لەبری گۆڕان چی؟

10/08/2018

لەتیف فاتیح فەرەج

بزوتنەوەی گۆڕان بۆ چاكسازی و گۆڕانكاری و دژی گەندەڵی و نادادی دروست بوو ، ئەم بزوتنەوەیە دەستە بژێرێكی سیاسی نێو یەكێتی نیشتمانی كوردستان ، كە لە هەرە چالاك و دیارەكان بوون ، بە هاوكاری هەزاران گەنجی خۆبەش و خەڵكانی دیكە كەوتە سەرپێ و ئومێدێكی گەورەی گۆڕانكاری و هەستانەوە ی بە خەڵك بە خشی ، تا نەوشیروان مستەفاو هاوڕێكانی ئەوانەی لە نێو یەكێتی نیشتمانی هاتنە دەرەوە بڕیاری ئەم گۆڕانكاری و هەنگاوەیان نەدا ، هیچ هێزێكی دیكە بە رادەی ئەوان توانای ئۆپۆزسیۆن بوون و شڵەقانی گۆمەكەی نەبوو ، ئەم بزوتنەوە سیاسیە بە شێكی بەرهەمی  نزیكەی دوو دەیە لە رەخنە گرتن  بوو لە دەسەڵاتی كوردی ، رەخنە گرتنەكە سەرەتا لە چوار چێوەی نووسین و رەخنەی بەردەوامی نێو گۆڤارو رۆژنامەكانەوە دەركەوت ، ئەوە جگە لە خۆپیشاندان و هەڵوێست وەرگرتن ،لە كاتێكا ئەم ناڕەزایەتیانە هەر لە ساڵی یەكەمی خۆدەسەڵاتی كوردیەوە هەبوو ، بەڵام چەترو كۆكەرەوە نەبوو ، بزوتنەوەی گۆڕان ئەو چەترو كۆكەرەوەیە بوو .

ئەم بزوتنەوەیە نەك هەر هەوادارو هەڵسوڕاوەكانی خۆی ، تەنانەت خەڵكانی ناڕازی و ستەملێكراوی نێو یەكێتی و پارتیش كە زۆرینەی ڕەهان ئومێدی زۆریان پێیبوو ، من شاهیدی قسەی سەدان كادیرو دەیان  سەركردەی یەكێتی و پارتیم لەو بارەیەوە.

ئەوەمان لە بیر نەچێت پێویستی بوون و بەهێزبوون و بەردەوام بوونی ئەم بزووتنەوەیە هێشتا وەك خۆیەتی و ناكرێت ئەوە نادیدە بكەین ، ناكرێت بڵێین ئیتر تەواو بێ ئەوەی بزانین ئاخۆ ئایندە چۆن دەبێت ، لە راستیدا بزوتنەوەی گۆڕان پێویستی زۆری بە رەخنە لێگرتن و هەڵسەنگاندنە ، ئەو هێزە پێویستی بە چوار چێوەیەكی فكریە دژی گەندەڵی و نادادی و ستەمكاری ،یانی دەكرێت فەلسەفەی ئازادی و یەكسانی ئینسانەكان بكەتە سەرمەشقی كاركردنی و لەو چوار چێوەیەدا بیرو بۆچوونی خۆی بنووسێتەوە ، هەروەك چۆن لە بەرنامەكانی هەڵبژاردنیشدا بەردەوام پێداگریان لە سەر دەكات ، ئێستا ئەم بزوتنەوەیە لە بەر دەم بارو دۆخێكی ناجۆرو خراپدایە ، كێشەی ناوخۆی هەیە ، گرفتی نەزانینی پەیوەندی لە گەڵ ئەوانی تری هەیە ، كێشەی دروستنەكردنی هاوپەیمانی هەیە ، توانای كرانەوەو پەیوەندی بەستنی لە تەك ئەوانی تردا زۆر سست و لاوازە ، كێشەی میدیاو شێوازی كاركردنی میدیایی هەیە ، قسە كردن لە سەر ئەم كێشەو گرفتانە لە خزمەتی گۆڕاندایە نەك لە دژی ، كێشەیەكی گەورەی ئەم بزوتنەوەیە ئەوەیە حەزێكی سەركەشانەو نەخۆشیەكی سیاسیانە بە سەریدا زاڵە بەو مانایەی خۆی پێ لە هەمووان باشترو بە توانا ترە ، پێی وایە ئەوانەی باسی كێشەو گرفتەكانی دەكەن دوژمنین نەك دۆست ، لەم نووسینە كورتەدا دەمەوێ لە سەر یەك دوو خاڵ بوەستم بەو ئومێدەی لە نێو بزوتنەوەی گۆڕان و جیڤاتەكانیدا كەسانێك گوێی لێبگرن و هەڵوەستەی لە سەر بكەن ، قسە كردن لە سەر ئەم خاڵانە بۆ گفت و گۆو بە خۆدا چوونەوەیە :

گۆڕان و هاوپەیمانی :
مەبەستم لە هاوپەیمانی بزوتنەوە سیاسیەتازەكەی دكتۆر بەرهەم و هاوڕێكانێتی ، لە راستیدا هیچ جیاوازیەكی ئەوتۆ لە نێوان ئەم دوو بزوتنەوە سیاسیەدا نیە ، تەنانەت لە پرسی دژایەتی نادادی و ستەمكاریدا یەكن ، من ئێستاش لەوە ناگەم بۆ دەبێت ئەمانە بە یەكە نەبن ، دوو لایەنن بانگەشەی دیموكراتی و یەكسانی و دادگەری دەكەن ، خواستیان بە گژا چوونەوەی گەندەڵی و نادادیە ، دەیانەوێت ببنە ئەڵتەرناتیفی پارتی و یەكێتی ، جیاوازیەكی ئەو تۆیان لە نێواندا نیە ، دەتوانن بە یەكەوە بە هێز تر دەربكەون ، دەبنە كۆكەرەوەی دەنگەپرش و بڵاوەكان ، دەتوانن ئومێد لای خەڵكی نائومێد دروست بكەن ، بڕوام وایە بە یەكەوە بوونی ئەمان دەبێتە هۆیەك بۆ ئەوەی خەڵك زیاتر بە دەم دەنگدانەوە بڕۆن ، هەڵبەت ئەوە راست نیە كە پارتی و یەكێتی بە یەكەوەو بە كۆتاكان دەگەنە 60 -70 كورسی ، كاتێك ئەوە راستە كە كەمترین خەڵك بڕوات بۆ دەنگدان ، ئەگەر رێژەی بەشدار بگاتە سەروو 80%ەوە ئەوە كورسیەكانی پارتی و یەكێتی لە بری زیاد بكەن كەم دەكەن ، ئیشكردن لە سەر نائومێدی و نا ئومێد كردن بریتیە لە پەشیوان كردنەوەی خەڵك ، باشە ئایە جگە لە هەڵبژاردن رێگەیەكی دروستتر هەیە بۆ بەگژاچونەوەی نادادی ، لە هەڵبژاردنەكانی رابردوودا بەردەوام پارتی و یەكێتی كەمیان كردووە نەك زیاد ، هەڵبەت بە دوا هەڵبژاردنیشەوە .

گۆڕان ویەكێتی : 
سیاسەت بریتی نیە لە رق و بوغزو كینەو كوشت و بڕو شكاندن ، سیاسەت بۆ ئێستا هونەری پەیوەندی ئاشتیانەیە لە تەك ئەوانی تردا ، گۆڕان و یەكێتی هەم لەو سنورەی تێیدا بەریەككەوتنیان زۆرە ، هەم لە سنوری بادینان و ئەو شوێنانەی رێژەیەكی كەمن ، دەتوانن هەنگاوی باش بنەن بۆ بەیەكەوە بوون ، ما ئەوە خەونی نەوشیروان مستەفاو جەلال تاڵەبانی نەبوو ، لە رێكەوتنی دەباشاندا ، كێ دەڵێ تەقەكەرەكانی سەر گردی زەرگەتەنیازی راستەوخۆیان بە ئامانجگرتنی ئەو رێكەوتنە نەبووە و ، كێ دەڵێت ئەوەی پێی كردوون ئامانحجی سەرەكی ئەوە نەبووە بۆ ئەوەی دوای كۆچی تاڵەبانی و نەشیروان مستەفا خەونەكەیان لە بار نەبات، چۆن بزوتنەوەی گۆڕان دەكرێت لە تەك هاوپەیمانیدا گرێبەندی سیاسی و پێكەوەیی ببەستێ تا ئاستی یەكبوون ، ئەمە بۆ نێوان گۆڕان و یەكێتیش هەروایە لە دۆخێكدا ئەگەر بزوتنەوەی گۆڕان ، هاوپەیمانی ، هەروەها یەكێتی پێكەوە بن و بتوانن ئومێد بگێڕنەوە بۆ هاوڵاتی كورد دەتوانن زیاتر لە 50 كورسی بێنن ، گۆڕانكاری بە هێزو كوتلەی گەورە دەكرێت نەك بە كوتلەی پرش و بڵاوی بچوك بچوك .

گۆڕان و ئۆپۆزسیۆن : 
گۆڕان جگە لە توانستی پەیوەندی بەستن لە تەك یەكێتی و هاوپەیمانیدا كە جیاوازی فكری و ئایدۆلۆژی ئەو تۆیان نیە ، دەتوانێت پەیوەندیەكی توند لە نێوان خۆی و كۆمەڵ و یەكگرتوودا بە سەلامەتی بهێڵێتەوە ، ئەو لایەنە ئیسلامیە كوردیە ، ئەگەر رێگری و تەزویریان لێنەكرێت و كادیرو ئەندامانیان نەكەونە بەر هەڕەشەو شتی تر و بە یاسای بەرەنگار بوونەوەی تیرۆر نەترسێنرێن ،لە 15 بۆ 18 كورسی دەهێنن ، باشە گریمان 15 كورسی دێنن ، گریمان بە سێ لایەنەكەی سەرەوەش 50 كورسی دێنن ، كەواتە بەیەكەوە دەتوانن 65 كورسی بێنن ، ئاخۆ ئەمە كەمینەیە یان زۆرینە ، ئاخۆ ئەو كاتە ئەو لایەنانە ئەگەر دەسەڵات پێكبێنن و حكومەت دروست بكەن لەمپەرەكان چین ،یان ئەگەر ئۆپۆزسیۆن بن چیان پێناكرێت ، بە مەرجێك بە سیاسەت و كەمو كوڕی و كێماسی رابردوویاندا بچنەوە .

لە راستیدا لەم وتارەدا بە ئامانج رووی قسەم لە گۆڕان بووە ، دەنا پرسەكە پەیوەستە بە كۆی لایەنەكانی ترەوە، هەڵبەت هەر لە دۆخی ئاواشدا ئەو كەڵكەڵەی بۆ هەمیشە دەسەڵاتداریە لە هزری پارتی دیموكراتی كوردستان دەردەهێنرێت و دەكرێت هەنگاو هەنگاو جۆرێك لە دەستاو دەستكردنی دەسەڵات دروست بكرێت ، نەك ئەوەی ئێستا هەموو دەسەڵات و حوكمڕانی لە دەستی پارتیدایەو ئەوانی تر هیچ نین ، بە یەكێتی نیشتمانی كوردستانیشەوە كە هەموو ئەندام و لایەنگرەكانی گلەیی پارتی بوونی لێدەكەن.

لەتیف فاتیح فەرەج 

ئەم وتارە دەربڕی بۆچونی نووسەر خۆیەتی

بەپەلە