بۆچی ترامپ پەلەیەتی لەجێهێشتنی كوردەكانی سوریا؟

بۆچی ترامپ پەلەیەتی لەجێهێشتنی كوردەكانی سوریا؟

بەهادین نوری


1146 جار خوێندراوه‌ته‌وه

ئاشكرایە كە هەرلەسەرەتاوە مانەوەی ئەمریكا لەكوردستانی سوریا بۆ ئەوەبووكە ڕوسیا بەتەنیا لە سوریا نەبێ و ئێران بەئارەزووی خۆی تراتێنی تێدا نەكات ، باشترین بژاردەش بۆ واشنتن ئەوەبوو كە ڕێبكەوێت لەگەڵ كوردەكان بۆ ئەوەی ببنە هێزی سه رەكی پیادە لەجەنگی دژ بە داعشداو دواتریش بنكەی سەربازی خۆی بهێڵێتەوە بۆ ڕێگری لە هێنانی چەك و تەقەمەنی بەناو عێراقدا بۆ سوریا و بۆحیزبولڵای لوبنان . 

ئەمە و ترامپ لە پڕ ، بەشێوەیەكی چاوەڕواننەكراو ، هەڵوێستی خۆی لە ١٨٠پلە گۆری و رایگەیاندكە
: - داعشی لە ناو برد و ئیتر لە سوریا هێزی سەربازی ئەمریكا نامێنێ ، دەكشێتەوە ! 

ترامپ لە هەموو كەس باشتر دەزانێ كە ئەم ڕاگەیاندنە درۆیەكی گەورەبوو كردی . داعش لە ناونەبراوەو لە سوریا و لە عێراق و لە چەندین وڵاتیتر هێشتا هێزی هەیەو جێگەی مەترسیە . جگە لەمەش ، باشدەزانێ كە بوونی سەربازی ئەمریكا لەگەڵ كوردی سوریا تەنها بۆ لەناوبردنی داعش نەبووە ، بەڵكو ئامانجی دیكەشی لە پشتەوەیە . كەواتە سەرۆكی ئەمریكا ترامپ بۆچی ئەم بڕیارەیدا كە سوریا بەجێبێڵێ ؟ چ نهێنیەك لە پشتی ئەم بڕیارەوەیە كە تەنها ترس و ناڕەزایی كوردەكانی سوریا و هەموولایەكی بەرپانەكرد ، بەڵكو وەزیری بەرگری ئەمریكایش ماتیس دەستی لە كار كێشایەوە ، كۆمەڵێ لە كەسایەتی ناسراوی كۆنگرێسی ئەمریكی ناڕەزایی توندی خۆیان دەربڕی ، وەزیری بەرگری نزیكترین دەوڵەتی ئەوروپی – بەریتانی – بە ئەمریكا یەكەم كەس بوو ڕخنەی لە ترەمپ گرت . بەگشتی ئەوروپا ناڕازی بوو .

لێرەدا ئەوپرسیارە قوتدەبێتەوە : بۆچی ترامپ ئەمەی كرد ؟ نهێنیەك لەپشتی ئەم پرسەوەیە ؟

هێندێ لە ناوەندە سیاسیەكان وەهای بۆ دەچن كە ترامپ كاتی خۆی قەومانوویەتی لەگەڵ پۆتین ، خیانەتی لە وڵاتەكەی خۆی كردووە و لەگەڵ پۆتین ڕێك كەوتووە كە یارمەتی بدات بۆ ئەوەی ببێتەسەرۆكی ئەمریكا. ئەوناوەندە سیاسیانە پێیان وایە كە پۆتین هەڕەشەی لەترامپ كردووە: ئەگەر سوریا بەجێ نەهێڵت من ئەو نهێنێ ئاشكرا دەكەم كە لە نێوانماندایە و خۆت ئەزانیت ئەنجامەكەی چ دەبێت؟ 

ترامپ خۆی نیوە شێتە و ئەم هەڕەشەیەش شێتتریشی كردووە . وەكو ئەوە وایە كە گوێزانی قوتداوە، نە بە تەواوی بۆی قووتدەدرێ و نە دەتوانێ تفی بكاتەوە . ئەم هەڵوێستە ئەو ڕاستیە بۆ هەموو جیهان دەردەخات كە ترامپ درۆدەكات كاتێ دەڵێ : 
- بەرژەوەندی ئەمریكا لە سەروو هەموو شتێكەوەیە .

لێرەدا ئاشكرایە كە بەرژەوەندی شەخسی ترامپ ، نەك بەرژەوەندی ئەمریكا ، لە سەرووی هەموو شتێكەوەیە . بەڵگەش بۆ ئەمە ڕوونە : ترامپ دەزانێ كە نە داعش لە ناوبراوەو نە ئێران لە سوریا دەركراوەو نە ڕوسیا سوریای جێهێشتووە . كەچی وەها بە ئاسانی بڕیاری كشانەوەش لە سوریا دەدات ! ترامپ هەتا پێویستی بە كوردەكان بوو كردنی بە ( كەوا سووری بەر لەشكر)و هەزاران شهیدو كەمئەندامیان پێشكەش كردو ئیستەش ، كە ئیتر بڕیاری كشانەوە دەدات ، دەیانخاتە ژێر( ڕەحمەتی ) دڕندەیەكی تینو بە خوێنی كورد لە هەر گۆشەیەكی جیهاندا هەبن ، دەبێ میللەتی كورد دەرزێكی تاڵ لە پێوەندی خۆی لەگەڵ ترامپ و كەسانی وەكو ترامپ وەرگرێ و هەموو هێلكەكانی خۆی نەخاتە سەبەتەی هاوپەیمانی لەم چەشنە. 

ئێمە ناتوانین لۆمەی كوردی سوریا بكەین لەسەر ئەم وەزعەی تێیكەوتوون ، چوونكە هەر لە نووكەوە هیچ مافێكی نەتەوەیی و دیموكراسیان نەبوە . بۆ یەكەم جارە لە هەموو مێژووی خۆیاندا كە ئەم دەسكەوتە دیموكراتیەی ئیستەیان بە خۆوە ببینن . بەڵام دەبێ لۆمەی تووندی حوكمڕانانی ئەم هەرێمە بكەین لەسەر ئەوە كە ، ئەگەر چی زۆریشیان پێناكرێ ، هیچ هەڵوێستێكیان وەرنەگرت و كە میشیان نەكرد بۆ یارمەتی كوردەكانی سوریا لەم دەردو نەگبەتیەیاندا . بە پێچەوانەوە ، هێندێكیان كێشەو گرفتی ئەوكوردانەیان پێخۆشبوو چونكە بەچاوی حیزبایەتی تەسكەوە ڕوانیانە پرسەكە . 

من وای دەبینم كە كوردی سوریا ئەمڕۆ زۆر بژادەیان لە بەردەوامدا نیە و ناچارن بە هێندێ پاشە كشە و ڕازیبوون بە زیانی كەمتر و بەڵای بچوكتر . ناچارن هەوڵی ڕێكەوتن بدەن لەگەڵ ڕوس و لەگەڵ دیمەشق . بۆ ئاگاداری تا ئەم چركەیە هێزی ئەمریكی لە جێگەی خۆی ماوەو ئەگەر گۆڕانكاری پۆزەتیڤ لە وەزعەكەدا بوو ئەوە حسابی خۆی بۆ دەكرێ.

بەهادین نوری



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved