بۆچی ئێمە تەنیا ژن دەسووتێنین؟

بۆچی ئێمە تەنیا ژن دەسووتێنین؟

ئەحمەدی مەلا


212 جار خوێندراوه‌ته‌وه

ئێمە رۆژانە، هەزاران خەون دەكوژین، هەزاران نیگا گۆڕبەگۆڕ دەكەین، بە دەیان هەزار چرۆی ئیرادە و هەستی مێردمنداڵان لە چاڵ دەنێن، لە تەلەڤزیۆنەكانەوە هەستی ئینتیما لە گۆڕدەنین، هەموو هەفتەیەك، لەسەر مینبەرەكاندا ملی چەندین خۆشەویستیی و لێبوردەیی دەقرتێنین. 

ئێمە هەموو رۆژێك، كچەكانمان بە بێدەنگی دەكوژین، ژنانمان بە بێ وەڵامدانەوە هەڵدەپرووكێنین، بزۆزی زارۆكانمان لە حەوشەی قوتابخانەكان لە چاڵ دەنێین. 

ئێمە، پێش ئەوەی بیانكوژین، سادییانە ئازاریان دەدەین، هەر بە هەوەس گەڵای سەر رێگاكانمان دەچەمێنیەوە، لە باخچە گشتییەكان گوڵەكان دەپلیشێنیەوە، لە ئوتۆمبێلەكانمان زبڵەكانمان فڕێ دەدەینە سەر نیشتیمان و دیسكەكانیشمان خستۆتە سەر سروودی "ئەی رەقیب"، تەنانەت لە خەونەكانیشماندا هەر لاسارین. ئەگەر شتێك هی ئێمە نەبێ قینمان لێی دەبێتەوە. 

ئێمە وەك موسڵمان رۆژ نییە ملی برا موسڵمانێك نەشكێنین، وەكو كوردێك هەموو لەحزەیەك كوردایەتی وەك قوتووی كۆلا دەپەستینە ناویەك، وەك مرۆڤێك هێشتا ئێمە لە دایكنەبووینە. لە هیچ كوڵانێكمان، لە سەر هیچ جادەیەك، لە بازار و كۆڵانی هیچ قەیسەرییەكدا چاومان بە مرۆڤایەتی ناكەوێ. ئەوەی ئێمە دەیبینین بەزەیی هاتنەوەیەكی درۆزنانەیە، یارمەتیدانێكە بۆ ئەوەی باڵادەستی خۆمان نیشان بدەین، هەرەوەزیی ئێمە بۆ مرۆڤەكان نییە، تەنها وەكو رەسیدێكە و دەمانەوێ بیخەینە سەر خێرەكانمان و سبەی پەروەردەگار فلس بە فلس، عانە بە عانە بمانداتەوە. چاكی ئێمە بۆ ئەوەی دیكە نییە، تەنها وەكو قەرزێكە دەیدەنە دەستی خودا بۆ ئەوەی سبەی گەردنمان ئازاد بكا. هەموو شتێك دەكەین لە پێناو خۆمان، هیچ هەنگاوێكمان نییە لە پێناوی ئەوی دیكە بێ، چونكە "ئەوی دی" لە وێژدانی مرۆڤی لای ئێمە لەدایكنەبووە. چاوچنۆكانە كڕۆنۆش بۆ خودا دەبەین و چاوەڕێین نەخۆشەكانمان چاك بكاتەوە، لە دەرد و بەڵا دوورمان خاتەوە، دەستی منداڵەكانمان لە قوتابخانە بگرێ، باوكی نەخۆشمان چاك كاتەوە... 

ئێمە تا ماوەیەكی دیكەش بەشداریی لەم كاولكارییانە دەكەین و دەكوژین و دواتر دەچینە سەر قەبران، دەسووتێنین و خۆمان لەبەر گەرمایی تەرمەكە گەرم دەكەینەوە. ئێراسمی نۆتردام چەند هۆشیارانە لەسەدەی شانزە دەیگوت : "مرۆڤ وەكو مرۆڤ لەدایكنابێ، بەڵكو دەبێ ببێ بە مرۆڤ". 

ئێمە، لە نێو ئەم دیمەنە دزێوەدا، وەكو مرۆڤ لە دایكنابین و هیچ هەوڵێكیش لە گۆڕێدا نییە بۆ بوونمان بە مرۆڤ....

ئەحمەدی مەلا



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved