کاتژمێر ٣

کاتژمێر ٣

عومەر محەمەد


574 جار خوێندراوه‌ته‌وه

یادی هەڵەبجەمان تێپەڕاندوهیچ نەگۆڕا، ئیدی نۆبەی یادی تاوانی ئەنفالە، بەڵام بەراست ئێمە یادمان کردووەتەوە؟ ئەی بەنیازین یادیان بکەینەوە؟ سەیرە..! دونیا زۆرگۆڕاوەو ئێمە هەر وەک ٢٠ساڵ لەمەوبەر یادەکانمان دەکەینەوە، زەمەن رۆیشتووەو ئێمە هەرلەجێی خۆمانین! گرنگترین گۆڕانکاری ئەوەیە کە یادی روخانی رژێمی بەعس دەکەوێتە پێش یادی ئەنفالەوە، کەچی ئێمە هەربە بەزم ونەزمی پێش روخانی بەعس یادەکان دەکەینەوە .
سەدام نەگیرابوو، یەک نەغمەبووین، گیرا هەرنەگۆراین، دادگایی کرا هەرئەوەبوین کە هەبووین، لەسێدارە درا هەرئەوەین کەهەین، بۆ ١٨ کچ وژنی ئەنفالکراوەکە زۆر خۆگیڤ کردنەوەم بینی بەڵام کاتێک وتم وەرن لەبەسرەش ژنی کورد هەیە کڕوکپ بوون، فەرموون ئەوە هەزاران ژنمان لەبازارەکانی موسڵ ورەقە هەراج دەکرێن قسەناڵێم هەنگاوتان چییە ؟
هەمان ئەونەغمەو قەوانە (دەبێت ئەنفال بەدونیا بناسین لەسەر ریتم ولۆژیکی ئەو سێوە بەو دەمە) هەردەیڵێین و دەیڵێینەوە . 
واکاتژمێر ٣ی شەو لایداوەو من هەر خەریکم، خەریکی کێشەیەکم کەکەس بیری لێناکاتەوە، یاخود بیری لێدەکاتەوەو بەکێشەی نازانێ ئاخۆ کێشەکە چی یە ؟
دزی وگزی و کۆپی پەیست ! بێ گوێدانە رێزو شکۆی زیندووەکان چ جای مردووەکان !
ئەمە کێشەیە چ لەروی یاسایی وسیاسیەوە، چ لە روی ئەخلاقییەوە. وامن لەبارەی ئەو کتێبانەوە دەنوسم کە نەنوسراون بەڵکو دزراون !
ئاخر ئەنفال دونیایەکی فراوانەو لێوانە لە ستەمکاریی و چیرۆکی تراژیدی و نیازی تۆتالیتاریزم و مەعریفەو بێ مەعریفەیی، دونیایەکە پڕە لە شکست و قارەمان و بەرەنگاری، ئەوەی لەکارکردن بێت هێندەی زەخیرە لەبەردەستدایە پێویستی بەوە نەبێت دەست بۆ (وتراوەکان، نوسراوەکان، بڵاوکراوەکان)بەرێت، ئەوەشی لەکارکردن نەبێت ئاسانە روکەش بێ و لەژیر دەمامکێکەوە دەست بۆ کاری خەڵک و رەنجی خەڵک بەرێت گرنگە ئەوەیە بەناوی خۆیەوە بێت.
ئەگەر بریارە یادی ئەنفالکراوان بکەینەوەو رێزیان بگرین دەبێت سنورێک بۆ ئەو هەموو ناهەقی و بێباکی و دڵرەقی و دەستپیسیە دابنێین، من ناڵێم ڕیشەکێشی بکەین چونکە ئەوە لەوڵاتانی تریش هەیەو تایبەت نیە بەکورد، بەڵام دزی کەس وەک هی ئێمە نیە، ئەگەر رێزی ئینسانمان بوێت دەبێت ئەوە بکەین، ئەگەر ریزی نوسین و چاپەمەنی بگرین و یادەکانی پێ شکۆداربکەین دەبێت ئەو سنورە دابنێین . ئاخر ئەگەر لەکارکردن بوونایە ٢٧ ساڵە هەمان ئەوەیان نەدەگوتەوە کە وتراوە، لە هەمووی عەیب وشورەیی تر ئەوانە دەڵێینەوە کە بیانیەکان، ئینگلیزەکان، ئەمریکیەکان وهۆڵندی وئەڵمانیەکان لەمێژە گوتوویانە، ئەوان لە دورەوە هاتوون لە دەمی خۆمانیان وەرگرتووەو کردویانە بەکتیب، کەچی ئەوانەی خۆمان دیسان لەدەمی ئەوانیان وەردەگرنەوەو دەیکەنەوە بەکتێب ! ئێ سەلامەت بن ئەوان وەرگیڕیان بەکرێگرتووەو گوێیان لەقوربانیەکانمان گرتووە خۆتۆ پیویستت بەوەرگێریش نیە ! 
سەیر لەوەدایە بیانیەکان بەبودجەی حکومەتی هەرێم کارەکانیان نەکردووە، بەڵام هاوزمانە کەمان هەرئەوەی ئەوان کۆپی پەیست دەکاتەوەو پارەی چاپەکەشی لە حزب و حکومەت و دەوڵەمەندان دەکێشێتەوەو دیسانەوە بەشەرتی پسپۆرو نوسەرو لێکۆڵیارو توێژەر و ئامادەکار بە خەڵکی دەفرۆشنەوە ! 
ئەرێ ئەگەر یاد ئاوا بکرێتەوە نەکردنەوەی باشتر نیە؟ کتێب بەدونیایەک هەڵەو پەڵەو دزی وگزی چاپ بکرێ و هەر قسەی ٢٧ ساڵ پیش ئێستا بێت نەبوونی باشتر نیە؟
بەبروای من لەیادی ئەنفالدا بە ئابرومەندانەو مۆراڵێکی بەرزەوە بێدەنگ دانیشین زۆر باشترە . !



ads

زۆرترین خوێندراوە

ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved