بەعس دڕندەترین دوژمنی ئێمەبوو، کاتێ مفاوەزات و ڕێکەوتنێکمان لەگەڵ ئەکرد، خەڵکی ئێمە حەوت شەوو حەوت ڕۆژ هەڵئەپەڕین!
نەورۆزی ئەو ساڵەی ئامەد، سێ ملیۆن کەس بەشداری تیاکردو قەرەباڵغترین نەورۆزبوو لە مێژوودا، چونکە نەورۆزی ئاشتیبوو!
ئەمەوێ بڵێم، هاوڵاتی بە تەبیعەت ئەیەوێ بژی و مەیلی ئاشتی کۆمەڵایەتی و ئیستقراری سیاسی هەیە.. تەنانەت لەگەڵ بەدترین دوژمنیشدا حاڵەتە ئاساییەکە ئەوەیە کە (ڕێکەوتن وەکو مەبدەء پەسەندە) بەڵام ئەشێ لەسەر تەفاسیلەکەی قسە هەبێت.
(لای ئێمە شتەکە عەکسبۆتەوە، ئێستا ئێمە کێشەمان لەگەڵ خودی "ڕێککەوتن" هەیەو هەر لەڕێوە ڕەتمانکردۆتەوە، بەبێ ئەوەی تەفاسیلەکەیمان بۆ گرنگ بێت!)
دنیاکە خراپتر ئەبێ یان باشتر، ئەسڵەن ئەوەمان بۆ مەوزوع نیە، گرنگ ئەوەیە ڕێكنەکەوین!
فەوزایەك ڕێکنەکەوتن بیهێنێ، زۆرمان لا باشترە لە ئارامییەك کە ڕێکەوتن بیهێنێ! بەجۆرێك کە ئەو ساڵە، جوملەی (چوارساڵ ئارامیی) بووبە عەیبە بۆ هێزێکی سیاسی، وەك ئەوەی ئیشی هێزی سیاسی دروستکردنی نائارامیی بێت!!
جا ئەم حاڵەتە زۆر نائاسایی و ترسناکەش، ئەشهەدو بەرهەمی پۆپۆلزمی سیاسی و موعارەزەی هاشوهوش بوو. ئاخر پارتی و یەکێتی شەیتاندنیان تا ئاستی شەڕ برد، بەڵام تاکی ئێمە، هێشتا نەگەیشتە ئەوەی کە کێشەی لەگەڵ خودی "ڕێکەوتن" هەبێ و لای نائاسیی و خراپ بێت. وەلێ موعارەزەیەك هات، باڵانسی شەیتاندنی بەجۆرێك بەرزکردەوە، کە ئیتر لای ئێمە، ڕێکنەکەوتن بووە حاڵەتە ئاساییەکەیەو ڕێکەوتن بووە شتێکی قبوڵ نەکراو!
بە منبێ هەڵەی گۆڕان ئەمەی ئێستای نیە، نەفەسی ڕاماڵین و شەیتاندنەکەی پێشترە. باجێکیش کە ئێستا ئەیدا، هی ئەو هەڵە کۆنەیە، نەك ئەوەی ئێستای کە ئەسڵەن جاری دیارنیە ڕاستە یان هەڵە. یەعنی بە تەعبیرە شەعبییەکە، گۆڕان قاچی لە گووی خۆیایەتی.
جا کێشەی من ئەوەنیە، کێ ڕێکئەکەوێ و کێ ڕێکناکەوێ، کێشەی من لەگەڵ عەقڵیەتێکە کە ڕێکەوتنی دوو هێزی سیاسی بە کفری سیاسیی ئەزانێ، لەکاتێکا ئەوە حاڵەتە ئاساییەکەیەو لە "فرەیی سیاسیدا" حیزبی سیاسی کاریان هەر ئەوەیە کە کۆببنەوەو ڕێکبکەون. یان ئەگەر ڕێشنەکەون، لانیکەم یەکتری بەشەیتان و دنیا ڕەشوسپی نەکەن، بۆئەوەی "سڕینەوەی سیاسی" نەیەتە گۆڕێ، چونکە سڕینەوە شتەکان عەکس ئەکاتەوە.
لە سڕینەوەدا ئیتر پەرتبوون و یەکبوون شوێنەکانیان ئەگۆڕنەوەو پەرتبوون ئەبێتە حاڵتە ئاساییەکە، چونکە لەگەڵ شەیتاندا هەرچۆنێ یەکبیت، خۆشت ئەبیتە شەیتان! لە دنیای ڕەشوسپیدا ئیتر قەت ناگەینەوە یەك، چونکە بگەینەوە یەك، سپییەکە ڕەش ئەبێت!
کیشەکە ئەوەیە، ئێمە هەموومان سەربە سەقافەتی منین، سەقافەتی منیش ئەوانیتر ئەسڕێتەوەو قبوڵیان ناکات.
ئێستا گرنگ نیە کێ ئەچێتە حکومەت و کێ ناچێ، گرنگ ئەوەیە چۆن لە منی سیاسییەوە، بپەڕینەوە بۆ ئێمەی سیاسیی!
ئاخر هەموومان لەو منەدا تەقلیدین، هێزی ناتەقلیدی ئەوەیە کە ئەخلاقی "ئێمەی سیاسی" دائەهێنێت، نەك ئەوەی کە بە دەنگێکی بەرزتر بڵێ من.
سیاسەت لە مانا نوێکەیدا یەعنی ئێمە، سیاسەت تەنیا لە فاشیزمدا یەعنی من، ئێمەش تەنیا فاشیزمی هێزە گەورەکانمان نیە بەڵکو بچوکەکانیش، تەنیا پارتی و یەکێتی یەکترو ئەوانیتر ڕەتناکەنەوە، بەڵکو ئەوانیتریش پارتی و یەکێتی و یەکتریش ڕەتئەکەنەوە.
ئێمە نائومێدین، لەبەرئەوەی خۆمان لە خۆمان نائومێدکرد. گۆڕان هات نائومێدمانکا لە پارتی و یەکێتی، نەوەی نوێ هات نائومێدمانکا لە گۆڕان، هێزێکی تریش دێت نائومێدمانکا لە نەوەی نوێ.. ئیتر هێزی ئێمە بۆ ئەوە نایەت ئومێدێکی تازەمان لادروستبکات، بۆئەوە دێ ئومێدێکی کۆنمان بکوژێ.
کە ئەڵێم "ئێمەی سیاسی" بێگومان بە پارتی و یەکێتیشەوە! ڕاستە سەتا هەشتای نائومێدیمان لە پارتی و یەکێتی، پەیوەندی بە کارە گڵاوەکانی خۆیانەوە هەیەو ئەوان خۆیان نائومێدیان کردین لە خۆیان. بەڵام موعارەزەیەكیش هات موباڵەغەی لەم ڕێژەیەدا کردو هەشتاکەی بەرزیکردەوە بۆ لەسەتا سەت، کە ئەمە وانییە!
وانیە چونکە دەسەڵاتی خراپی ڕەها بوونی نیە، خراپترین دەسەڵات لە شوێنێکدا هەر باشە یان ئەکرێ باشبێت، لەبەر چاوی کاڵی شەعبیش نا، لەبەر مانەوەی دەسەڵاتەکە خۆی.
جا لەگەڵ پارتی و یەکێتی، کاری گەورە ناکرێ، چونکە ئەوان ماڵی خۆیان وا بیناکردوە، بە چاکسازیی ڕیشەیی ئەڕوخێ بەسەریاندا.
بەڵام لەگەڵ پارتی و یەکێتی کاری بچوك و مامناوەندیش ئەکرێ، کاری هێزەکانی تریش چ لە حکومەتبن یان لە موعارەزە، هەر ئەوەیە کە پارتی و یەکێتی و یەکتری بەو ئاقارەدا بەرن، نەك ئەوەی هێزەکان کورتان بە یەکتر فڕێدەن و جووتە وەشێنراوەکانیش بەر خەڵك بکەوێ.
ئێمە لای دەسەڵات و موعارەزەشەوە، چیتر پێویستمان بە بڕێك عەقڵانیەتە، نەك ئەو بێتامییەی کە پێ ی ئەوترێ "بوێریی".
ئێمە ئەو بوێرییەمان تاقیکردەوە کە زەڕب لە یەکتربدەین، ئێستا کاتی ئەو بوێرییەیە کە گەورەو بچوك و دەسەڵات و معارەزە.. یەکتر بخوێنینەوە.
ئەم وتارە دەربڕی بۆچونی نووسەر خۆیەتی