەی لەنەجەف خێزانەكەی سووتاند

عیراق

15/09/2017‌ 1832 جار خوێندراوه‌ته‌وه

شارپرێس: نیقاش
پیاوێك لەئاوارەییدا هەموو ئەندامانی‌ خێزانەكەی‌ پێكەوە دەسوتێنێت، ئەمە ناونیشانی‌ ئەو چیرۆكەیە، كە ناكرێت بەئاسانی‌ باوەڕی‌ پێبكرێت.

لەكاتێكدا دایكەكە ئاگری تێبەرببوو هەوڵیدا حسێنی كوڕی رزگاربكات‌و لەژێر قەراغی دەرگا كڵپەسەندووەكەوە دەریكردە دەرەوە‌و ئێستا لەژیانێكدایە، كە شەش ئەندامی خێزانەكەی تێدا لەدەستداوە‌و تەنیا یەك برا‌و باوكی بۆ ماوەتەوە، كە ئەویش لەزینداندایە، چونكە خێزانەكەی سوتاندووە.

لەشوێنی رووداوەكەدا هەندێك شوێنەواری ئاگرەكە‌و جلوبەرگی پەرشوبڵاو لێرە‌و لەوێ دەبینرێن، ئەو خانووەی خێزانێكی ئاوارەی قەزای تەلەعفەری موسڵی تێدا نیشتەجێبوو دەكەوێتە پشت كەژاوەی حسێنییەكان كە بەدرێژایی رێگای (37 كم) لەباكووری شاری نەجەف بڵاوبوونەتەوە.

دڵتەنگی باڵی بەسەر خانووەكە‌و دارخورماكانی دەوروبەردا كێشابوو، دراوسێكە دەرگاكەی كردەوە‌و بینی پێڵاوی منداڵێك‌و گەنمی سووتا‌و لەناوەڕاستی ژوورە تێكچووەكانی خانووەكەدا كەوتوون كە رووبەرەكەی لە 200 مەتر زیاتر نابێت، هاوكات لە ژوورێكی تردا كەمێك خورما‌و كڵاوێك‌و پێڵاوی گەنجێك بەدیدەكرێن.

حسێن (12 ساڵ) تاكە رزگاربووی ئەو تاوانەیە كە باوكی لە سەعات دووی شەودا ئەنجامی دا، ئەو دەڵێت "بە هاواری دایكم خەبەرم بووەوە كە هەوڵی دەدا دەرگای ژوورەكە بكاتەوە تا رزگارم بكات، دوای ئەوەی هەموو هەوڵەكان شكستیان هێنا، كەمێك دەرگاكەی راكێشا‌و بە توندی پاڵی پێوەنام بۆ دەرەوە‌و بە ترس‌و سەرسوڕمانێكی زۆرەوە لەو كارەدا سەركەوتووبووم، هەر ئەوەندەم پێكرا بچمە ئەو ژوورەی براكەم‌و هاوسەرەكەی‌و تاكە كچەكەیانی تێدا دەژین كە تەمەنی لە پێنج مانگ زیاتر نابێت".

حسێن، كە بە ئارامی فرمێسك بە چاوەكانیدا دەهاتنە خوارەوە كاتێك ئەو بارودۆخەی دەهاتەوە یاد كە پێیدا تێپەڕیوە، زیاتر وتی "تائێستاش دەنگ‌و هاواری خوشك‌و براكانم لە مێشكمدایە‌و تەنانەت لە خەونیشدا ئەو بارودۆخەم بیردەكەوێتەوە‌و لە ترساندا لەخەو رادەچڵەكم، حەسەنێنی برابچووكم بیر دەكەوێتەوە كە دووەم بەهاری تەمەنی تەواو نەكردبوو ئاگر لە هەموو لایەكەوە گەمارۆی دابوو، هەرچی فاتمەی خوشكیشمە ئەوا ئاگری گرتبوو بە نێو ژوورەكەدا رایدەكر‌و لە تاو زۆری ئازار هاواری دەكرد".

وتیشی: "دایكم لەپێناوی مندا خۆیكردە قوربانی، هێشتا هەست بە پەنجەكانی دەكەم كاتێك پاڵیان پێوەنام بۆ دەرەوەی ژوورەكە‌و ئاگر لە دامێنی جلوبەرگەكەی بەرببوو، بەڵام دڵتەنگییەكەم زیاتر بوو كاتێك هەوڵمدا دەرگای ژوورەكە بكەمەوە كەچی باوكم بە بەرد لێیدەدام‌و هاواری كرد لێگەڕێ‌ با ئاگرەكە بیانسووتێنێت لەو كاتەشدا بەنزینی لە پەنجەرەكەوە فڕێ دەدا، ئیتر هیچ رێگەیەكم لەبەردەمدا نەما ئەوە نەبێت پەنا بۆ دراوسێكەمان ببەم، بەڵام كات درەنگ بوو، ئاگرەكە شەش ئەندامی خێزانەكەمی برد".

نوری حسێن عەلی كوڕە گەورە (21 ساڵ) دیاربوو هەرەسی هێناوە، چونكە نەیتوانیوە خێزانەكەی لەبڵێسەی ئاگرەكە رزگار بكات لەبەرئەوەی باوكی بەشێوەیەكی هیستیری بەنزینی پێدا كردوون، ئەو بە دڵتەنگییەوە دەڵێت: "دوای نیوە شەو گوێم لە براكەم بوو بەتوندی لەدەرگاكەی دەدا‌و هاواری دەكرد، بەپەلە چووەمە دەرەوە‌و بینیم ژووری خێزانەكەم گڕی گرتووە‌و ئاگر لە پەنجەرەكەوە دێتەدەرەوە، هەوڵمدا دەرگاكە بكەمەوە، بەڵام تەزووی كارەبا نەیهێشت، بارودۆخەكە زۆر سەخت بوو، چونكە نەمدەتوانی هیچ شتێك بكەم‌و سەیری خێزانەكەم دەكرد كە دەسووتان".

نوری هەروەها وتیشی "باوكم زەرخەنەی دەكرد كاتێك سەیری ئاگرەكەی دەكرد كە هەموو شتێكی ناو ژوورەكە دەسووتێنێت، لەو كاتەدا بەخەیاڵمدا نەدەهات باوكم ئەو كارەی كردبێت، بەڵام بەداخەوە دەركەوت كە باوكم ئاگری لە ژوورەكە بەرداوە‌و بەبێ ئەوەی دایكم‌و براكانم هەستی پێبكەن بەنزینی بردوەتە ژوورەوە".

ئەو وەسفی بارودۆخی باوكی دەكات‌و دەڵێت "باوكم نەخۆشی پەركەمی هەیە‌و ناو بەناو لێیدەدا، ئەو كاری نەدەكرد، منیش زوو چوومە بازار تا كاربكەم بۆ بژێوی خێزانەكەم، خەونیشم ئەوە بوو خوشك‌و براكانم لە زانكۆ ببینم، بەڵام قەدەر هەموو خەون‌و ئاواتەكانی بردم، بۆیە بڕیارمدا لەگەڵ ماڵی خاڵمدا نیشتەجێ بم‌و ئومێدمان هەبوو بگەڕێینەوە خانووە داڕماوەكەمان لە شاری تەلەعفەر كە لەساڵی 2014وە لێی ئاوارە بووین ئەویش دوای ئازاداكردنی بەم دواییانە".

هەر لەوبارەیەوە فەیسەڵ سادق دراوسێ خێزانەكە كە لەو نزیكانە نیشتەجێیە، وتی: "دوای نیوەشەو دراوسێكەمان لە دەرگای دا‌و لە رووداوی ئاگرەكە ئاگاداری كردین، بینیمان ژوورەكە گڕیگرتووە‌و بەهۆی بەهێزی ئاگرەكەوە كەس ناتوانێت خێزانەكە رزگار بكات هەرچەندە هەوڵی زۆر درا".

وتیشی "باوكی خێزانەكە گرفتی دەرەوونی هەبوو نەیدەتوانی تێكەڵاوی خەڵك ببێت، هەمیشە حەزی دەكرد بۆ ماوەیەكی دوورودرێژ بە تەنیا دابنیشێت، پێموایە ئاوارەبوونی لە تەلەعفەر كاریگەری زۆری لەسەر حاڵەتەكەی هەبوو، ئەمە سەرەڕای ئەوەی خێزانەكە كێشەی داراییشی هەبوو".

عەمید ماجید عابدی فەرماندەی پۆلیسی نەجەف وتی "باوكەكە دانی بە ئەنجامدانی تاوانەكەدا ناوە‌و خراوەتە زیندانەوە، ئەو بەدەست گرفتی دەروونییەوە دەناڵێنێت بەهۆی بارودۆخی خراپی بژێوی‌و جگە لەوەش نەخۆشی پەركەمی لەگەڵدایە".

دكتۆر مونیرە محەمەد پسپۆری دەروونناسی دەڵێت "ئەم حاڵەتە بە یەكێك لە حاڵەتە شازەكان دادەنرێت كە لەجیهاندا ئەنجام دەدرێن، ئەویش بەهۆی گەیشتنی كەسەكە بە نائومێدبوون لە ژیان لەئەنجامی فەراهەم نەبوونی ژیانێكی ئاسوودە بۆ خێزانەكەی یاخود بەهۆی نەخۆشی دەروونی یان دەمارییەوە".

دەشڵێت "رووداوی ئەو ئاوارەیەی خێزانەكەی سووتاندووە بەشێكی دەكەوێتە ئەستۆی دەوڵەت كە كەش‌و هەوا‌و بژێوی بۆ ئەو ئاوارنە دابین نەكردووە كە بە نابەدڵی لە شارەكانیان ئاوارە بوون".