کورد لە بەرژەوەندییەکانی ئەمریکادا

کورد لە بەرژەوەندییەکانی ئەمریکادا

 


842 جار خوێندراوه‌ته‌وه

ساڵی ٢٠٠٨ دکتۆر فوائاد عەجمی کە یەکێک بوو لە بیرمەندە ناسراوەکانی عەرەب و ئەمریکا و پشتیوانێکی سەرسەختی نیوکۆنزەرڤاتیڤەکانی ئەمریکا بوو، جگە لەوەش راوێژکاری تایبەتی جۆرج بۆش-ی کوڕ- سەرۆکی ئەمریکا بوو بۆ کاروباری رۆژهەڵاتی ناوەڕاست سەردانی کوردستانی کرد و من و کاک سەردار عەبدوڵڵا کە ئەو کاتە سەرنووسەری رۆژنامەی رۆژنامە بوو دیدارێکی دوورودرێژمان لە گەڵیدا سازدا. لە چوارچێوەی دیدارەکەدا پرسیاری (پەیوەندی کورد و ئەمریکا و کورد لە ستراتیژی ئەمریکا)مان لێ کرد.. زۆر راشکاوانە وتی کورد لە هیچ کوێی ستراتیژی ئەمریکادا نییە.. ئەمریکا ستراتیژی لە گەڵ نەتەوە خاوەن دەوڵەتەکانی وەک فارس و تورک و عەرەب هەیە.. 

لێمان پرسی ئەی چی بکەین بۆ ئەوەی بچینە چوارچێوەی بەرژەوەندیی و ستراتیژی ئەمریکاوە؟ لە وەڵامدا وتی: گەر بتوانن ئەم ناوچەیەی کە هەتانە بکەنە ناوچەیەک کە دیموکراسی و مافی مرۆڤ تێدا پارێزراو بێت، ئەو کاتە ئەمریکا ناچارە (ئەخلاقیەن) بەرگری لێ بکات گەر کەوتەبەر هەڕەسە..

بە پێی زانیارییەکانی منیش مەکگۆرک پێش ئەوەی دوا سەفەری خۆی بکات بە سەرانی یەکێتی و پارتی و کوردەکانی خۆرئاوای وتووە، ئەمریکا هیچی پێ نییە بۆتان، خۆتان لە ناوخۆتاندا رێک کەون..

ساڵی ١٩٢٢ لە دواین دانیشتنی شێخ مەحمود و مەیجەر نۆئێل ئەویش بەهەمان شێوە بە شێخ مەحمود وتووە ئینگلیز هیچی نییە بۆتان خۆتان مشوری خۆتان بخۆن..
رووسەکانیش کە لە کۆماری کوردستان کشاونەتەوە، بە سەرکردەکانی کوردیان وتووە، ئێمە ئیشمان لێرە نەماو، خۆتان چارەیەک بۆ خۆتان بدۆزنەوە..

لە هیچ یەک لەم قۆناغانەدا ئێمە مشوری خۆمان نەخواردوە و لەجیاتی یەکبوون و خۆرێکخستن و رێکخستنی ناوماڵی خۆمان هێندەی تر بەگژ یەکدا چووین و هەندێکیشمان دەسکێشی دووژمنیان کردوە بۆ ناو ماڵی خۆمان..

ئەمە وتەیەکی تاڵە، بەڵام بەداخەوە حەقیقەتە..

ئەمریکا و ئینگلیز و روسیا نەفام نین، ئەوانیش ئەمە دەزانن و لە خۆیان دەپرسن باشە کورد هێندە لە گەڵ یەک خراپن بن، چما خۆ ئێمە لە کورد کوردتر نابین، بۆ وەفامان بۆیان هەبێ..!!

دەگەڕێمەوە بۆ قسەکانی فوئاد عەجمی، یەک هەڵوێستی، بەوەلانانی بەرژەوەندی حزبی و دروستکردنی قەوارەیەک کە دیموکراسی تێدا پەیڕەو بکرێت و گەندەڵی دابەزێنرێت بۆ کەمترین رادە و... گرەنتین بۆ ئەوەی خەڵک متمانەی بۆ دەسەڵاتی کوردی بگەڕێتەوە، کە متمانەی خەڵکیش گەڕایەوە، لە دەوروبەر حسابت بۆ دەکرێ، کە لەدەوروبەریش حسابت بۆ کرا، ئەمریکا و روسیا و ئینگلیزیش (ئەخلاقیەن) و (بەرژەوەندیەن) مامەڵەت لە گەڵدا دەکەن..

مەجید ساڵح




ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved