هەولێر پایتەختی سیاسییە، دامەزراوەكانی پەرلەمان و ئەنجوومەنی وەزیران و وەزارەتەكان و ئەنجوومەنی دادەوەری و چەندین دامەزراوە باڵاكانی دیكەی وەك ئەنجوومەنی ئاسایش و ... هتد لەخۆدەگرێت.
هەبوونی دامەزراوە باڵاكان لە پایتەختدا، خۆبەخۆ زەمینەی ئەوە دەڕەخسێنێت كە شار بەهۆ یان پاساوی پاراستنی دامەزراوە باڵاكان و كارەكتەرە سیاسییەكان و میوانە تایبەتەكان، پڕ بكرێت لە هێزی چەكدار و ئەمنی. هەروەك بەهۆی سروشتی پایتەختەوە، چالاكییە جەماوەریی و ناڕەزایەتییەكان هەستیارتر و كاریگەرتر دەبن، كاردانەوەكانیش لەلایەنی دەسەڵاتی سیاسییەوە بەهەمان شێوه توندتر و ڕێكخراوتر دەبن.
ئەو هۆكارانە، لەپاڵ مەترسییەكانی تیرۆر و زیاتر بە ئامانج گرتنی پایتەخت و دامەزراوەكانی، هێندەی تر لایەنە ئەمنییەكەی هەولێر تۆختر دەكەنەوە.
ئەو تایبەتمەندییانە وادەكەن دەسەڵاتی سیاسی لەهەر بارودۆخێكدا ئاسانتر بتوانێت ڕێگری لە چالاكییە ناڕەزایەتییەكان لە پایتەختدا بكات. هەم بەهۆی ئامادەیی هێزە چەكدار و پۆلیس و ئەمنییەكان لەهەر سووچێكدا، هەم بەپاساوی پارێزگاریی لە دامەزراوەكان و ..ئیتر.
هەولێر ئەگەر وەك پایتەختی سیاسی لەسەرێكەوە سوودمەند دەبێت لە هەندێك چالاكی ئابووری و بازرگانی و هەروەك دەستڕاگەیشتنی ئاسانتری خەڵكەكەی بە ناوەندەكانی دروستكردنی بڕیار، بەراورد لەگەڵ ناوچەكانی دوور لە پایتەخت، بەڵام ئەودیوە ئەمنییەی شار، لێكەوتێكی نەرێنییە لەخودی پایتەختبوونەكەیدا.
رێبین فەتاح
ئەم وتارە دەربڕی بۆچونی نووسەر خۆیەتی