لە سەروبەندی گەرموگوڕێ كۆبونەوەی لایەنەكان بۆ پێكهێنانی كابینەی نوێ و هەوڵی جدی لایەنی براوە بۆ دروست كردنی حكومەتێكی فرە حیزبی بنكە فراوان ، دوبارە بونەوەی هەمان سیناریۆی كابینەی هەشتی حكومەتی هەرێمە بۆ نەمانی ئۆپۆزسیۆنێكی كارا لە گۆڕەپانی سیاسی و حوكمڕانی هەرێمی كوردستادا
سەرباری زۆری داواكای و پاكێجی لایەنەكانی تر و سوربونی حیزبی براوە و یەكەمی هەڵبژاردن (پارتی دیموكرات) لە هەوڵدان بۆ قەناعەتپێكردنیان ئاماژەن بۆ ئەو ڕاستیەی كە ویستەكە بەئاڕاستەی لە گۆڕنانی ئۆپۆزسیۆن و لاوازكردنی دەندوكی لایەنەكانی وەك گۆڕان و كۆمەڵە ، نەك حكومەتێكی خزمەتكاری فرە ڕەنگی فرە لایەن
ئەم پێداگریەی پارتی بۆ هاوبەشی لایەنەكانی تر لە كابینە نوێ دوای ئەوە دێت كە پێنج ساڵی پڕ قەیرانە دروستكراوەكانی كابینەی هەشتی بە سود و قازانجی خۆی بەڕێكرد بەوەی كە بەهێزتر لە هەڵبژاردنی ڕابردوو ئەم هەڵبژاردنە توانی ٥% زیاتری دەنگی لایەناكانی بە بەرژەوەندی خۆی یەكلابكاتەوە لەگەڵ ئەوەشدا جێنفوزی لە ناوچەكانی خۆی زیاتر پێ قایمتر كرد و ڕێژەی كورسیەكانیشی لە ٣٨ گەیاندە ٤٥
خۆ پارتی بە كورسی كۆتاكانەوە دەتوانێت حكومەتی تاك لایەنی پێك بهێنێت بەڵام بێ هاوبەشی یەكێتی هیچی پێناكرێت و ویستیشی نیە ئەو سەركێشیە بكات چونكە بۆی ناچێتە سەر و سەركەوتوو نابێت ، كەوایە هەوڵەكانی پارتی بۆ هاوبەشی پێكردنی لایەنەكانی تر دوو مانا لەخۆ دەگرێت ، سەركەوتنەكان دەبنە دەستكەوت بۆی و لە شكستەكانیش هاوبەشن
بەم سیناریۆیەش ڕۆحی ئۆپۆزیسیۆن لە هەرێمی كوردستان هەر بە زیندووی لە گۆڕ دەنرێ ، مەترسیەكی گەورەش دەخاتە بەردەم ڕەخنەگران و دەنگی ئازاد
بۆیە دەبێت لایەنەكان وردتر لە داهاتوی خۆیان و هاوڵاتیان و كابینەی نۆ و پڕۆسەی حوكمڕانی بڕوانن گەر نا ئایندەی هەرێم لە حكومەتێكی بێ ئۆپۆزسیۆنیدا مەرگی زیاتری ئەوان و باڵا دەستی زیاتر دەبەخشێت بە پارتی دیموكرات.
هەردی ئەحمەد
ئەم وتارە دەربڕی بۆچونی نووسەر خۆیەتی