دانیشتوانی شنگال مافی خۆیانە رێگری لەو ستافە ئیدارییە بە زۆر سەپێندراوە بكەن كە تۆمەتبارن بە بەرگری نەكردن لە دانیشتوانی قەزاكەیان، لەو كاتەی رێكخراوی تیرۆریستی داعش ھێرشی كردە سەریان و بە تەنیا جێیان هێشتن تا جینۆساید بكرێن لە 3ی ئابی 2014.
ئەو ستافە ئیدارییەی 4 ساڵ لەمەوبەر، بەھۆی كەمتەرخەمییان پێویستە رووبەڕووی لێپرسینەوەی یاسایی بكرێنەوە لەگەڵ ئەو ھێزە پێشمەرگە هەڵاتووەی بەبێ بەرگریكردن شنگال-یان چۆڵ كرد، نەك ئێستا بە ناوی رێكخستنەوەی ئیداری و بونیادنانەوەی قەزاكە وەك خەڵات پێشكەش بە دانیشتوانی ناوچەكە بكرێنەوە.
پارتی دیموكرات و ئەنجوومەنی پارێزگای نەینەوای حكومەتی عێراق گرنگە لەوە تێبگەن پێویستە ئێزیدییەكان ئیدارەی ھەڵبژێردراوی دڵخوازی خۆیان ھەبێت نەك ئیدارەیەكی بە زۆر سەپێندراوی تۆمەتبار. لە كاتێكدا هێشتا 3500 ژن و منداڵ و پیاوی ئێزیدی چارەنووسیان نادیارە و دەیان گۆڕی بەكۆمەڵ و تاكە كەسی هەن بە فەرامۆشكراوی لە لایەن حكومەتی هەرێم و حكومەتی عێراق مامەڵەیان لەگەڵ دەكرێت و زیاتر لە 100 هەزار ئێزیدی بوون بە پەنابەری وڵاتانی تر، هێشتا بەڵگەكانی كۆمەڵكوژی داعش وەك پێویست كۆنەكراونەتەوه،
بەڵێنەكانی ئاوەدانكردنەوەی قەزای شنگال جێبەجێ نەكراون و ئاوارە ئێزیدییەكان لەناو كەمپەكاندا ژیانێكی سەخت دەبەنە سەر، بڕیارەكەی مەسعود بارزانی-یش لە سەردەمی دەسەڵاتەكانی فەرماندەی هێزە چەكدارەكان جیبەجێ نەكراوە بۆ لێكۆڵینەوە و دادگاییكردنی ئەو هێزەی پێشمەرگە كە شنگال-یان بۆ داعش چۆڵكرد، كەواتە پارتی دیموكراتی كوردستان چۆن چاوەڕوانی ئەوەی هەیە خەڵكی شنگال فەرشی سوور بۆ قایمقامی پێشوو رابخەن تا بە شەرفمەندی بگەڕێتەوە؟!
لە بری دۆزینەوەی شەڕی نوێ و ئازاردانی زیاتر و خۆسەپاندن، خەڵكی شنگال پێویستیان بە قەرەبووی مەعنەوی و ماددییە، ئەوان شایەنی ئەوەن پارێزگارییان لێبكرێت و تایبەتمەندی ئاینی و ناوچەییان بەرگری لێبكرێت و بە ئاشتی بژین.
نیاز عەبدوڵڵا
ئەم وتارە دەربڕی بۆچونی نووسەر خۆیەتی