كاتێ باس لە هۆكارەكانی شكستی شۆڕشی شیخ مەحمود و ئاشبەتاڵی ١٩٧٥ و هەر شكستێكی كورد دەكرێت ئەوەندەی باس لە ناپاكی ئەمریكا، ئنگلیز و شای ئێران...... هتد بەرامبەر بە كورد و شۆڕشەكەی دەكرێت، ئەوەندە باس لە هەڵەكانی سەركردەكانی شۆڕش ناكرێت. زۆربەی سیاسیەكانی كورد هەڵسەنگاندنێكی زانستیانەیان بۆ ئەم شكستە و باقی شكستەكانی تر: ئەنفال، ٣١ ئاب و شەڕەكانی ناوخۆ و ....هتد نەكردوە. بە كورتی بەخشینەوەی ئۆباڵی شكستەكان بۆ سەر فاكتەرە دەرەكیەكان و یەكتر بۆتە كەلتوری سیاسی لای تەواوی حیزبە سیاسیەكانی كورد بە تایبەتی سەركردایەتی پارتی و یەكێتێ، لێرەوەش پەیدابونی كەلتوری تەخوینكردنی یەكتر سەری هەڵداوە، بە نمونە:
1-ساڵی ٦٦ لە كەلتوری سیاسی پارتیدا بە ساڵی خیانەتی باڵی مەكتەبی سیاسی ( جەلالی) دادەنرێت و تۆمەتی جاش جەلالیان خستۆتە پاڵ ئەو هێزە، وەك مۆرێكی هەڵكەندراوی لێهاتوە.
2-٣١ ئاب ١٩٩٦ رۆژێكی پڕ خیانەتە بۆ پارتی لە كەلتوری یەكێتی نیشتمانی. دەگێڕنەوە كاتێ ٣١ ئاب رویداوە، یەكێتی خۆشحاڵ بوە، چونكە پێیان وابوە چیدی پارتی ناتوانێ باس لە ٦٦ بكات.
3-لە كۆنەوە سەركردە شكستخواردوەكان بۆ لابردنی تۆمەتی شكستەكان لەسەر خۆیان زۆر پەنایان بردۆتە بەر تەخوینكردنی میلەت. موخابن " دەلۆ، دەلۆ كورد خائینۆ"ی لاوك بێژی كورد كاوێز ئاغا و چەندینی تر بۆتە وێردی سەر زوبانی تاكی كورد و دەوترێتەوە، لە كاتێكا راستیەكەی ئەوەیە سەركردەیە خیانەت دەكات نەك میلەت، دەبو كاوێز ئاغا بڵێت " دەلۆ دەلۆ سەركردەی كورد خائینۆ" .
لە ١٩٩١ ---- ٢٥/٩/٢٠١٨
ئەمریكیەكان و هاوپەیمانەكانی فاكتەری سەرەكیبون بۆ راپەرینی خەڵكی عێراق و كوردستان. ناوچەی دژەفرین و كشانەوەی داودەزگاكانی بەعس لە ژێر فشاری ئەواندا بو، بۆ ٢٠١٨ جگە لە روخانی سەدام حوسێن هاوپەیمانان كۆمەكی باشی كوردیان كردوە. لە ژێر فشاری ئەمریكا پارتی و یەكێتی بە روكەش كۆتاییان بە شەڕە تفەنگی ٤٠ ساڵەی یەكتر هێنا، سەدان رێكخراوی خێرخواز و دەیان وڵات هاوبەشیان كرد لە دوبارە بونیاتنانەوەی كوردستان. كەچی موخابن ئەم دو دەسەڵاتە ئەو دۆست و خێروازانەیان توشی خەجاڵەتی كرد لە ئاست نەیارەكانی خەڵكی كوردستان.
پەیدابونی ئۆپۆزسیۆن لە ٢٠٠٩ بەو ئومێدەی لە نزیكەوە سەرانی ئەم دو ٢ حیزبە بە رەخنەكانی ئاگادار بكاتەوە. بۆ راستكردنەوەی هەڵەكەنیان پارتە ئۆپزسیۆەنەكان چەندین پرۆژە و رێگە چارەیان خستە بەردەست، بەڵام كەلتوری فەشەلی سیاسی و كینەی سیاسی ئەم دو حیزبە بەرامبەر یەكتر و دەنگی ناڕازی ئەوەندەی تر بارودۆخەكەی ئاڵۆزتر كرد ، تا كار گەیشتە ئەنجامدانی ریفڕاندۆم.
ئەم سەركردە لاسارانە ئەوەندەی گوێیان لە دیپلۆماتە بەرژەوەندی خوازەكان دەگرت، هاوشێوەی شاباشی چاوشەكان ئەوەندە بەڵێ و سەرلەقاندنیان پێخۆشبو، ئەوەندە داوەت و داواتكاری و پێدا هەڵدانیان پێخۆشبو ئەوندە زیاتر بە رەخنە و ئامۆژگاریەكانی دۆستەكان ناڕەحەت دەبون.
ئەم لاسارانە پێیان وابو:
1- تەنها و تەنها ئەمانن پاڵەوانی شكاندنی بەرەی تیرۆر و داعش.
2- ئەگەر ئەمان نەبن بەغدا و حەشد و سوپا هیچیان بۆ ناكرێ و بەغدا داعش داگیری دەكات.
3-ئەمان لە بری دونیا شەڕی داعش دەكەن و دونیا قەرزاریانە.
4-ئیتر هەتا هەتا حوكمڕانی كەركوك دەكەن و بای بایان لە مادەی ١٤٠ و بەغدا دەكرد.
ئەم لاسارانە نەك هەر گوێیان لە ئەمریكا و دۆستەكان نەگرت بەڵكە بەشێ لە خەڵكیشیان گەوجاند بەوەی ژێر بەژێر وڵاتان پشتیوانیان دەكات و ریفراندۆم ئامانجەكانی خۆی دەپێكی.
ئێستاش، كوردستانیان ئێوە حەكەمبن لەوەی:
1-كێ خیانەتی لە كورد كرد؟ كی كەكركوی بەم دەردە برد؟ ئەمانە یان ئەمریكا؟
2-ئەمانە هی ئەوەن حوكڕانی ئەم هەرێمە بكەن؟
3- هێزە ناڕازیەكان :
كاتی ئەوە هاتوە لێیان بپرسرێت ، ئەوەی ئێوە دەیكەن لە خزمەتی ئەم لاسارانە نیە؟. كاتی ئەوە نیە ئەم هێزانەش بە سیاسەتی خۆیاندا بچنەوە؟ " ئێمە لە خیانەت و شكستی ئەو ٢ دو حیزبە گەیشتین، گەندەڵی و دزیەكانیان ئاشكران؟ ئەی ئێوەی ناڕازی دەتوانن چی بكەن؟ یان بەلای كەمەوە بەرنامەتان چیە و دەتوانن پێكەوە كار بكەن و رزگارمان كەن؟.
مەلا فرمان
ئەم وتارە دەربڕی بۆچونی نووسەر خۆیەتی