هەرکاک مسعود سەرۆکە

هەرکاک مسعود سەرۆکە

دەلیل جەمال


2474 جار خوێندراوه‌ته‌وه

دوای تێکەڵ کردنەوەی هەردوو حوکمەتەکەو پێکهێنانی حوکمەتی یەکگرتوو لەساڵی ۲۰۰٥ و مام جلال ڕۆحی شاد بووبە سەرۆککۆماری عێراق پۆستی سەرۆکی هەرێم بۆکاک مسعود دروستکرا، چونکە لەقۆناغی دوو ئیدارەیدا شتێک نەبوو بەناوی سەرۆکایەتی هەرێم ئەوەی هەبوو دوو سەرۆکی حوکمەت، پۆستی سەرۆکی هەرێم بۆکاک  مسعود دروستکرا

ترازان لەپێناوی کاک مسعودا
یەکێتی و پارتی و گۆڕان و یەکگرتوش باجی زۆریان دا لەپێناوی پۆستی سەرۆکی هەرێم 

٭یەکێتی لەوساتەوەی پشتیوانی کاک مسعودبوو بۆ گەشتن بە کورسی سەرۆکی هەرێم و تا درێژکردنەوەی ماوەی سەرۆکایەتی بۆدووساڵ باجی زۆری دا چ وەک نفوس و چ وەک دروست بوونی کێشەی ناوخۆی حزب و تاڕادەی ترازان

٭پارتی گەرچی سەرۆکی هەرێم سەرۆکی حزبەکەش بوو بەڵام لەپێناوی کاک مسعودو مانەوەی زۆر باجی داوە بەڕادەیەک لەناوچەکەو دەرەوش خراپ لەسەری کەوتووە ، لەڕووی دیموکراسی و دەستاو دەستی دەسەڵات و بابەت گەلی دیکە

٭گۆڕان وەک هێزێکی نوێ چ وەک ئۆپۆزسیۆن و ئەوکاتەش کە چوویه حوکمەت لەکابینەی ۸ئامانجی هەمواری یاسای سەرۆکایەتی هەرێم بوو ، لەسەر ئەوەش هەم لەحوکمەت دەرکراو هەمیش دەرگای پەرلەمانیان لەسەرداخستن و سەرۆکی پەرلەمانەکەیان ناردەوە بۆسلێمانی،

٭یەکگرتوو لەپێناوی هاوسەنگی هەردوو جەمسەرەکە باجی داو شوناسی حزبێکی بێ بڕیارو دڵڕازیکەری پێدراو دەرئەنجام دەنگدەری لێ تۆراو بویە حزبێکی بچوک. 

تەواوی کێشەکانی نێوان حزبەکان بەشی زۆری ترازانەکان لەسەر پۆستی کاک مسعود و هەمواری یاساو دەسەڵاتەکانی بوو نەمانی متمانە بۆ ئەو دۆخەی ڕابردوو دەگەڕێتەوە دەکرێ بڵێین سەرچاوەی کێشەکان و ململانێکان بوو

هەر کاک مسعود سەرۆکە؟

ئێستا کە بەفەرمی کاک مسعود وازی لەخۆکاندید کردن بۆسەرۆکی هەرێم هێناوەو کەسی دیکە کاندیدە چی لەمەسەلەکە گۆڕاوە؟
دەبینین ئەوەی دێتە هەرێم سەرەتا دەچێتە لای کاک مسعود
ئەوەی دەچێتە کۆنفراس و دیدارو سەردانی وڵاتان کاک مسعودە
ئەوەی دەچێت لەگەڵی یاوەری دەکەن وەزیرو ڕاوێژکاری حوکمەتی هەرێمن .
ئەوەی بڕیاردەدات کاک مسعودە
لەگەڵ ئەمانەشدا کەس قسەناکات کەس ناڕازی نییە کەس لەپەرلەمان هاوارناکات، کاتێک کاک مسعود سەرۆک بوو قسە هەبوو ئێستا سەرۆکیش نییەو بێدەنگن 

باشە گەر بەم جۆرە ڕازین بۆچی هەرئەوکات بێدەنگ نەبوون؟ بۆچی ئەم دۆخەتان دروستکرد؟ بەڕاست هەرکاک مسعود سەرۆک بوایە چی دەگۆڕا؟ یان ئێستا چی گۆڕاوە؟
سەرۆکی هەرێم بۆ کاک مسعود دروستکرا هەربۆیە نەدەتوانن کاندیدتان بۆی هەبێت نەدەتوانن ئەم دۆخە بگۆڕن  سەرۆکایەتی هەرێم لەناوەڕۆکدا کاک مسعود ڕۆڵ گێڕیەتی وەک ئەوەی ئێستا هەیەو دەبینرێت. 

کاک مەسعود ناچێ بۆڕاوو شکار.

زۆرێک واتێگەشتن کاک مسعود دوای سەرۆکی هەرێم دەست دەکات بەڕاوو شکاروو دەچێتەوە گوندەکەیان و بۆخۆی ئەو تەمەنەی ماویەتی لەوێ بەسەر دەبات و باخداری دەکات، 
پێشموایە کاک مسعود ناکشێتەوەو ڕۆڵی خۆی وەک سەرۆکی هەرێم دەگێڕێت و بارەگای بارزانی بەدیلی سەرۆکی هەرێمەو ئەوێ دبێتە شوێنی یەکەمی دیدارەکان و بڕیارەکان.وەک چۆن سەرۆکی هەرێم بۆکاک مسعود بۆ ۳خول زیاتر بوو بە ئەمری واقع 

بارەگای بارزانی بەدیلی سەرۆکایەتی هەرێمە.

پێموایە بارەگای بارزانیش دەبێتە ئەمری واقع و دەبێتە دامەزراوەیەکی فەرمی هەرێم پارتیش کاربۆ ئەوەدەکات لە ئایندەدا ، لەپێناوی ئەمەشدا ئامادەیە دەست بەرداری سەرۆکایەتی هەرێم ببێت، ئەم پڕۆژەیە لەماوەی ئەم چوارساڵەدا کاری بۆدەکرێت و خولی داهاتووی پەرلەمان و دەستوری هەرێم کاری جدی بۆدەکەن هەنگاوی یەکەمیش بچوککردنەوەی سەرۆکایەتی هەرێم و داماڵینی هەندێک دەسەڵاتی و ناڕاستەوخۆ کاک مسعود وەک مەرجەع مومارەسەی ئەو دەسەڵاتانە دەکات، لەڕێگەی کوڕو برازاکەیەوە.

 

دەلیل جمال



ads

زۆرترین خوێندراوە

ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved