ڕێگایەكی تر

ڕێگایەكی تر

په‌یكه‌ر عوسمان


518 جار خوێندراوه‌ته‌وه

(باش و خراپ لە خودی كردەكەدا باش و خراپن، نەك لە بكەرەكەیدا.) لای ئێمە ئەم سەرەتا سادەیە تێكچووە بۆیە ناتوانین هێزی باش بەرهەم بهێنین و هەمیشە ململانێكانمان لەنێوان خراپ و خراپتردایە! 

چونكە چیتر لە سیاسەتی ئێمەدا، ئەوە خراپ نیە كە خراپە، ئەوە خراپە كە پارتی ئەیكات! ئەوە باش نیە كە باشە، ئەوە باشە كە دژەپارتییە!

براوەی یەكەمی ئەم یارییەش هەمیشە پارتییە، چونكە لەلایەك، هێزی خراپی ڕەها بوونی نیەو خراپترین هێز ڕێژەیەك حەقیقەتی هەر لایەو هیچیشی لانەبێت، لانیكەم مافی ئەوەی هەیە كە هەبێت. كاتێكیش تۆ ئەو ڕێژەیە نادیدەئەگریت و بە نەفەسی سڕینەوە ئەچیتە بەرامبەری، ئیتر تۆ بتەوێ و نەتەوێ، ستەمێك ئەكەیت و ستەمكار ئەكەیتە قوربانی، ستەمكاریش هێز لە خیاتبی قوربانیبوون وەرئەگرێ و پێ ی خۆشە بیخەیتە ئەو مەوقیفەوە!

لەلایەكی تریشەوە شەیتاندنی پارتی، وایكردوە كە هەمیشە هێزەكانی تریش، ئەگەر خراپترنەبن باشترنەبن لە پارتی، چونكە لە سیاسەتی ئێمەدا، خودی "باشیی" فەزیلەت نیە، دژەپارتێتیی فەزیلەتە!

ئیتر بەرامبەر پارتیش هێزی باش و جیاواز نایەنە مەیدان و هەر ئەو هێزانە دێن كە ڕووی پارتی سپی ئەكەنەوە. چونكە تەنیا دژەپارتێتی بەسەو ئەسڵەن پێویست ناكا جیاوازو باش بیت!

تۆ بە دیدێكی ستەمكارانەوە ناتوانی دژی ستەمكاریی بیت، بەڵام ئەتوانی دژی ستەمكاربیت و لەپشتی ئەم دژایەتییەوە خۆشت ستەمكارێكی تربیت! یەعنی دژایەتی خراپ ناكاتە باش! ئەكرێ تۆی "دژەخراپ" خراپێكی تربیت. 

چیتر كاری ئێمەش هەر ئەوەنیە كە دوای خراپ نەكەوین، ئەوەشە كە فریوی دژەخراپ نەخۆین و (باش و دژەخراپ) لەیەك جیابكەینەوە! تا ئەمەش نەكەین ناتوانین هێزی باش بەرهەمبهێنین.

سەیركە كاتێ یەكێتی دژی پارتیی خۆی توندئەكاتەوە، لای ئێمە وەكو هێزێكی باش دەرئەكەوێ، لەكاتێكا ئەو نەك باشتر نیە، ئەشێ خراپتریش بێت!

یان هێزمان هەیە موڵكی گشتی داگیركردوە، بەڵام كاتێ دژی پارتییە گوێ نادەینێ، كە نزیكئەبێتەوە لە پارتی ئینجا یەخەی ئەگرین لەسەر موڵك و ماڵی گشتی!

یان لە دیدی باوی ئێمەدا، یەكێ لە خراپییەكانی پارتی، ئەوەیە كە حیزبی دیكتاتۆریەتی بنەماڵەیە. دەی هێزی تر هەیە نەك هی بنەماڵەیەك، بەڵكو هی تاقە كەسێكەو كابرا وەكو مۆبایلەكەی و سەیارەكەی، حیزبەكەشی موڵكی تایبەتی ئەوە! كەچی ئەمە نابێتە جێ ی ترسی ئێمە وەكو نموزەجێكی تری دیكتاتۆری، بەڵكو هەر لەبەرئەوەی دژەپارتییە، لامان ئەبێتە پاڵەوانی دیموكراسی!

یان هەرلەخۆمانەوە كۆمەڵمان لە یەكگرتوو پێباشترە، مەسەلەكەش تەنیا دوورو نزیكییە لە پارتییەوە، ئەگینا لە ئەخیری ڕێگاكەدا دواجار ئەو دووانە هەر یەك شتن!

ئەمەوێ بڵێم، پارتی تەنیا دەسەڵاتی ئەم وڵاتەی كۆنترۆڵ نەكردوە، بەڵكو كۆی عەقڵیەت و دنیابینی سیاسیی ئەم وڵاتەی كۆنترۆڵكردوە! 

ئاخر لە شەستەكان و زەمانی جەلالی و مەلاییەوە، ئێمە قەت پارتی و شتێكی ترمان نیە، هەمیشە هەر پارتی و دژەپارتییمان هەیە. دژەپارتیش ناتوانێ شتێكی تربێت، چونكە كاردانەوەیەو لە فەلەكی كاردایەو بوون و وجود لە پارتی وەرئەگرێ!

بە زمانێكی شاعیرانە، وەكچۆن لە ئاوێنەدا عەكسی خۆت ئەبینیت، لە عەكسێتی پارتیشدا هەر پارتی هەیە! لەڕاستیدا خەتی دژەپارتی، "بە زەرورەت" خەتی دووەمی پارتییە، خوانەخواستە لەبەرئەوەنا كە كەسەكان جاسوسی پارتیبن، بەڵكو لەبەرئەوەی كە یارییەكە هەر ئەو نەتیجەیەی هەیە.

پارتیش هێندە سودمەندە لەم خەتە، ڕەنگە ئەگەر فەترەیەك نەمێنێ خۆی دروستیی بكات! چونكە ئەم دژەپارتێتییە هەمیشە ڕێگرە لەوەی شتێكی جیاواز لە پارتی دروستببێ، ئاخر تۆ بۆئەوەی دژی پارتی بیت، ئەسڵەن پێیوستت بەوەنیە جیاوازبیت و خۆت تەیاربكەیت بە جیاوازی، بەڵكو هەرئەونەی دژەپارتی بیت بەسەو ئیتر تۆ باشیت و چەپڵەت بۆ ئەكوتن!

كاتێكیش دەرئەكەوێ كە باش نیت و جیاوازنیت و تەنیا دژەپارتییەكیت و هیچی تر. ئیتر تەرەفی دۆڕاوی ململانێكە هەمیشە تۆیت و براوەكەش هەمیشە پارتییە. ئەم براوەییەی پارتیش هەر بەردەوام ئەبێ، تا نەفەسی جەلالیەت هەبێ. 

(جەلالیەت مەبەستم ئەوەیە، كە تۆ بە هەمان عەقڵیەت و ماهییەتی پارتییەوە، دژی پارتی بیت و ئەمەش فەزیلەتی سیاسی بێت!)

ئێمە بۆ ئەوەی بتوانین مونافسی پارتی دروستبكەین و لێ ی ببەینەوە، ئەبێ عەقڵیەتێكی سیاسی دیموكرات بێنینە مەیدان. "شەیتاندنی سیاسی" عەقڵیەتێكی نادیموكراتەو مەیدانی پارتی خۆیەتی و كەس لەو مەیدانەدا لێ ی ناباتەوە، مونافسەكانی پارتیش هەمیشە خۆیان لەسەر شەیتاندنی پارتی بینائەكەن بۆیە هەمیشە ئەدۆڕێن!

لە شەیتاندندا پارتی بشدۆڕێ، پارتییەكی تر ئەیباتەوەو بۆ ئێمە هیچ لە مەسەلەكە ناگۆڕێ. 

ڕقی سیاسی ناوەڕۆكێكی تر دروست ناكات، ناوی تر دروست ئەكات، ناوەكانیش دێن و دەڕۆن و پارتی هەر وەكو خۆی ئەمێنێتەوە، چونكە پارتی بە ناو لێینادرێ، بە ناوەڕۆك لێیئەدرێ.

دژەپارتێتی دوو سیفەتی نەگۆڕی هەیە (یەكەم لەمسەرەوە بە سەریعی جەماوەرت بۆ كۆئەكاتەوە. دووەم لەوسەرەوە بەمسۆگەری دۆڕاویت.) 

سەت ساڵی تریشبێ، لە ئەخیرا هێزێك لە پارتی ئەباتەوە كە هێزێكی (نادژەپارتییە)! كە هێزێكی دیموكراتەو ئەسڵەن بڕوای بە شەیتاندن و سڕینەوەی پارتی نیە! هێزێكە كە لە جەوهەرو ماهییەت و خودی خۆیدا شتە، نەك ئەوەی هیچ نەبێ و تەنیا دژەپارتیی بێت!

ئەم هێزە نەشیباتەوە ئەتوانێ شێوازێكی تری ململانێ دابهێنێ كە بڕێك تەندروست بێت.

دواجار سلێمانی داینەمۆی گۆڕانكاریی كۆمەڵگای ئێمەیەو تا سلێمانی لە شەپۆلی جەلالیەت ئازادنەكەین كوردستان لە هەیمەنەی مەلاییەت ئازاد نابێ.

پەیكار عوسمان



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved