لە هەر شوێنێك حوكمڕان هەبێت، دەبێت هێزگەلێكی ناڕازیی و ناتەبا لە پێناو بەرژەوەندیی گشتیی و ڕاستكردنەوەی لارییەكانی دەستەڵات وەك ئۆپۆزیسیۆنێكی كارا بوون و ئامادەگیی بەرچاویان هەبێت. هەر كاتێك بەرانبەر دەستەڵات ئۆپۆزیسیۆن بوونی نەبوو، ئەوە دەستەڵات بە ویستی خۆی جڵەوی تەواوی جومگەكانی سیاسەت و ئابوریی و ئاسایش و سەربازیی و تەنانەت ژیانی كۆمەڵایەتییش دەكات.
ئەگەر سەرنجی ڕژێمە دیكتاتۆرەكانی دنیا بدەین، هەمیشە لە ڕێگای زەبروزەنگەوە نەیهێشتووە ئۆپۆزیسیۆن بەشداریی پرۆسەی سیاسیی بكات و تەنانەت لە كاری پەرلەمانیی و ڕێكخراوەیی و خەباتی مەدەنیی كردونیەتیەدەرەوە، بەڵام هەرگیز نەیتوانیوە ئۆپۆزیسیۆن كۆتوبەندبكات، چونكە لە بارودۆخێكی لەو جۆرەدا كاری ئۆپۆزیسیۆن لە ناو پەرلەمان و شەقامەكانەوە دەگوازرێتەوە بۆ شاخ و پێدەشتەكان و لە خەباتی مەدەنییەوە دەگۆڕێت بۆ خەباتی چەكداریی. دواجار ئەم جۆرە خەباتەیش كاریگەریی گەورەی لەسەر نەخشەی بەڕێوەبردنی دەوڵەت دەبێت و بە شێوەیەكی بەردەوام ناسەقامگیریی بەرۆكی وڵات دەگرێت، بەڵام ئەوەی گرنگە ئەو گیانە یاخییەیە، كە هێز و ڕەوتە سیاسییەكان دروستیدەكەن و دواجار دەیگۆڕن بە هۆكاری گۆڕانكاریی گرتنەدەستی دەستەڵات.
لە هەرێمی كوردستاندا لە دوای هەڵبژاردنی (25) ی تەموزی (2007) بە دیاریكراویی دوای ئەوەی بزوتنەوەی گۆڕان توانیی یەك لە سەر چواری كورسییەكانی پەرلەمانی كوردستان بەدەستبهێنێت، ئۆپۆزیسیۆن وەك هێزێكی ڕكابەری كاریگەر سەریهەڵدا، جێكەوتەی ئەم هێزەیش لە سەر نەخشەی سیاسیی هەرێم بەشێوەیەكی بەرچاو دیار بوو، دەرگای بە ڕوی كۆمەڵێك گۆڕانكاریی گەورەدا كردەوە، بەڵام دواجار ئەو پرۆژەیەی، كە نەوشیروان مستەفا ئامانجی بوو و كاری بۆ دەكرد، بە هۆی كۆمەڵێك فاكتەری بابەتییەوە لە پەلوپۆ خرا.
ئەوەی، كە ئێستا لە كوردستان دەگوزەرێت، نە دەستەڵاتەكەی دەستەڵاتێكی ڕاستەقینەیە و نە نوێنەرایەتیی خەڵكیش دەكات، بەڵكو مۆدێلێكی گۆج و گەوجی حوكمڕانییە، خوێندنەوە بۆ خرابییەكانی دەستەڵات هەموو لاپەڕەی ڕۆژنامە و گۆڤار و كتێبەكانی پڕكردووە. لە بەرانبەریشدا مۆدێلی ئۆپۆزیسیۆنی هەرێم مۆدێلێكی ناكامڵ و لاوازە و پێویستی بە گۆڕانكاریی گەورە هەیە، بۆ ئەوەی بگەڕێتەوە دۆخی پێشووی خۆی، چونكە ئۆپۆزیسیۆنی ئێستای هەرێم بە هۆی خرابیی سیاسەتەكانی هێزە حوكمڕانەكانەوە لە پەرلەماندا كەناركەوتووە و نایشتوانن لە شەقامدا ڕۆڵیان هەبێت، لە هەڵبژاردنەكانیشدا بە هۆی گزیكارییەوە هیچ كات براوە نابن، تەنانەت لە چوار ساڵی ڕابوردوودا لەڕوی میدیاییەوە پاشەكشەی گەورەیان كردووە.
بە بۆچوونی ئێمە لە بارودۆخێكی وەك ئێستای هەرێمدا دوو دەرفەت لە بەردەم ئۆپۆزیسیۆندا هەیە، بۆ ئەوەی كاروباری سیاسیی خۆیان گورجبكەنەوە، ئەوانیش بریتین لە دروستكردنی هاوپەیمانێتیی سیاسیی بۆ هەڵبژاردنی پەرلەمانی كوردستان، بەڵام ئاماژەكان لەم بارەیەوە دڵخۆشكەر نین و ئەوە دەردەخەن، كە ئەم هێزانە لە ناوخۆیاندا ململانێیانە لەسەر ڕێبەرایەتیكردنی ڕەوتی ئۆپۆزیسیۆن لە كوردستاندا. دەرفەتی دوهەم لەبەردەم ئۆپۆزیسیۆنی هەرێمدا دروستكردنی تۆڕێكی میدیایی بەهێزە، بۆ ئەوەی كاریگەریی گەورەی لەسەر دروستكردنی ڕای گشتیی هەبێت، بەتایبەت دوای زەبەلاح_بوونی میدیای دەستەڵات بەهۆی پارەی نەوتەوە، كاریگەریی میدیای ئۆپۆزیسیۆن لاواز بووە. دەبێت هێزە ئۆپۆزیسیۆنەكان ئەوە بزانن، كە ئەوەی نەوشیروان بەدەستیهێنا، بەشی زۆری بەهۆی كاریگەریی میدیاكەیەوە بوو، ئەوەی بزوتنەوەی گۆڕانیش لەدەستیدا بە هۆی خرابیی میدیاكەیەوە بوو. لە مێژووی كاری ئۆپۆزیسیۆندا ئەو ڕاستییە ڕەهایە هەیە، كە هەركات میدیایەكی بەهێزت هەبوو، دەتوانیت شەڕێكی مەدەنییانەی ڕاستەقینە لەگەڵ دەستەڵاتدا بكەیت، پێچەوانەكەیشی ڕاستە.
ئەحمەد میرە
ئەم وتارە دەربڕی بۆچونی نووسەر خۆیەتی