دۆخی بێسەری

دۆخی بێسەری

لەتیف فاتیح فەرەج


327 جار خوێندراوه‌ته‌وه

ئێستا كوردستان لە دۆخێكی بێسەری تەواودایە ،  ئەم دۆخی بێسەریە هەر تایبەت نیە بە باشوری كوردستان ، پەیوەستە بە بەشەكانی دیكەشەوە ، بەڵام قسە كردنی ئێمە تایبەت لە سەر باشوری كوردستان و تایبەتتر لە سەر سنوری سلێمانی و كەركوك و هەڵەبجەو گەرمیان و زۆنی راپەڕینە ، دوای مردنی هەر یەك لە تاڵەبانی و نەوشیروان مستەفا ، ئەم ناوچەیە لە بێسەریەكی گەورەدا یە ، هەر بۆیەشە جۆرێك لە یەكتر نەخوێندنەوە ، فرە كوێخایی ، ، كەس بە كەسی لێرە هەیە ، راستی ئەمە بۆ هەموو كوردستانیش هەر وەسایە بە كەمێك جیاوازیەوە بەوەی مەسعود بارزانی وەك كەسی یەكەمی پارتی توانیویەتی سەری ئەو حزبە بێت ، هەرچەند لە هەموو ماوەی سەرۆكایەتی هەرێمدا نەبووە كۆكەرەوە، لە سەر ئەم بابەتە پێشتر قسەو باسی زۆر كراوە نامەوێ بڕۆمەوە سەری .


بێسەری لەم بەشەی باشوری كوردستان دۆخی ئەم ناوچەیەی بە جۆرێكی خەراپ وێنا كردووە ، هەروەك چۆن مامەڵەی دەرو دراوسێ و تەنانەت عیراقیش دوای نەمانی ئەو دوو كارەكتەرە سیاسیە لە تەك ئەم ناوچەیەدا بە شێوەیەكی ترە ،نەبوونی سەرێكی هەقیقی بۆ هەڵگرتنی بەر پرسیارەتی و كۆكردنەوەی هەموو لە دەوری یەكتر وای كردووە ، سلێمانی وەك شارێكی زندوو لە ناوەندی بڕیارەوە ببێتە ناوەندی پارچە پارچە بوون و لێكترازان ، كێشەكە ئەوەیە كەس نایەوێت لەم پارچە پارچە بوون و ترازانە خۆی بەرپرسیار بكات و هەریەكەو تۆمەتەكە دەخاتە پاڵ ئەوی تر ، راستی دۆخی ناوخۆی یەكێتی و گۆڕان رێك وێنەی بارو دۆخەشێواوەكەی ئەم ناوچەیەیە ، لە كاتێكا كێشەكان دەكرێت بە ئاوەزو لۆژیك چارەسەر بكرێن .

ئەوەی لە سلێمانی و ئەم ناوچەیە دەگوزەرێت ململانێی نەوەكان و تەمەنەكان نیە ، وەك چۆن بەشێكی زۆریشی پەیوەندی بەوەوە نیە كە ئەمانە ناتوانن زمانێك بۆ گفت و گۆو لێك تێگەیشتن بدۆزنەوە ، ئەوەی لە سلێمانی و ئەم ناوچەیە دەگوزەرێت ، كە من پێم وایە بەشێكی دەكەوێتە ئەستۆی تاڵەبانی و نەوشیروان مستەفاش كە كاتی خۆی بە چارە نەكراوی هێشتویانەتەوە ، دەستی ترە یاری بە كارەكتەرەكانی ئێستا دەكات ،نایەوێت ئەو كارەكتەرانە خاوەنی خۆیان بن ، هەڵبەت ئەوانیش بۆ ئەوە گونجاون كە وابن، لە سلێمانیدا بڕیار نادرێ ، كەس بڕیار نادا ، بڕیاریش بدرێ ، كۆدەنگی لە سەر نیە ، كەس جێبەجێی ناكات ،ئەم دۆخە دروستكراوەو هۆكاری پشت پەردەشی هەیە ، كێ دەتوانێ ئەمە چاك بكات هیچ دیار نیە .

لە ناو یەكێتی و گۆڕاندا خەڵكانی باش زۆرن ، لە دەرەوەی ئەوانیش هەروەسا ، بەڵام كەس لەوی تر رازی نیە ، یان دەكرێت بڵێین هەر كەس خۆی لەوەی تر پێباشترە ، كەسیشیان ناتوانن نەسەرێكی دروست و نەكۆكەرەوەیەكی باش بن ، من ئاگادارم چەند ساڵێكە گرەولە سەر تێكدان و شێواندنی ئەم ناوچەیە دەكرێت ، گەورە ترین مەترسی ئەوەیە دەستەو گروپە جیاجیاكانی ئەم ناوچەیە خۆیان ببنە بەشێك لە گرەوەكە ، هەڵبەت ئێستا كەس نیە بڵێ نابێ ئەمە ببێت ، كە س نیە سنورێك بۆ ئەمە دابنێت .

ئەم وتارە كورتە بۆئەوەیە هەموو كارەكتەرەكانی ئەم ناوچەیە هەڵوەستە لە سەر بارو دۆخەكە بكەن و مەترسیەكان بخوێننەوە ،بە باوەڕی من كاتێك كەشتیەكە بە تەواوەتی كون بوو كەس پارێزراو نابێت .

لەتیف فاتیح فەرەج  



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved