هەفتەی ڕابردوو لە ڤیەننا ژنێكی كورد بە دەستی كوڕێكی كورد بەرچەقۆ درا و كوژرا ،سەرباری ئەوەی هەردووكیانم لە دوورەوە دەناسی ، بەڵام بەو كارەساتە ئێجگار ناڕەحەت بوم.
لەسەر ئەم ڕووداوە تراژیدیایە لە تۆڕەكۆمەڵایەتیەكان زۆر بابەت وكۆمێنت نووسران ، كە ئاماژەبون بە دەربڕینی بڕێك لە تووڕەبون ، سەركۆنەكردن، نائومێدی ، هەڵچون ،سۆز ، هەستبرینداری و هاوخەمی .
سەرەتا نەموویست لەبارەیەوە بنووسم ، پاش ئەوەی دڵنیابوم لایەنێكی گرنگ لەسەر مۆتیڤی ئەم ڕووداوە بەهەندوەرنەگیرا و باسێكی ئەوتۆی لەبارەوە نەكرا ، بە پێوویستم زانی بە چەند دێڕێك ئاماژەی پێبكەم .
كوشتن یان هەوڵی كوشتن بەهەر پاساوێك بێت نامرۆیی و پێشێلكاریه ، بەشێكە لەدڕندەیی مرۆڤ ، دوورە لە ڕێزگرتن لە ئازادی تاك و جیاوازیەكان ، هەروەها بنپێ خستنی یاساشە، چون جگە لە یاسای جەنگەڵستانی بكەرانی تاوان هیچ یاسایەك یان دەقێك لەئارادا نین ماف بداتە كەسێك یان ڕەگەزێك تا مافی ژیان لەبەرامبەر بە ئامانجی سڕینەوە ، بسێنێتەوە.
لەو باوەڕەدام مرۆڤ وەك تاوانبار لە دایك نابێت تا دواتر لەگەڵ گەورەبونی جەستەیدا تاوانی گەورە ئەنجام بدات ، بەڵكو ئەوە لایەنە پەروەردەیی و دەروونی و كۆمەڵایەتیەكانن ، هەروەها گرفتی دارایی و سیاسی و تووندەڕوێتی ئایینین كە دەبنە پاڵنەر .
هەموو تاوانبارێك سەرەتا خودی خۆی قوربانیە ، قوربانی ژینگەی ناتەندرووستی سیاسی ، نەتەوەیی ، ئایینی ، پەروەردەیی ، كۆمەڵایەتی ، خێزانی ، سایكۆلۆژی و.... تاد ، كە لە ئەگەری نەگرتنەبەری بەدواداچون و چاودێری و چارەسەری درووستدا دەشێت لە فۆرمی خەمۆكی و ئاڵودەبون و تووندوتیژیدا ڕەنگبداتەوە و دواجار حاڵەتی تراژیدیای وەك ئەمەی ڤیەننایان لێبكەوێتەوە .
ئەم چەند دێڕەی سەرەوەم بۆ داكۆكیكردن نەبون لە كردەی تاوان، یاخود بەرگری لە ئامڕازەكانی تووندوتیژی و كوشتن ،بەڵكو بڕابونمە بەهەبونی هەموو ئەو كێشە زۆرو تاوانە زەق و نامرۆیانەی لە كۆمەڵگەی كوردی و تاراوگەدا بێ چارەسەری بنەڕەتی ئامادەن ، كەڵەكەبون ، ڕاستە ڕاماندەچڵەكێنن ، بەڵام تەنها بۆ ماوەیەكی كاتیی ، دوایی لەبیر خۆمانیان دەبەینەوە .
گەورەترین گرفتی جەوهەری كۆمەڵگەی ئێمە ئەوەیە زیاتر لە سەر ئەنجام دەدوێت وكاردانەوەی خێرای هەیە ، لەبری ئەوەی بە هۆكارەسەركیەكانیەوە سەرقاڵ بێت و كاراكتەرێكی چاكخواز بێت بۆ ڕێگەلێگرتنیان .
بە كورتیەكەی با تەنها لەبەر تاوانەكانی ڕابردوو خەم دامان نەگرێت ، بەڵكو با پێشوەخت خەمێك یان مشورێك لە قوربانیەكانی ئەمڕۆ و تاوانبارەكانی سبەی بخۆین ، پێش ڕوودانی دیی چاوەڕوانكراو ، چون ئەوانە تاكی كۆمەڵگەی ئێمەن ، جا لێمان دووربن یان نزیك.
دانا سەعدی
ئەم وتارە دەربڕی بۆچونی نووسەر خۆیەتی