هەولێری ڕەش یا ڕەنگاو ڕەنگ

هەولێری ڕەش یا ڕەنگاو ڕەنگ

دانا هەڵەبجەیی


511 جار خوێندراوه‌ته‌وه

لە 5/4/2019 فێستیڤاڵی ڕەنگەكان لە هەولێر سازكرا و بە دەیان هەزار لاوی ڕەنگاوڕەنگ بەشداری كرد، بەڵام هەر وەك خووە هەمیشەییەكانی هەندێك بانگخواز كە تێكەڵاوی هەموو ورد و درشتێكی ژیانی كۆمەڵگە ئەبن، زمانیشیان لەم بۆنەیەدا سواند، و بە چەپ و ڕاست بەشداربوانیان كافراند.

ئەم جەژنە لە بە درێژایی 2600 سالە لە هیندستان بەرپا ئەكرێت و وڵاتانی نیپاڵ و پاكستان، بەنگلادش و سریلانكاش سازی ئەكەن، و لە ئەوروپاش هەندێ شار هەمان ڕەنگوەشێن ئەكەن.

جەژنی ڕەنگ، جەژنی هولی و جەژنی عەشقیشی پێ ئەڵێن، هەموو ساڵێك لە سەرەتای بەهاردا لە 8 ی نیسان ئەنجام ئەدرێت، لە زۆربەی وڵاتانەوە تۆریستی بێگانە ڕوو لە هیندستان ئەكەن بۆ بەشداری ئەو جەژن و ئاهەنگە كە دوو ڕۆژ ئەخایەنێت.

هەرچەند ئەم جەژنە هیندۆسەكان وەك ئەكسێپتێكی ئەفسانەیەیی ساڵانێكە بەرپای ئەكەن، بەڵام مانا و ئاماژەكانی خەریكە جیهانگیر ئەبێت، كە مانای كۆتایی سەرما و تاریكیی زستان و هاتنی  ڕەنگەكانی بەهار ئەبەخشیت، هەر بۆیە ڕەنگ و ڕەنگئاو بەسەر یەكدا ئەپژێنن.

هیندستانێك كە ملیاردێك و نیو هاوڵاتیی هەیە و دووەم وڵاتی جیهانە لە ڕووی دانیشتوانەوە و 118 ئایین و 23 زمانی تێدایە، بە بەهێزترین وڵاتی دیموكراسی ئەژمێر ئەكرێت.

لە سەر دراوەكەیان كە ڕوپییە یە 15 زمانی جیاوازی تێدا نووسراوە، یەكێكن لە كۆنترین شارستانییەكانی سەر زەوی.

ئەم میللەتە ئەوەندە تۆلەرانس و لێبوردەن لە ناو یەكدا، لەبەر ڕێزی ئایینەكانی یەكتر، هەموو بەشداری ڕێوڕەسم و جەژنە ئایینەكانی یەكتر ئەبن، تەنانەت گاورەكان گۆشتی بەراز و مانگا ناخۆن لەبەر ڕیزی موسڵمان و هیندۆسەكان، هەروەها موسڵمانیش گۆشتی گا ناخۆن لە بەر هیندۆستەكان و بە پێچەوانەوە هەموو ڕێز لە یەك ئەگرن.

ئەم وڵاتە بە قەد ژمارەی هەموو موسڵمانی جیهان، خەڵكی تێدا ئەژی و شانی كە س بەر كەس ناكەوێت و هەمیشە سەرقاڵی سەما و موزیك، جەژن و خۆشین سەرڕای هەژاریی زۆربەی زۆریان.

چەند ژارپژێنێكی كوردزمانی عەرەب ئایدیا هاتوون بۆ ئەوەی بەهەشتی ئەو دنیامان بۆ مسەوگەر بكەن، خەریكە ئەم دنیایەمان لێئەكەن بە دۆزەخ. ئەمانە لەبەر ئەوەی كەشكۆڵەكەیان بابەتێكی زانستی  و سەردەمییانەی تێدا نییە و گوتارەكانیان بە خوێی چێشت بە ئێستامان ناتوانن ببستنەوە، یا ووتی ووتی دەیان سەدەی كۆن ئەگێڕنەوە، یا هەرچی تازەیە حەرامی ئەكەن.

ئەمانە ئاڵاكەیان ڕەشە، بەرگ و پۆشاكیان ڕەشە، دنیا و دیدیان ڕەشتر. وا ئەزانن لە كوێرە دێیەكن و  قسە بۆ كۆمەڵیك رەش و ڕوتی بێ سەواد ئەكەن، نازانن ئێستا 2019 یە، نەوەیەكی نوێ تەنانەت بێزیان لە فیلمی ڕەش و سپی دێتەوە و هەر سەیری ناكەن، چ جا بۆ چیرۆكە تۆز لینشتوەكانی سەدە ڕەشە كۆنەكان. ئەم كچ وكوڕە لاوانەی كە حەزیان لە ڕەنگاوڕەنگیی دنیایە، سەما و موزیك و خۆشی و شادی وجەژن و گەڕان بە مافی سەرەتایی خۆیان ئەزانن، ئەبێت ئەو ئازادییەیان لی زەوت نەكرێت،،،،. من ئەزانم ئەو ڕەشپۆشانە داخی ئەوەیان لە هەناودایە كە كەس گوێیان بۆ ناگرێت و دەنگی حیزبەكانیشیان ئەوەندە كەم بووە كە باشترە دایخەن، ئەگەر شەرم و شیبایان مابێت.

ئیدی هەولێر و هەرێم دەروازەی بە ڕووی جیهاندا كراوەتەوە، تازە ناتوانرێت بەرەنگاری دنیای گڵۆبالیزم بگیرێت، میللەتی زیندوش ئەوەیە كە هاوهەنگاوی جیهان بێت لە  پەیام و پێداویستییەكانی نەوەی ئەم سەردەمە،،،.

كاتی خۆی لە دوا ساڵەكانی تەمەنی عوسمانییەكان و قاجارییەكان، دوو كاتژمێرساز(سەعاتساز) لە سویسراوە  بەرەو ڕۆژهەڵاتی ناوین بەڕی ئەكەون، یەكێكیان ئەچێت بۆ ئەسفەهان و ئەوی تریان ئەچێت بۆ ئیستەنبوڵ، ئەوەی ئەسفەهان زۆر سەرسامانە لە لایەن خەڵك و دەوڵەتەوە پێشوازی لێئەكرێت، كاری خۆی ئەكات و ڕێزێكی پرشكۆی لێئەگیرێت، تەنانەت دوای مردنیشی مەزارێكی جوانی بۆ دروست ئەكەن؛ بەڵام ئەوەی ئیستەنبوڵ دوای مانگێك بە فیتی مەلاكان و بانگبێژەكان ئەكوژرێت، چونكە وا بڵاویان كردووە كە ئەمە كافرە و ئەم سەعاتەش خەڵك دوور ئەخاتەوە لە گوێگرتن لە بانگدان، چونكە ئیتر خەڵك خۆی كاتەكانی نوێژ ئەزانێت و پێویستیان بە بانگدەر نامێنیت و هەموویان بێ ئیش ئەبن،، كەواتە بە هۆكاری ئایینی و بەڵام لە ڕاستیدا بۆ پول و پۆستی خۆیان ئەم كارسازەیان كوشت.

ئەو نمونە بەسە كە هەرچەند بەربەست و بەرنگاری زانست و مۆدێرنە بگیرێت، ئاڵا رەشەكان ڕەشایی بڵاوبكەنەوە، بەڵام مرۆڤ لە بەرەوپێشچوون ناوەستێت، ئیتر با هەربۆ خۆیان هاوار بكەن. 

هیوادارم هەولێر چۆن ڕەنگەكانی ڕەنگی قبوڵە، ئاواش ڕەنگەكانی دەنگ و ئاییین و ئایدیاشی تێدا بەرجەستە بێت و ببێتە شارێك كە هەموو دانیشتوانی هەرێم و عێراق شانازی پێوە بكات.

دانا هەڵەبجەیی 



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved