جاسیندا ئاردێرن* خۆشەویستی خودا

جاسیندا ئاردێرن* خۆشەویستی خودا

کامەران قازی


340 جار خوێندراوه‌ته‌وه

لەمیانەی ناونیشانی بابەتەكەمەوە، دەمەوێ ئاماژە بە دوو خەسڵەت بكەم، كە كێشمەكێشی زۆری لەسەر دروست بووە و هەڵەی گەورە و كوشەندەی تێدا كراوە و لێكدانەوەكان ( بۆ ئەم دوو خەسڵە تە، سیفاتە) بوونەتە هۆی گرفتاری زۆر گەورە بۆ مرۆڤایەتی و تا بێ پایان سوودی سیاسی و پڕوپاگەندەی هەڵبژاردن و بەكارهێنانی بۆ سوودی كەسایەتییە سیاسی و ئاینییەكان، لێكراوە.

بە ناوی ئەو دوو خەسڵەتەوە، پەلاماری نەتەوەكان دراوە، كەسایەتییەكان تیرۆر كراون، نیشتمانی خەڵقی خودا وێرانكراوە و پیاوەكان سەربڕاون و ژنان و منداڵان وەك كاڵا لە سەدەی بیستویەكەمیی مرۆڤایەتیدا، كڕین و فرۆشتنیان پێوە كراوە.

ئەو دوو خەسڵەتە كە لە زاتی ئینساندا هەن و دەكرێت پەروەردە بكرێن بەو بارەدا كە گەرەكمانە بە بوونی مەرج و ژینگەی تایبەت بەهەر یەكەیان، كە لە بنەڕەتدا یەكێكیان بنەمای بوونی ئینسانیمانە واتە فترەتی ئینسانیمانە و ئەوی تریان زیاتر لە ئەنجامی تێنەگەیشتن لە خەسڵەتی یەكەمەوە، سەرچاوەدەگرێت و بەهۆی بارودۆخی ژیان و چەواشەكردنی زەینی منداڵانەوە، دنەی دەدرێت و دەبێتە خەسڵەتی ژمارەیەك كەس، كەواتە یەكێكیان ئەسڵە و ئەویتریان وەك لق و چڵە، كە ئەگەر سیفەتی یەكەم وەك بوونە ڕاستییەكەی گوزارشتی لێكرا، زۆر زۆر كەم، تا ڕادەی نەبوون، خەڵكانێك هەبوون یان دەمێننەوە، كە ناوزەد بكرێن بەوەی كە خەسڵەتی دووەمیان هەیە، یا بە ناوێكی تایبەتەوە كە جودایان بكاتەوە، ناوبنرێن. 

ئەم دوو خەسڵەتە بریتین لە:
1- ئیمان، كە بریتیە لە خۆشەویستی حەق و تەسلیم بوون پێی و پشتیوانی كردن لێی.
2- كوفر، كە پێچەوانەی یەكەمە، واتە بوغزاندنی حەق و تەسلیم نەبوون پێی و بەرانبەری وەستاندنەوە.

لەبەر ئەوەی ئەم دوو گوزارەیە، خەسڵەتن، واتە سیفەتن، دەشێ تێكەڵ بەیەك ببن، واتە لە هەندێ هەڵوێستدا یەكێكیان، لەوی تریاندا دەر بكەوێت. كەواتە جێگیر نین، كەسێكی توڕە و هەڵچووی سەر بە خەسڵەتی دووەمەوە، ڕەنگە لە هەندێ كاتدا فرە ئارام و لەسەر خۆ ڕەفتار بكات و تەسلیم بە حەق بێت،  پێچەوانەی ئەوەش، كەسێكی ئارام و لەسەرخۆی بە ئیمان سەر بە خەسڵەتی یەكەم ڕەنگە بكەوێتە داوی توڕەبوون و هەڵچوون و ئیكاركردنی حەقەوە.

دوو نمونە نەقڵ دەكەم **
باوكێكی میهرەبان، لەگەڵ كوڕەكەیدا لەسەر بابەتێك دەكەونە گفتوگۆیەكی توندەوە، لە میانەی گفتوگۆیاندا، كوڕەكەی قسەیەكی حەق دەكات، باوكەكە لەبەر ئەوەی شكۆی باوكایەتی بپارێزێ ( چونكە ئەو قازانجی منداڵەكەی دەوێ، مانای لە میهرەبانییەوە، گفتوگۆی لەگەڵ دەكات)، ئەو قسە حەقەی لێ ناسەلمێنێ، واتە ئینكاری دەكات، لێرەدا خەسڵەتی رەتكردنەوەی حەق كە شێوەیەكی خەسڵەتی دووەمە ( كوفر) لە باوكە ئیماندارەكەیدا دەر دەكەوێت.

نمونەی دووەم: پیاوێك لەگەڵ ژنەكەی دەكەونە ڕاڤەكردنی بابەتێكی خێزانییەوە، لە میانەی قسەو باسیاندا، حەقێك لە زمانی ژنەكەیەوە دەوترێت، بەپێی ئەو باوڕە پووچەی كە ئەم پیاوە و ئەو ژن، بە باوەڕی پوچیش، پیاو نابێت تەسلێم بە ژنەكەی ببێت، پیاوەكە دەكەوێتە ئینكاركردن و ڕەتكردنەوەی ئەو حەقە، لەم حاڵەتەدا، شێوەیەك لە خەسڵەتی دووەم لە پیاوەكەدا، با ئیمانداریش بێت، خۆی نیشان دەدات. 

هەر چەندە پلەی قەوامیی پیاو، بریتییە لە بەڕێوەبردنی بە ڕاوێژ، لە نێوان ژن و پیاودا، بۆ دابین كردنی ژینگەیەكی پاك و ساغ بۆ منداڵەكانیان لە ڕوی پەروەردەیی، ئاسایشی گیان(دەروون) و ژیانیانەوە، بۆ ئەوەی مرۆڤێكی خزمەتگوزار بۆ كۆمەڵگا و مرۆڤایەتی ئامادەبكەن، وەك ئەركی خێزانداریی  باوان، ڕێك هەمان ئەو كار و ئەركەی كە دەبێت حكومەت بەرانبەر بە هاوڵاتییەكانی ئەنجامی بدات.

بەو لێتێگەیشتنەش كە نوێژ لە دوای هاتنەدەر لە مزگەوت یا جێهێشتنی بەرماڵەوە دەست پێدەكات، یان باشتر بڵێم درێژەی ڕاوێژ و گفتوگۆ لەگەڵ خودا، پاش بەجێهێشتنی مزگەوت و بەرماڵە، بۆمان ڕووندەبێتەوە، كە ئەم عیبادەتە، زنجیرێكی نەپساوەی ڕاوێژ و بەڵێن و ڕەفتاری ئینسانە، بۆ بە جێگەیاندنی ئەركی ئینسان بوونی لەو ماوەیەدا كە گەرەكییە، دڵ و ژینگەی  خۆی و مرۆڤایەتی،  بەو جۆرەی خودا ڕازی بكات، ئاوەدان و پاك بكاتەوە.

بەوجۆرەش كە باسم كرد، خەسڵەتی مادەرزادیی ئینسان، خۆشەویستی حەق و سەلماندنی و پشتیوانیی كردنە لێی، كەواتە، ناكرێت كاتێ سیفەتێكی جۆری یەكەم، خاوەنەكەی هەر كەسێ بێت با ببێت، لێوەی دەركەوت، من بەو تێگەیشتنە نادروستەی سەبارەت بە ئیمان و كوفر هەمە، تەرازوی زەینی شێوێندراوم بكەمە قازی و حوكم بدەم بەسەر بەرانبەرەكەمدا، چونكە لە بنەڕەتەوە، تێگەیشتنەكەم لەو دوو خەسڵەتە، شێواو و شپرزە بووە. وەك گوتم ئەو دووانە، خەسڵەتن و لە ڕەفتاردا ڕەنگ دەدەنەوە و پەیوەندی بە باوەڕێكی تایبەتییەوە نییە و دەشێ لە هەموو بارو دۆخێكدا و لە هەموو مرۆڤەكاندا، بە شێوەی جودا دەر بكەون. كە ئینسانی ساغی دڵپاكی پڕ لە خۆشەویستی، یەكسەر لە بەرانبەرەكەی دەسەلمێنێ و پشتیوانی لێ دەكات و دڵخۆش دەبێت بەوەی كە حەق دەیبیستێ. 

مرۆڤایەتی دڵخۆش بوو بەوەی كە ( جاسیندا ئاردێرن) پشتیوانی لە حەق كرد و بووە نمونەیەكی زیندوو بۆ ڕاستكردنەوەی، تێگەیشتنێكی هەڵە. نمونەیان زۆر بێت بۆ دامەزراندنی دادپەروەری لە نێوان مرۆڤدا.

سەرنج:
* جاسیندا ئاردێرن (Jacinda Kate Laurell Ardern) ، ژنە سەرەك وەزیرانی نیوزیلاند، كە وەك مرۆڤێكی خۆشەویستی خودا، لەم هەڵوێستە ئیماندارییانەیەیدا ڕەفتاری كرد و پشتیوانی لە حەق كرد و نمونەیەكی بەرزی ئینسان بوونی بە مرۆڤایەتی نیشان دا. ٢٦ /٠٧/١٩٨٠ لە هامیلتۆن لەدایك بووە و بڕوانامەی بەكالۆریۆسی هەیە لە سیاسەت و پەیوەندییە گشتییەكاندا.
**نمونەكان و ئەو لێتێگەیشتنانە لەم ڤیدیۆیەوە گواستراونەتەوە، كە بیرمەندی گەورە و گەوهەرێكی بیریی ئینسانی 
(كاك ئەحمەدی موفتی زادە)، باسیان دەكات، بۆ زیاتر ئاشنا بوون بەم سەرچاوە ڕەوان و زوڵالەی زەریای فكر و بیری ئینساندۆستی و پێشەوای حەقدۆستی و دادپەروەرییە، دەتوانن بگەڕێنەوە بۆ ئەم لینكەی خوارەوە:
https://www.youtube.com/watch?v=Tm7VmM9iuP4 

كامەران قازی




ads

زۆرترین خوێندراوە

ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved