1
نامەوێ باسی ئەوە بكەم لایەنی ئەرێنی و نەرێنی ئەو پیاوە چی بوون ، من پێشتر نامیلكەیەكم لەسەری نووسیوە بە ناو نیشانی " تاڵەبانی و دەوڵەتی كوردی " سەرلەبەری وتارەكانیش رەخنەیە لە دیدی ئەو بۆ دەوڵەتی كوردی ، بەڵام دوای یەكساڵ لە مردنی ئەگەر ئاگایانە سەیری كوردستان بكەین ، دەبینین تولەرانس لە پاشە كشەیەكی گەورەدایە ، لە گەڵ مەرگی ئەودا حزبە ركابەرە دێرینەكەی كە ماوەیەكی زۆر بوو رێكەوتنی ستراتیژیان پێكەوە هەبوو ، رێكەوتنەكەی هەڵوەشاندەوە و دەرگای بەڕووی مەكتەب سیاسی و سەركردایەتیەكانیدا كردەوەو بۆ ئەو مەبەستە پارەو ئیمتیازی هەڵڕشت ، لە رۆژی مردنی ئەوەوە بارزانی نەك نەیتوانی بۆشای نەبوونی ئەو پڕبكاتەوە بگرە سنوری زۆنەكەی ئەوی بە ناوچەی ئیڕهابی فكر لە قەڵەم دا .
2
تاڵەبانی لە دوای خۆی یەكێتیەكی پرش و بڵاو بێ سەرو بەرەی سپاردە كەسانێك كە تا ئێستا ناتوانن كۆی بكەنەوە ، رۆژ نیە لە سەری سەرەوە دەیان وتەو قسەی جیاواز نەبیسین كە نیشانەی ئازادی بیرو ڕا نیەو نیشانەی رقە لە یەكتر ، لە راستیدا یەكێتی ئێستا بە دەست گروپێكی نەخۆشەوەیە كە ناتوانن نە خۆیان چاكبكەن ، نەیەكێتی ئەمەش بواری تەراتێنی ركابەرە تەقلیدیەكەی یەكێتی فراوانتر كردووە ، ئەوە بۆیە ئەمان بڵێن سیر ئەو دەڵێت پیازو دواجاریش قسەی ئەوە "ریفراندۆم وەك نمونە".
3
تاڵەبانی ساڵی 1957 لە تەك محەمەد مەهدی جەواهیریدا سەندیكای رۆژنامەنووسانی عێراقی دروستكردوەو خۆیشی ئەندام بووە تێیدا ، ئەمەش هۆیەك بوو بۆ ئەوەی تاڵەبانی هەمیشە گوێ لە رەخنەو سەرنج و تێبینیەكان بگرێت ، واتە هۆكاری رۆژنامەنووسیەكەی ، جگە لە پارێزەریش ،ئێستا كێ گوێ لە رەخنەو سەرنج دەگرێت ،كە رەخنە بگری جگە لەوەی هەرچی نەشیاوە بە خۆت و خانەوادەتی دەڵێن ،دواتریش دەڵێن هەڵدەپەڕی چدەكەی بكە .
4
ساڵێك دوای مەرگی تاڵەبانی هەقە ئەوە بە بیر خۆمان بێنینەوە ، ئەرێ گەلۆ ئەوانەی دەیانگوت دابەشكردنی پۆستەكان بە رێژەی 32%بۆ سێ لایەنە سەرەكیەكەی كەركوك خیانەت و نادادیە ، ئێستا كەركوك بە دەست كێوەیەو رێژەی كورد لە دام و دەزگاكانی كەركوك سەدا چەندە ، من قسەیەكم نیە بۆ وتن .
لەتیف فاتیح فەرەج
ئەم وتارە دەربڕی بۆچونی نووسەر خۆیەتی