ئای مورگان..!

ئای مورگان..!

باڵا هاوار


367 جار خوێندراوه‌ته‌وه


مورگان لێره‌ش خاوه‌ن كۆمپانیا و سه‌رمایه‌یه‌، لێره‌ش به‌هه‌مان نه‌فه‌سی ئه‌وێ هه‌موو چاودێره‌كانی ده‌وڵه‌ت ده‌سته‌مۆده‌كات و پاره‌ی چه‌وریان ده‌داتێ، لێره‌ش مورگان ده‌چێته‌ زانكۆ و چه‌كی پاره‌ی زه‌به‌لاح ده‌خاته‌ به‌رده‌می به‌رپرسه‌كان، لێره‌ش به‌هه‌مان شێوه‌ ده‌بێته‌ خاوه‌نی به‌كالۆریۆس و ماسته‌ر و دكتۆراش.

 لێره‌ش مورگان له‌ هه‌ڵبژاردنێكی ناپاك و به‌گه‌رد ده‌بێته‌ ئه‌ندام په‌رله‌مان، به‌ڵام مورگانه‌كه‌ی ئێره‌ ئه‌وه‌نده‌ ئازایه‌تی تێدا نییه‌ مریشكێك له‌گه‌ڵ خۆی بباته‌ ناو هۆڵی كۆبونه‌وه‌ی په‌رله‌مانتاران و باس له‌ كۆژانی هاووڵاتیانی خۆی بكات.

مورگان لێره‌ش ده‌ستی له‌ هه‌موو شتێكدا هه‌یه‌، له‌گه‌ڵ سیاسیی و به‌رپرسه‌كان موو ناچێ به‌ به‌ینیانه‌وه‌، لێره‌ش خاوه‌نی هه‌موو شتێكه‌ ته‌نانه‌ت خاوه‌نی ئه‌و كارگه‌یه‌یه‌ یان ئه‌و كۆمپانیایه‌یه‌ كه‌ جلی ژێره‌وه‌مان له‌ ده‌ره‌وه‌ بۆ ده‌هێنێت..!

مورگان لێره‌ش به‌ ڕاست و چه‌پی خۆیدا به‌رتیل ده‌دات و هه‌موو ئیشه‌كانی خۆی جێبه‌جێ ده‌كات، لێره‌ش دیوانه‌ شیعر، ڕۆمان، چیرۆك، فه‌لسه‌فه‌، رۆژنامه‌، گۆڤار بڵاو ده‌كاته‌وه‌ و هه‌ر خۆیشی، خۆی خه‌ڵات ده‌كاته‌وه‌ چونكه‌ خه‌ڵاته‌كه‌ش به‌ پاره‌ ده‌كڕێ و له‌ كۆتاییشدا پێشكه‌شی ده‌كاته‌وه‌ به‌ جه‌نابی سه‌رۆك..!!!

مورگانه‌كانی ئێره‌ش، به‌ پاره‌ و به‌خشینی سه‌یاره‌ و موڵك، سه‌له‌فیه‌كی توندڕه‌و ده‌گۆڕن بۆ ئه‌تایستێكی یاخی، ئه‌تایستێكی یاخیش له‌ قوژبنی مزگه‌وتێك گیر ده‌كه‌ن و تا ده‌مرێ ده‌بێ له‌وێ دانیشێت.

مورگان لێره‌ش هیچ ئاواتێكی ماددی نه‌ماوه‌ نه‌هاتبێته‌دی، بۆیه‌ ئه‌وه‌ی ئێستا له‌به‌رده‌میدا ماوه‌ هه‌مووی به‌ پاره‌ ده‌كڕێته‌وه‌، رۆژێك په‌رله‌مانتاره‌، رۆژێك وه‌زیره‌، رۆژێك شاعیره‌، رۆژێكیش و بۆ هه‌تا هه‌تایه‌ سه‌رمایه‌دارێكی زه‌به‌للاحه‌.

لێره‌ش هه‌روه‌ك میسڕ، كۆڵان، جاده‌، كافتریا، رێستورانت، وه‌زاره‌ت، مزگه‌وت، زانكۆ، دوكان و بازاڕ، یانه‌ی شه‌وانه‌ و قومارخانه‌كان، پڕیه‌تی له‌ مورگان و كاریگه‌ری له‌سه‌ر ڕه‌وتی گۆڕانكاریه‌كانی وڵات دروست ده‌كه‌ن....!!









ads

زۆرترین خوێندراوە

ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved