گردی زەرگەتە هیی كێیە ؟

18/07/2018

هۆشیار عەبدوڵڵا

((ئەوەی وایكرد لەسەر ئەو باسە بێمە دەنگ ئەو حەملەیەیە، كە بەهۆی گردەكەوە دەكرێتە سەر پێگە مەعنەویەكەی كاك نەوشیروان ، نەدەكرا ئەو قسانە نەكەم ، بێ گوێدانە ئەوەی كێ بە دڵیەتی یان دژە)).

نەوشیروان مستەفا پێی وابو ، بە تاپۆكردنی ئەو گردە لە سەر خۆی پاراستویەتی لە داگیركردن نەك داگیری كردبێت .

بۆمێژو، كاتێك نەوشیروان مستەفا مەتر بە مەتری ئەو گردەی لە تاپۆ خستە سەرخۆی بەرپرسێكی یەكێتی دەمێك بو چاوی لەسەری بو گۆچانێكیشی لێ دانابو كە داگیری بكات ، دوایی لە دەستی دەرچو .

نەوشیروان مستەفا و كێشەی گردەكە ؛
هەر لەگەڵ دامەزراندنی كۆمپانیای وشە، گردەكە بو بەسەرهێشە بۆ كاك نەوشیروان بەو پێیەی هەبون پێیان وابو كۆمپانیاكە دەكاتە پشك و دابەشی دەكات بەسەریاندا و لەگردەكە دەبنە شەریك ، كە ئەوەی زانی مەبەستی بو چارەسەرێكی بكات هەندێك پێشنیاری خستە ڕوو ؛ 

یەك ؛ وتی دەشێ بیكەمە وەقفی حكومی و دوای مردنی خۆم بگەڕیتەوە بۆ حكومەت ، هەر زو لەوە پەشیمانكرایەوە چونكە وتیان حزب و حكومەت یەكێكە و یەكێتی بە زویی داگیری دەكاتەوە بۆ خۆی و كۆمپانیاكانی دەیكەن بە پرۆژە.

دو: هەوڵیدا بیكا بە میدیا ستی ( شاری راگەیاندنەكان) و تێكرای ناوەندەكانی میدیا بباتە ئەوێ ، یا زانكۆ و نەخۆشخانەی تێدا بكرێتەوە ، ئەوەشیان مەیسەر نەبو .

كاك نەوشیروان مەتر بە مەتری لە تاپۆ كڕی وو خستیە سەرخۆی بۆ ئەوەی دەسەلات نەتوانێ بە قانونی لێیبسەنێتەوە و داگیری بكات و هەوڵی زۆریشیاندا ، بەلام لەگەڵ ئەوەشدا تاكە یەك لەحزەش نەوشیروان مستەفا ئەو گردەی وەك موڵكی تایبەت سەیر نەكردوە بەلكو بە مولكی گشتیی و بە موڵكی شاری سلێمانی زانیوە و لە لوتكەی بێ پارەیی گۆڕاندا كە وەخت بو یەكێتی و پارتی دەیانخنكاندین و پارەمان نەبو كەی ئێن ئێن بەردەوامی پێ بدەین ، ئامادە بو بەو هەمو كبریایەوە تەكلیف لە ئەم و ئەو بكات بەڵام ، ئامادە نەبو بستێكی گردەكە بفرۆشێ .

نمونەیەكی زیندووتر :
كە بوم بە مودیری كەی ئێن ئێن ئەمویست ستۆدێۆیەك لە تەنیشت بینای ئێستای كەی ئێن ئێن دروست بكەین ، پێویستی بە موافەقەی كاك نەوشیروان بو ، بەیانیەك باسەكەم لەگەڵ كردەوە گوتی ، دەبێ چەندین سنەوبەر ببریتەوە ، نابێت لێی گەڕێ ، تۆزێ ئیلحاحم كرد كە زەرورین، گوتی وازی لێبینە ئەو گردە هیی من نیە تا بە ئارەزوی خۆم داری ببڕمەوە و چیم بوێ تیای بكەم ، ئەوە ئەمانەتە و رۆژێ دێت دەبێ كەی ئێن ئێنەكەشتان ببەنە دەرەوەی ئەم گردە ، ئەوە موڵكی گشتیە ، تایبەت نیە .

كە بەیاننامەكەی ۲۹ی۱ی ۲٠۱۱ی نوسیی ، ناردی بەشوێنما ، كە چوم بەیاننامە حەوت خاڵیەكەی خستە بەردەمم وتی رات چیە ، خۆت ئامادە بكە بۆ بەرنامەیەكی روبەرو لەسەری ؟ ، وتم بەیانەكە زۆر باشە ، و زۆریش پوختە ( بە چاپكراوی یەك ئەی فۆڕ بو) ، پێكەنی وتی ؛ بمدایەتە دەست فڵان و فڵان ( دو ناوی هێنا پێم باش نیە بیان نوسم ) بۆ ئەو حەوت خاڵە حەوت لاپەرەیان ئەنوسی ، پرسیاری كرد ئایا دەتوانین لە ئیعلام دیفاعی لێ بكەین و حەملەی بۆ بكەین ؟، وتم ؛بەڵی ،بەڵام گرفتێك هەیە ، وتی چیە ؟ وتم خاڵیكیان باسی دەستبەجێ گێرانەوەی مولك و ماڵی گشتی دەكات ، ئێمەش ئەم گردەمان لایە و باسیی دەكەن ، وتیی هەر زۆر باشە با باسی بكەن ئێمە ئینكاری ناكەین كە ئەم گردە مولك و ماڵی گشتی نیە ، هەر كات ئامادەبون ئەو موڵك و ماڵ و زەویانە بگێرنەوە بۆ حكومەت و دڵنیابوین داگیری ناكەن پێش هەمو كەس گردەكە دەگێرینەوە.

كاك نەوشیروان لەگەڵ نەخۆشكەوتنیی كەوت بەسەر ململانێیەكی سەختدا لەگەڵ پارتیی ، پاشان سەرقاڵی زۆری بۆ دروستبو بە رێكەوتن لەگەڵ یەكێتی ئەگەر نا بریاری هەبو ئیستیقالە بدات لە رێكخەری گشتی ، هەر بۆ مێژو كە سەفەری یەكەمجاری ئەڵمانیای كرد ئیستیقالەكەی نوسی بو لە لاپتۆپەكەیدا بو دەیویست تەفەروغ بكات بۆ ئەوەی زۆر شت یەكلا بكاتەوە بەڵام خۆپیشاندانەكانی ئەوێ رۆژێ كە بۆ بزركردنی كێشەی سەرۆكی هەرێم پارتی و یەكێتی گۆرانیان تۆمەتبار كرد و كودەتاكەی پارتی لە حكومەتدا و گێرانەوەی سەرۆكی پەرلەمان وایكرد كاك نەوشیروان ئیستیقالەكەی دوا بخات ( ئەمەی لە زیاد لە جارێك لە مەجلسی جیا جیا بۆ باسكردوین).

موڵكی خەڵكن نەك حزب؛
دەبێ خەڵكی هەرێم ؛ هاوینە هەوارەكانی سەری رەش و دوكان و قەلاچوالان و دەباشان بە موڵكی حزب و بنەمالەكان نەزانێت ، دەبێ دامێنی گۆیژە بە هی بازرگانێك نەزانێت ، بیگومان دەبێت گردی زەرگەتەش بە هی گۆڕان یا هیچ كەسێك نەزانێت .

گردەكانی سلێمانی :

هەمو ئەو گردانەی لە سلێمانی هەن وەك (سی) شارەكە وان بۆ هەناسەدان، هەوای شار پاك دەكەنەوە لە تەپوتۆز ، نابێ ئاسان دەستبەردایان بین بۆ هیچ كەس و لایەنێك و دەبێ بگەرێندرێنەوە بۆ خەڵكی شارەكە ، سلێمانی لەهەرچی حزب هەیە گرنگترە ، حزب وەسیلەی خزمەتی شارەكەیە ، خوا ئەزانێ گۆڕان وەك حزب سبەی چی بەسەر دێت بەڵام سلێمانی دەمێنێت ، ئەوەی ئەصڵ و نەگۆڕە شارە، ئەوەی گۆڕاو نا جێگیرە حزبە، گۆڕان وەسیلەیە ، خزمەتی شار و خەلك و ژینگەكەی ئامانجە.

بەڵام سەیرە لەوەدایە هەمو ئەو گردانەی داگیركراون و كراونەتە ماڵ و تەلاری شەخصی و ئیشی تایبەتیان تیا ئەكرێ ودابەش ئەكرێن بەسەر دەستوپێوەندی بەرپرساندا وخانویان تێدا دروستدەكرێن و شوێنی نیشتەجێبونی خێزانین ، كەس باسیان ناكات بەڵام گردی زەرگەتە كە سەرچاوەی سەرهەڵدانی بزوتنەوەیەكە بۆ گۆرانكاری لە بەرژەوەندی گشتی و بستێكی نەفرۆشراوە هەمو باسی دەكەن .

بە رای من لە رێكخەری گشتیەوە بۆ كورەكانی كاك نەوشیروان بۆ هەمو هەڵسوراوێك دەبێت بڵێن؛

(( ئەم گردە هی خەڵكە ، مولكی گشتیە ، مولكی كەس نیە ، هەر كات نیزامێكی سیاسیی عادل هاتە سەر حوكم دەگەرێندرێتەوە و تا ئەو كاتەش بۆ بەرژەوەندی شەخصی بەكار ناهێنرێت و نافرۆشرێت و مامەلەی پێوە ناكرێت ))، تایبەت زۆر گرنگە كوڕەكانی كاك نەوشیروان خۆیان ئەوانە هەمو بڵێن چونكە دەیانجار لێم بیستون كە ئەوان ئەو گردە بە موڵكی گشتی دەزانن و هەر لە بەرژەوەندی گشتیشا بەكار دەهێنن نەك بۆ بەرژەوەندی شەخصیی، كاتیەتی ئەو كورانە كە ئێستا موئامەرە دژی مێژوی باوكیان و خۆیان وەك تەون دەچنرێت قسە بكەن و بێنە بەردەم رایگشتی و بارتەقای ئەوەش پەروەردە و هۆشیاریان هەیە زۆر كەس و لایەنی ناحەز بە كاك نەوشیروان و گۆڕان دەمكوت بكەن.

خۆئەگەر كورەكانی نەوشیروان مستەفا مەبەستیان بێت تیجارەت بكەن ، پێویستیان بە گردەكە و بزوتنەوەی گۆڕان نیە و تەنها ناوی باوكیان بەسە بۆ ئەوەی بەكاری بهێنن و بڕۆنە پاڵ سیستمە عائیلیە چەتەگەرەكە بەڵام ئەوەیان نەكردوە و وەك هەڵسوراوێكی گۆڕان شانیان داوەتە بەر سەرخستنی گۆڕان .

هەن داوادەكەن گردەكە بدرێتە گۆڕان و خۆشیان بە سەربەخۆ و موفەكیر و یەكسانخواز دەزانن، جێگەی پرسیارێكی گەورەیە؛

هەن خۆیان بە دڵسۆزی گۆڕان دەزانن ، هەن خۆیان بە رۆشنبیری بێلایەن دەزانن كەچیی كە دێن دژی كێشەی ئەم گردە دەنوسن لەبری ئەوەی بڵێن ئەم گردە موڵكی گشتیە ، دەڵێن با كورەكان بیكەن بەناوی گۆڕانەوە ، واتا بدریتە حزب ! بە چ حەقێك ئەمە بكرێ ؟

یەك پرسیار لە هەمو ئەو بێلایەن و خەلكە دەكەم تایبەت ئەوانەی دڵسۆزانە ئەنوسن ، ئەگەر كاك نەوشیروان لە ژیانی خۆیدا گردەكەی بكردایە بە ناوی گۆڕانەوە هەمو نەتان دەگوت مولكی گشتی داوەتە حزب ؟!

پاشان مەگەر مۆڵەتی حزبیش بەناوی گروپێك كەسی كەمەوە نیە و دواجار ئەوانیش بەشەر نین وەك كورەكانی كاكە ، ئەگەر ئەو گردە نەگەرێتەوە بۆ میری وەك موڵكی گشتی مامەلەی لەگەڵدا نەكرێت لەسەر هەر كەسێك بێت لای من وەك یەكە وحەق نیە بەناوی دڵسۆزی بۆ گۆران وا بكەن گۆڕان ببێتە داگیركەری موڵكی گشتی.

پێویستە داوا بكەن گردەكان لە حزبەكان بسەنرێنەوە نەك بخرێنە سەریان.

گومانم نیە ئەو حەملەیەی لەسەر ئەو گردەیە بەشێكی ئەكید لە دڵسۆزیەوە بۆ گۆڕان بەڵام بەشێكی زۆریشی كاری دەزگا جاسوسیەكانە و ئیرەییە بە پێگەی نەوشیروان مستەفا لەدڵی خەلكدا دەیانەوێ ناوی بزڕێنن ، ئەو ئەگەر لەوە بوایە مولكی گشتی داگیر بكات و مولك بۆ كورەكانی جێبهێڵێت دەیتوانی لەسەر حسابی دوركەوتنەوەی لە خەمی خەلك كوێی بویستایە بیخاتە سەرخۆی وكوڕەكانی نەك هەر لە سلێمانی بەڵكو لە هەمو كوردستان و دەرەوەش .

جا بەرێزان لە دیدی كاك نەوشیرواندا ئەو گردە مولكی گشتی و مولكی شاری سلێمانی و خەلكەكەیەتی نەك هی كوڕەكانی نەك هی گۆڕان، كێ دەڵێ وا نیە ، دەتوانین لە دیبەیتێكی میدیایدا روبەرو ببینەوە .

جیا لە هەمو ئەو وردەكاریانە ؛ گۆڕان هاتوە بۆ ئازادكردنیی موڵك و ماڵی گشتی نەك داگیركردنیی بۆیە من لەهەر جێگە و شوێنی لێم بپرسن دەڵیم ئەم گردە نە هی گۆڕانە نە هی كورەكانی كاك نەوشیروانە بەڵكو موڵكی شارەكەیە، هەروەك چۆن قەت بێئومێد نیم لەوەی دەباشان و سەری رەش و دامێنی ئەزمڕ و گردی محافز و گردەكانی تری ناو شار و هەمو ئەو زەویانەی داگیركراون بە هەر ناو و پاساوێكەوە بێت بەشێكن لە نیشتیمانی ئێمە و موڵكی ئەوانە نین كە تیایدا نیشتەجێن و دەبێ رۆژێك بیانگەرێننەوە و لێیان بسەنرێتەوە .

جا ئەو رۆژە كەیە؟ نازانم بەڵام درەنگ یا زو هەر دێت و بزوتنەوەی گۆڕانیش بۆ هێنانەدی ئەو رۆژە خەبات دەكات .

هۆشیار عەبدوڵا

ئەم وتارە دەربڕی بۆچونی نووسەر خۆیەتی