هەڵە كوشندەكەی پارتی

17/12/2018

رێبوار کەریم وەلی

(1)
راگەیاندنی بەربژێرەكانی پارتی بۆ سەرۆكی هەرێمی كوردستان و سەرۆكی حكومەت لە رۆژی 3ی مانگ، دەستی پارتی بە رەسمی لە دانوستاندنەكانی پێكهێنانی حكومەت و كاراكردنەوەی سەرۆكایەتی هەرێمدا كەشف كرد. بەرامبەرەكانی پارتی پاكێجێكی فراوانی مامەڵە بە سێ سەرۆكایەتییەكەیان دەستكەوت. هەر ئەوەش پاڵی بە پارتییەوە نا كە دوای پتر لە دوو مانگ لە بەرزترین ئاستدا لەگەڵ یەكێتی و گۆڕان (ناڕاستەوخۆ لە رێگەی یەكێتییەوە لەگەڵ كۆمەڵیش) كۆببێتەوە. لەوەشیاندا، یەكێتی نەك هەر سێ سەرۆكایەتییەكە، بگرە كەركووك و پۆستی وەزاری لە بەغداشی هێنایە ناو دانوستاندنەكانەوە.

یەكێتی، گۆڕان و تەنانەت كۆمەڵیش بێ شەرت و مەرج ئامادەی دانوستاندن و رێككەوتن بوون لەگەڵ پارتی، بەڵام ئەو گۆڕانكارییە تموحەكانیانی لە دەستخستنی زۆرترین ئیمتیازی سیاسی و ئیداری لە پارتی زیاتر كرد.

بژارەكانی بەردەم پارتی بۆ پێكهێنانی حكومەت و هاوكات كاراكردنەوەی سەرۆكایەتیی هەرێم زۆر بوون، بەڵام ئەوەیانی هەڵبژارد كە مەجبوور بێت لە یەك كاتدا هەموو كارتەكانی بخاتە سەرمێز. 

نیەتی پارتی لە كاراكردنەوەی سەرۆكایەتی هەرێم، بەشێكی پەیوەستە بە مامەڵەی ناوخۆیی خۆی تا ئەو جێگۆڕكێیەی بڕیاری لێدراوە، ئەنجام بدات و وەكو حزبی یەكەمیش ئیستیحقاقێكی دیكەی خۆی دەستەبەر بكات. بەڵام راستییەكەی پارتی نەدەبوو وا بكات.

ئەگەرچی دەگوترێ كە تا پێش سەری ساڵ دەستەی سەرۆكایەتیی پەرلەمان دیاری دەكرێت و، پرۆسەكە خێراتر دەكرێت، بەڵام راستییەكەی ئەوەیە كە ئیتر ئەو پەلەپەلەی لە پارتی هەیە، لە حیزبەكانی دیكە نییە. هەنگاوی دروست ئەوە بوو كە ئەو دەستاودەستكردنەی ناو پارتی بە شێوەیەكی هێمنانە و هەنگاو بە هەنگاو بووایە.

دەكرا ئەمجارەش نێچیرڤان بارزانی تا ئەوكاتەی كە یاسای سەرۆكایەتی هەرێم كارا دەكرایەوە، هەر سەرۆكی حكومەت بووایە و پارتی بە ئاسانی دەیتوانی دیدگاكانی خۆی بۆ شكڵ و شێوەی حكومەتی داهاتوو (بە تایبەتیش حكومەتی بچووككراوە) جێبەجێ بكات. ئەو حكومەتە حكومەتێكی كاتی نەدەبوو، بەپێچەوانەوە ئەگەر دانانی وەزیرەكان بە راوێژ لەگەڵ سەرۆكوەزیرانی داهاتوو كرابایە، رەنگبێ دوای دەستاودەستكردنەكە پێویستی بە تەعدیلی وەزاریش نەبووایە و (دوای ساڵێك یان دوو ساڵ) لە ماوەیەكی كورتدا جێگۆڕكێیەكە بە شێوەیەكی سروشتی روویدەدا.

رێككەوتن بەبێ گۆڕان!
(2)
لە دوای رێككەوتنی ستراتیژیی 2007 كە ساڵی 2012 بووە سەرەتای كۆتاییەكەی، هەموو ئەو رێككەوتنە دووقۆڵییانەی كە كراون جا ستراتیژی یان تاكتیكی، (جگە لە رێككەوتنی گۆڕان و یەكێتی بۆ ئیدارەی سلێمانی) هیچیان سەریان نەگرتووە. پارتی لە 2014دا، لە كاتێكدا كە گۆڕان لەوپەڕی بەهێزیدا بوو و هەموو لایەك پێیان وابوو"یەكێتی نەماوە"، رێككەوتنی دوو قۆڵی بۆ "چوار ساڵی ئارام" لەگەڵ گۆڕان ئیمزا كرد و ساڵێك و چەند مانگێك بڕی كرد! ئینجا یەكێتی ئەو شكستەی گۆڕانی قۆستەوە و لە 2016 بە قەولی خۆیان رێككەوتنێكی ستراتیژیی بنەماڵەییان لەگەڵ گۆڕان ئیمزا كرد، بەڵام ئەویش تەنیا یەك خاڵی لێ جێبەجێ كرا، ئەویش راگەیاندنی رێككەوتنەكە بوو!


لە هەردوو حاڵەتدا، نە رێككەوتنی پارتی و گۆڕان توانی یەكێتی بەرتەرەف بكات و لە هاوكێشەكان بیكاتە دەرەوە (سەرباری ئەوەی كە گۆڕان براوەی هەڵبژاردنی ئەنجوومەنی پارێزگاكان بوو، ناچار بوو بردنەوەكەی لەگەڵ یەكێتیدا بەش بكات)، نە رێككەوتنی یەكێتی و گۆڕانیش توانی پارتی بەچۆكدا بێنێت. بۆیە هیچ رێككەوتنێكی سیاسیی دووقۆڵی سەرناگرێت، مەگەر ئەوەی كە رێككەوتن لە نێوان دوو زۆندا بكرێت. یەكێتی و گۆڕان حاكمی زۆنی خۆیانن و پارتیش زۆنی خۆی هەیە. ئەگەر حزبەكان راست دەكەن و چاویان لە دوو ئیدارەیی نییە، دەبێ گۆڕان، یەكێتی و پارتی بەرەو رێككەوتنێكی سێ قۆڵی بڕۆن. ئەگەرچی ئەو رێككەوتنە ناكرێ زۆر ورد بكرێتەوە، چونكە نە گۆڕان و نە یەكێتیش حزبێكی یەكدەستی یەكگرتوو نین و ئەوانیش دابەش بوونە. بەڵام دەكرێ ئەو سێ حزبە لەسەر هەندێك بنەمای نەتەوەیی و نیشتیمانی رێكبكەون كە وەكوو دەستوورێكی سیاسی بێت تا نووسینەوەی دەستووری كوردستان.

پارتی، گۆڕان و یەكێتی لەسەر چەندین ئاستی جیاجیا (حوكمی ناوچەیی، حكومەت، پەرلەمان، پەیوەندییەكان و كەركووك و زۆر شتی دیكەش) پێویستیان بە رێككەوتنێكی لەو چەشنە هەیە و پەراوێزخستنی هەر هێزێك لەو سێیە، وەكو نووسینەوەی پەیمانە لەسەر بەفری بەر هەتاو.

بەس ئەو سەرپێچییەت كردووە كاك قوباد!
(3)
لە مەراسیمێكدا قوباد تاڵەبانی باسی سەرپێچییەكی خۆی دەكات گوایە لەبەر ئەوە بووە كە كاری بە سجلی نووسراو نەكردووە. بۆ راگرتنی حیساباتی خۆی و ئۆفیسەكەی كۆمپیوتەری بەكارهێناوە. دەستی خۆش بێت بۆ ئەو موخالەفە رچەشكێنانەی كە بەرەو سیستەمێكی داتای ئەلیكترۆنیمان ببات. بەڵام قوربان دوای ئەو موخالەفەیە و دوای ئەوەی كە لە حاڵەتی نەبوونی سەرۆكی حكومەت لە وڵاتدا دەسەڵاتی خەرجكردن لە بەیتولمالتان دەستكەوت، هیچ موخالەفەیەكی دیكەتان نەبووە؟ پێتوایە هەموو ئەو پارانەی كە لەوكاتەوەی ئیمزات بەدەست بووە خەرجت كردوون، هەمووی لە چوارچێوەی یاسادا بوونە؟ دەكرێ بریندارێكی شەڕی داعش چەندین بەرامبەری بریندارێكی دیكەی بۆ سەرف بكرێ؟ بووە مەسەلەن لە هەڵمەتی پڕوپاگەندەی هەڵبژاردنەكانی مانگی مایس دوو سەت ملیۆن دینارت بۆ تایەی سەیارە، رۆن و بەنزین بۆ خۆت سەرف كردبێت؟ هیوادارم بە ئەكسڵ نەتكردبێت، دەنا دیسان ئەم جەماعەتی رەقابەی مالییە كێشەت بۆ دروست دەكەن.

رێبوار کەریم وەلی

ئەم وتارە دەربڕی بۆچونی نووسەر خۆیەتی