پەرژینەكەی سەرۆك !
سەرۆك، ئەوەی لێرە نوسراوە وتارو شیكاری سیاسی نییە، تەنها هەڵرشتنی دەردەدڵەو هیچی تر، هەرچەندە دڵنیام ئەوە راوبۆچونی خەڵكێكی زۆری ئەم مەلەكەتەیە كە بەرێزتان زیاد لەدوو خول سەرۆكی بوون. ئێوە ویستان دەوڵەت وەك پەرژین و شورایەك بۆ خەڵكی ئەم مەمللەكەتە دروست بكەن، ئەمە كارێك بوو هاوتای خەونەكانی زۆرینەی خەڵك، ئێوە تاوتان دایە ئەو كارە تا ئەركی مێژینەی شۆرشەكان و هەوڵ و تێكۆشانی رۆڵە بەئەكەكانی ئەم وڵاتە بەفیرۆ نەچێت تا خەڵك لەبەڵاو مەترسی دەرەكی بیپارێزن، بەڵام ئێستا ئەوەی خەڵكی توشی نائومێدی و ترس و دڵەراوكی كردوە، مەترسی دەرەكی نییە، هێندەی ئەوەی بەدەست ئەوە پاشخانە سیاسی و حیزبایەتییەوە دەنالێت كەدەستكردی حزبی كوردییە و بەرێزیشتان رۆڵی سەركردەی تیابینیوە.
سەرۆك دەبوو هەر زوو بتزانیایە لەسێبەری دەسەڵاتەكەی ئێوەدا چ گرفتێك لەئارادایە تا وابكات گەنجانی ئەم وڵاتە مل بنێن بەهات و نەهاتی مەرگ و ژیانەوە تا لەغەریبی و لەدەرەوەی پەرژینەكەی ئێوە ژیانێكی بەشكۆ بەدەست بهێنن. ئاخر چ هێزێكی داگیركەر، لەدوای راپەرینەوە، توركیاو ئێران، بەعێراقی كۆن و نوێوە، بەبێ پرسی و راوێژی پارتی و یەكێتی پێی ناوەتە كوردستانەوە، لەچ زەمەن و زروفێكی نەهامەتیدا كەی داگیركەران توانیویانە ئەوەندەی ئێستا مرۆڤی كورد نائومێدو بێ خەون و سەرگەردان بكەن، چ سەردەم و حوكمرانییەك ئەوەندەی ئێستا توانیویەتی ئاوا وڵات دابەش بكات، لەراستیدا ئەوە خەڵكی زاخۆ نییە رقی لە خەڵكی هەڵەبجە بێت، ئەوە خەڵكی سلێمانی و هەولێر نییە نەیاری یەكتربن، ئەوە حزبەكانە یەكتری قبوڵ ناكەن و خەڵكیان لەدژی یەكتر هانداوە و سنوری ناوچەكانیان بەرووی یەكدا تۆخ كردۆتەوە، ئاخر چ سەردەمێك نادادی وای بەخۆیەوە بینیوە، لەناو كورددا هاوڵاتی پلەیەك و دوو سێ و چوار هەبێت، سەردەمانێك ئێوە گللەیی ئەوەتان لە حوكمرانی مللەتی سەردەست هەبوو، كوردی وەك هاوڵاتی پلە دوو سەیر ئەكرد، بەڵام ئێستا نەك لەناو كۆمەڵگەدا، تەنانەت لەناوحزبەكەی خۆشتاندا هاوڵاتی پلە دوو سێ و چوار هەیە.
بیرمە چەند ساڵێك لەمەوبەر بەرێزتان لەدانیشتنێكدا داواتان كرد، ئێمەی رۆژنامەنووس رۆڵی ئەوە ببینین، كە ئومێد بۆ خەڵك بگێرینەوە، هەرئەوكاتە لەحزوری بەرێزتاندا، باسی ئەوەم كرد، ئێمە چۆن بتوانین كارێكی وابكەین، كە بەبەرچاوی خەڵكەوە رۆژانە قافڵەی تەنكەرە نەوت برواتە دەرەوە و داهاتەكەشی دیار نەبێت، بەڵام لەولاشەوە زۆربەی خێزانەكانی ئەم وڵاتە بەرمیلێك نەوتیان پێی رەوانابینن تا وەك پێویست منداڵەكانیان پێی گەرم بكەنەوە. ئاخۆ ئەبێت ئەوە ناو بنرێت چی، لەپایتەخت، لەسەر فول لایت، چەكدارێكی حزب لاوێك بداتە بەرگولە و یاساش دەسەپاچە بێت لەئاستیدا، ئەبێت چ هێزێكی وێرانكەربێت وابكات لەچەمچەماڵ ژنێك و سێ منداڵ پێكەوە بسوتێنرێن، كێ ئەتوانێت بروا بەوە بكات، كۆرپەیەك لەسەرمای ئەم زستانە فرێ بدرێت، ئەبێت چۆن لێكدانەوە بۆ ئەوە بكەین لە سەر سەرچۆپی و كۆتر و دەماقاڵی خێزانی دەیان كەس بەچەكی حزبی و حكومی بكوژرێن، سەرۆك نازانم قەت پرسیاری ئەوەت كردوە، ئەوانە كێن كە یاساشكێنی ئەكەن، پرسیاری ئەوەت كردوە ئەوانە كێن كە دەرمانی ئێكسپایەر دەرخواردی خەڵكی نەخۆش وهەژاری مەمللەكەتە ئەیەن، نازانم ئاگات لێیە، وڵاتەكەت كراوە بەچەند كانتۆنێكەوەو هەر كانتۆنێكی رادەستی كۆمپانیایەكی نەوت كراوەو هەر كۆمپانیایەكیش لەحزب شەریكی بۆ دیاریكراوە و ئەندامانی خێزانەكەت و كەسە نزیكەكانیشت پشكی شێریان هەیە؟.
سەرۆك نازانم بەراست ئێوە خەمی پەرژینتان بوو بۆ ئەم پاشاگەردانیە، یان پەرژین و شوایەكتان مەبەست بوو تا عەیبەكانی خۆمانی تیا بشارینەوە، ئاخر برواناكەم كوردێك هەبێت لەناخەوە ویست و حەزی بە بەدیهاتنی دەوڵەتی نەبێت، بەڵام چۆن بروا بەوە بكرێت كە دەوڵەت لەژینگەیەكی ئاوا دروست ئەبێت كە بەرێزتان ئامادەنین بینای سەرۆكایەتی هەرێم رادەستی برازاو جێگرەكەی خۆت بكەیت، ئەبێت هاوڵاتیەكی ئەم وڵاتە چۆن بروانێتە ئەو هەموو كۆشك و باڵەخانانەی بەپارەی میللەت دروستكراوە، مرۆڤی بەئیرادە و خاوەن خەون، وەك خواناسێكی ناو مزگەوتێكی قورینە خۆی بەنزیكتر لەخواكەی دەزانێت، لە موسوڵمانكی ریاییكەر لە مزگەوتێكی پر لەفەخفەخەی پر فەرش، ئێستا تاكی كورد بێ ئیرادە و بێ خەون كراوە و داوای تەقوای كوردایەتی لێدەكەن، داوای پشوو درێژی و خۆراگری لەم بێ دادیەی لێدەكەن.
سەرۆك ئاخۆ ئێستا میوانە بیانییەكان چیمان پێبڵێن، كە بەكارێكێكی دبلۆماسی روو لەم وڵاتە ئەكەن، لەكاتێكدا لای ئێوە ئەبێت كۆبوونەوەی سێ قۆڵی لەگەڵ باوكو و كورو برازا بەجیا بكات و لای یەكێتیش لەگەڵ ئەندامانی مەكتەب سیاسی حزبێك بەجیا كۆبونەوە بكات، ئەبێت لەبیرەوەرییەكانی خۆیاندا چی لەسەر ئەم میللەتە داماوە تۆمار بكەن، كە دەبینن شاندی باوك و كورپێكەوە بۆكاری دبلۆماسی نەتەوە دەچنە وڵاتەكەیان. سەرۆك خەڵكی ئەم وڵاتە چۆن نائومێد نەبن، كە لەهەڵبژاردندا ساخەتەیان لێبكرێت، لەداهاتدا فێڵیان لێبكرێت، لەدابەشكاریشدا نادادی، ئەمە لەكوێی دیموكراتیەتدا جێگە دەكرێتەوە، لەكوێی مرۆڤدۆستی و حوكمرانیدا دەبینرێتەوە، خەڵك قوتی ژیانی لەسەر موچەكەی بێت و بۆ چەند ساڵێك نیوە موچەی بكەیت و لەكاتی خۆشیدا نیوە موچەكەی پێنەدرێت و هیچ وەزیرو بەرپرسێكیش خۆی بەبەرپرسیاری ئەو نەهامەتیە نەزانێت. سەرۆك بیرمە جارێكیان لەبەرچاوی لەشكرێك رۆژنانەنووس فەرمووت، ئەگەر خەڵك بەرگەی یەك ساڵ نەبوونی و بێ موچەیی بگرێت، بەڵێنی دامەزراندنی دەوڵەتیان دەدەمێ، ئێستا چەند ساڵە خەڵك وا دەژی، بەڵام نەك چاوەرێی دەوڵەت نییە، بروا بەوەش ناكات بتانەوێت موچەكەی خۆی پێبدەنەوە كە ژیانی خۆی و ماڵ و مندڵی لەسەر بەندە تا وەك هاوڵاتیەكی پلە چوار پێی بژی.
سەرۆك نازانم تاچەندە بروا بەوە دەكەی خەڵك ماندوە، تاچەندە خۆتان بەقەرزاری ئەو خەڵكە دەزانن كە ساڵانی شاخ نانەرەقەی سەرسفرەكانیان لەگەڵتان بەش كرد، قەرزای ئەو خەڵكەن ئیتر منەتی شۆرش و خەباتیان بەسەردامەكەن، چونكە ئەوەی خەڵكی زیاتر شەكەت كردوە ئەو بێ باكییەی ئێوەیە دەرهەق بەژیان و بەئایندەی خەڵكی ئەم وڵاتە، هەر ئەوەشە وایكردوە بێ ئومێدی وەك باران بەسەر خەڵكدا ببارێت و بێ ئیرادەكردن لەناخیاندا سەوز ببێت، ئەی ئەوەنییە زیاتر لە سێ مانگە هەڵبژاردن كراوە و حكومەت بەهۆی كیشەی حیزبەوە پێك نەهاتوەو خەڵكیش باكی نییە، ئاخر خەڵك بێ باكە چونكە ئومێدی بە جوڵەكانی ئەم حیزبانە نەماوە، بروای بە بەڵێنە سەوزو سورەكانی جاران نەماوە، ئاخر خەڵك هەر ئەوەندەی پێدەكرێت كە بیست و هەشت ساڵ چاوەروانی بكات و گوێی لە بەڵێنەكان بگرێت، ئاخرچۆن خەڵك نائومێد نەبێت، لەكاتێكدا حیزبە پارەدارەكان، مەكینەی راگەیاندنی گەورەیان دانابێت بۆ خافڵكردنی خەڵك و شكاندنی یەكتر، بۆ نابوت كردنی كۆمەڵگە لە هەر شتێكی جوان، حیزب كاتێك لەباتى گوێگرتن قەڵەمەكان بكرێت، بازارو بانكی هەبێت، لەشكرو زیندانی تایبەت بەخۆی هەبێت، حیزب لەشكرێك جنێو فرۆشی سوسیال میدیای پەروەردەو ئامادەبكات بۆ شەری خۆبەخۆ، ئیتر چۆن بروا بەپەرژین و شواكەی بەرێزتان بكات، چۆن خەڵك توشی رەشبینی و مایە پوچی بەهاكان نابێت، كاتێك ئاستی خوێند بەو رادەیە دابەزیبێت، هیچ بەرێوەبەرێكی مەكتەب بەبێ تەسكییەی حزبی دانەنرێت، كاتێك حیزب لەهەموو شوێنێك حزوری خۆفەرزكردنی هەبێت، زانكۆ، دادگا، بازارو ناوەندەكانی تر قۆرغ بكات، ئیتر چۆن شیرازەی ژیان تێكناچێت.
بۆیە سەرۆك گەرجاران پەرژین و شوارایەك پێویست بوو بێت بۆ بەرگرتن لەمەترسییە دەرەكییەكان، ئێستا مەترسییە تۆقێنەرەكە لەناوەوەیە نەك دەرەوە، بۆیە ئێستا ئەو كارە پێویستە كە پێش هەر شتێك ئومێد و ئیرادە بۆخەڵك بگێرێتەوە، كەبەداخەوە ئەوەش لەدەست ئێوەدا نەماوەو كاتی ئەوە نزیك بۆتەوە، خەڵك خۆیان هەموو ئەوشتانە سفربكەنەوە، كەلەدنیایی حیزبدا ژمارەی گەورەن.
ئەم وتارە دەربڕی بۆچونی نووسەر خۆیەتی