بە رێكەوت نییە كەسانێك لە سیمایانا چەندین كەسی تر ببینی، یا كەسانێك تام و بۆی چەندین كەسی تر بدەن.. رێك بۆ كاك نەوشیروان ئەو قسەیەم لا بەرجەستە بوو كاتێ بەر لە دوو ساڵ و لەلەندەن چوومە سەردانی.
ئەوەی لەمێژووی بزوتنەوەی نوێی كودایەتیدا باسی تایبەتمەندیەكانی (كاك ئارام و د خالیید و عەلی عەسكەری و ئازاد هەورامی و خاڵە شیهاب) دەكەن لەودا بەدیمكرد، ئەو لەو لەندەنەوە هێشتا سیمای، سیمای چیاو رەنگی پێدەشتە هەڵقرچاوەكانی گەرمیان بوو.
لە پێش دروستبوونی گۆڕان چەندین جار لەگەڵی دانیشتووم، زۆربەی جارەكان لە قسەی من توڕە دەبوو، لەدوای هەشت ساڵ بینیمەوە كەسێك زۆر ئاگاداری درشتی مێژووی دورو ، هەرخۆیشی كارەكتەری پڕ زاكیرەی مێژووی نزیكی رووداوەكانی كوردستان بێ، بەهەموو خەسڵەتەوەو دوای ماوەیەك لە نەبینین بەو بینینە دەڵێن دیداری تایبەت.
پێم وت لەناو یەكێتیدا نەماندەوێرا سەیری ناوچاوت بكەین، بەڵام دەمبینی لەناو گۆڕان ئەو هەموو گەنجە لەسەرووی خۆتەوە دەبینران و لەباخچەكەدا دەردەكەوتن و باسیان دەكرد وامان بەكاك نەوشیروان وت و وا مناقەشەمان كرد، دەرفەتم بدە چەند باس و پرسیارێك بكەم، كە تەنیا پرسیاری خۆمن وتی هەرچی هەیە بڵێ و كاتمان هەیە.
لەسەر كەسایەتی چەندین كارەكتەری یەكێتی و دەرەوەی هەندێ قسەی كرد، كە من دەمویست رای ئەو بزانم باسكردن نییە لە ئێستادا،
باسی زیانە گەورەكانی شەڕی داعشی كرد كە پرۆسەی گۆڕانكاری لە كوردستانی عیراقدا بۆ چەندین ساڵ دواخست. ئەو پەشیمان نەبوو لە پشتگیریكردنی ئەو سەدان گەنجەی لە رێگەی پشتگیری ئەوەوە گەیشتنە ناوەندە سیاسیە باڵاو نیمچە باڵاكان. لەسەر شێوازی گێڕانەوەی ناوچە دابڕێنراوەكان خەمی گەورەی هەبوو باسی پرۆژەی دروستكردنی مزگەوتەنات و گوندی هاوچەرخی كرد لەو ناوچانەو بایەخدان بە كشتوكاڵیان و تەنانەت بە جۆرێك خۆیان بتوانن لەكاتی مەترسیدا خۆیان بتوانن دیفاع لەخۆیان بكەن و خۆ بپارێزن، نمونەی كوڵەجۆی هێنایەوە بۆ شوێنەكانی تریش هاوشێوە كە شەش سەد خانوو دروستكرا، وتی پرۆژەكەم داوە بەدوو كەسی تر بەڵام جێبەجێ نەكرا.
وتی یەكێتی هێشتا وزە گەورەكەی كادرەكانیەتی كادری گەنجی زۆر باشی تێدایە گەر دەرفەتیان بدرێتێ دەتوانن باشتر ئیدارەی بارودۆخەكە بدەن.
بۆ نیو سەعات رۆیشتین و زیاتر لە سەعاتێك و بیست دەقە دانیشتین، كتێبی ( بەرپرسیارێتی پەرلەمان لەناساندنی جینۆساید)م لەگەڵ دەستی خۆم بۆ برد.
سێ كوڕی گەنجم لەگەڵ بوو كە خوێندن كەسابەتی خۆیان لەوێ بوو. باسی ئەو هەموو گەنجە خوێندەوارەم بۆی كرد كە لەهەندەران هەن و حزبەكانی كوردستان ناتوانن باش رێكیان بخەن بە گۆڕانیشەوە، بەر لەو دیدارە بەهەفتەیەك لە كۆنفرانسێك بووم لەپەرلەمانی ئەوروپاو چەند گەنجێكی كوردی دانیشتووی ئەوروپام ناسی، هەروەها دوو رۆژ دواتر لە كۆنفرانسەكەی برۆكسل، لەپەرلەمانی بەریتانیا كۆڕێكم بۆ رێكخرابوو لەو كۆڕەشدا چەندین كەسی ترم بینی كە خوێندنیان لەوێ تەواو كربوو زۆر بەئاگاو زیتەڵ بوون.
ئەو پرسیاری كۆڕەكەو كۆنفرانسەكەشی لێ كردم دیاربوو ئاگاداربوو، جگەرەیەكی تری داگیرساند، گاڵۆكەیەكی لە لای دەستە چەپیەوە دانرابوو، چاوی تۆزێ ئاوی دەكردو زوو زوو بە دەستەسڕەكەی دەستی دەیسڕی، سەرەتای نەخۆشیەكەی بەلاوازبوونی جەستەیەوە دەركەوتبوو، بەڵام پڕ ورەو زاكیرەی زۆر باش بوو، سیحری گەورەی ئەو پیاوە سادەییەكەی خاكێتیە نەگۆڕەكەی بوو،
ساڵی ۲٠٠٤ كە باوكم مرد ئەو لەگەڵ (عادل شكورو ئاواتی شێخ جەناب و مەحمو بیكەیسی) هات سەری لێمان دا لەماڵەوە لەكەلار.
كاك نەوشیرون هەقی بەسەرمانەوە هەبوو، هەقی بەسەر زۆر كەسی ئەم كوردستانە هەبوو،
قسەیەك كە دەشێ بیكەم و ئەشێ نەشی كەم بەڵام لە باسی كاك نەوشیرواندا هەمیشە مام جەلال ئامادەیی هەیە،
وەك چۆن لە باسی زۆر وێستگەی ژیانی مام جەلال كاك نەوشیروانیش نزیكترینە.
ئەو وتی چۆن لەگەڵ ئەم حەركەتە نه هاتی وتم كاك نەوشیروان لەنێوان (تۆو مامجەلال)دا، مام جەلالم هەڵبژارد. بزیەكی كردو لە قسەكانمان بەردەوام بووین. لە رۆیشتن و ماڵئاوایی كردنا تا دەرەوە هات لەگەڵمان تا رۆیشتینیش و بەڕێكردنمان لەلایەن كاك نماوە ئەو هەر لەبەر دەرگاكە وەستابوو. كەسێك من بناسێ دەزانێ هەرگیز ریاییم بۆ كەس نەكردوە. بەڵام بەماناو پێوەرەكانی سەركردە، نەوشیروان مستەفا سەركردەی راستەقینەبوو. كورد لە ئێستادا لەشكرێك بەناو سەركردەی هەیە، بەڵام لەهەموو كاتێ زیاتر بێسەرترینە..
سالار مەحمود
ئەم وتارە دەربڕی بۆچونی نووسەر خۆیەتی