ئومێدو نائومێدی بە ڕەقەم

ئومێدو نائومێدی بە ڕەقەم

په‌یكه‌ر عوسمان


387 جار خوێندراوه‌ته‌وه

- گریمان هەموو شتێك بە زۆرینەی پەرلەمانی ئەگۆڕێت، دەی پەرلەمانی ئێمە ١١١ کورسییە، هەڵبژاردنی داهاتوو بۆی هەیە 'بەنزیکەیی' ٤٠ کورسی بدا بە پارتی و ٢٠ کورسی بدا بە یەکێتی. هەر ئەمە ٦٠و نیوە زیاتر! 
١١ کورسی کۆتاش هی خۆیانە، ئەوە ٧١
نەوەی نوێش لە دیدی موعارەزەوە پاشکۆی دەسەڵاتە، ئەگەر ئەمە ڕاستبێ و کورسیەکانی بەغدای بۆ بکەین بە کورسی هەرێم، نزیکی ٩کورسییە، یەعنی مەجموع ٨٠ کورسی.

- کاکە هەشتا نیەو حەفتایە، کورە با شەست بێت، دەی هەر ئەونە بەسە بۆ ئەوەی هەموو شتێك وەکو خۆی بمێنێتەوە. ئومێدیش لەسەر ئەگەری گۆڕانێك هەڵئەچنرێ، پرۆسەیەك کە لەوسەرەوە نەگۆڕانێکت بداتێ، بۆچی لەمسەرەوە جێ ی ئومێد بێت؟

- ئەمێنێتەوە ٣١کورسیی بۆ چوار هێزەکە، ئێ باشە ئەم هێزانە قەرارە مونافەسەی زۆرینە لەگەڵ پارتی و یەکێتی بکەن، یان مونافەسەی ٣١کورسی لەنێوان خۆیان؟ ئەمەی نێوان خۆیان چ پەیوەندییەکی بە ئومێدو گۆرانکارییەوە هەیە؟

- عادەتەن موعارەزە ئەچێتە هەڵبژاردنەوە بۆ ئەوەی نیوە زیاتر بهێنێ و دەسەڵات وەرگرێ. یان بۆ ئەوەی دەسەڵات نیوە کەمتر بهێنێ و نەتوانێ بە تەنیا حکومەت تەشکیل بکاتەوە. دەی موعارەزەی ئێمە لەم هەڵبژاردنەدا هیچکام لەو دوو ئامانجە ڕەقەمییە ناپێكێ.

- ڕەنگە بڵێ ی ئەم چەن کورسییە لە هیچ باشترەو ئەگەرنا جەماعەت ١١١ قەپات ئەکەن. بەڵێ وایە، بەڵام ئەوکات لەبری ئەوەی لەناو فەلەکێکا دیکۆر بیت، لە دەرەوە فەلەکێکی تر دروست ئەکەیت، لێرەشەوە ختوکەی ئومێدی گشتی ئەدەیت و لە شوێنێکی ترەوە تروسکایی هیوایەك دائەگیرسێنیت.

- بەربەستی بەردەم هێزەکانی موعارەزە بۆ کاری پێکەوەیی، ئەوەیە کە حەجمی خۆیان نازانن، ئەمەش گەمژەییە، چونکە کێشەی ئەوان ئەوەنیە کە لەناو سی چل کورسیدا حەجمی هەر یەکەیان چەنێکە. کێشەکە ئەوە کە حەجمی "هەموویان پێکەوە" ئەونەیە یان ڕاستتر (ئەونەی بۆ دانراوە) ئەوەش بەشی گۆڕانکاری و ئومێدی سیاسی ناکات!

- هەڵبژاردن کاتێ جێ ی ئومێدە کە مونافەسە لەسەر هەموو کورسییەکان بێت، لێرەدا دوو کورسیش بێنیت کێشەنیە، چونکە ئەو دووە ڕێگایە بەرەو زیاتر. بەڵام مونافەسە کە تەنیا لەسەر ٤٠ کورسی بێت، هەر چلیشی بهێنیت هەر نائومێدییە، چونکە ئەو چلە سنورێکە بۆ وەستان!

- ئێمە ئەڵێین بایکۆت بکەن. ئێوە ئەڵێن ئەی ئەگەر هەڵبژاردن نەکەین چیبکەین؟ هەر ئەم جوابە یەعنی ئێوە لە ناچاریدا هەڵبژاردن ئەکەن، نەك لە ئومێدەواریدا! ناچارییش خودی نائومێدییە، ئیتر بۆ شتەکەمان بە ئومێد پێئەفرۆشنەوە؟

- ئامانجی من ئەوەنیە تۆ نائومێد بکەم، چونکە خۆم نائومێد نیم، ئەسڵەن زۆر گەشبینم بەوەی کە ئیتر خۆمان لە هیوای درۆیینە بتەکێنین و بەمەش هیوای ڕاستەقینە لەدایك ببێت.

- ئومێد ڕاستگۆییە، خۆهەڵخەڵەتاندن و ئەو هەڵخەڵەتاندن ئومێدی درۆیینەیە، ئومێدی درۆیینەش خراپترین فۆڕمی نائومێدییەو بەربەستی نێوان ئێمەو ئومێدی ڕاستەقینەیە.

- دەساودەس لەگەڵ چەکدا ناکرێت. جەبرێکی دەرەکی هاوکێشەیەکی دروستکردوە بە هەڵبژاردن دەسکاری ناکرێ، هەر بە جەبرێکی هاوشێوە دەسکاری ئەکرێ. 
تا ئەو کاتە لە دەرەوەی پرۆسەکە خۆتان گەورەبکەن، باشترە لەوەی لەناوەوە بەردەوام بچوك ببنەوە.

- ئەم یارییە گاڵتییەی ئێستا پڕبەپێستی هێزێکی گاڵتییە، بەجێ ی بێڵن بۆ نەوەی نوێ و خۆتان ڕێکخەنەوە بۆ یارییەکی ڕاستی!

- وەکو کولتوری دیموکراسی با هەڵبژاردن لە کاتی خۆیدا بکرێ، بەڵام وەکو کولتوری دیموکراسیش بایکۆتی بکەن، با لە ئەداتی ستەمکارییەوە ببێتەوە بە ئەداتی دیموکراسی.

 

پەیكەر عوسمان



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved