ئایا ترامپ كەوا رەشەكەی بۆ رۆحانی ناردووە؟

ئایا ترامپ كەوا رەشەكەی بۆ رۆحانی ناردووە؟

دانا رەشید


1182 جار خوێندراوه‌ته‌وه

لە یاسای ئیمپراتۆرە كانی سەردەمی زوو تا سوڵتانەكانی ئیمپراتۆری عوسمانیش ، ئەگەر سوڵتان قەهری لە پاشا یان میری ئەیاڵەتێكی ژێر قەڵەمرەوی خۆی بگرتایە و بریاری لە ناو چونی بدایە، ئەوا بە قاسیدێكدا لە سندوقێكدا ( كەوایەكی ) رەشی بۆ دەنارد ، نیشانەی ئەو كەوایە واتە ئیتر ئێرانی واتەنی كار گەیشتوە بە ئاخەری خەت و لە بەرنامەدایە كە حەملە بكەن و تەخت و تاجی بهێننە خوارەوە ، ئیدی یا ئەوەتا میر یا پاشا خۆی بۆ شەرو هەڵگەرانەوە سازو تیار دەكرد كە لە هەموو حاڵەتێكیشدا شكان و روخان ئەنجامی بوە ، بەڵام وەك پیان وتوە شەری جوامێری ، یان بەرەو سنوری دەوڵەت یا ئیمپراتۆری دراوسێ هەڵهاتون و پەنایان بۆی هێناوە ، لە سەردەمی سوڵتان سلێمانی قانونیدا ، سوڵتان هەندێ جار ئەگەر بیویستایە وەزیرێك یا میرێك یاخود تاجرێكی گەورە سزای مەرگ بدات ، ئەمری دەكرد سەری بپەرێنن ، كاتێ مەراسیمی سەربرین دادەنرا ، جەلاد دەستی بەرز دەكردەوە بە شمشێرێكی گەورەوە دەوەستا سەیری هەردوو چاوی سوڵتانی دەكرد ، دەبوو سوڵتان هەردوجاوی دابخات واتە ئەنجامی بدە ، ئەگەر پشتی كردەوەو رۆی ئەوە كابرا رزگاری دەبوو لە سەرپەراندن ، سوڵتان ئەم كردەیەی ناو نابوو هەم عیقاب هەم سەواب ، واتە لە یەك كاتدا سزای وەرگرت كە بە راستی كەوتە سەر رای مەرگ ، لە هەمان كاتدا خێرێكی پێ كرا كە بێتەوە ژیر ئەمرو تاعەتی سوڵتانی گەورە ، 

دەوڵەتی ئێران ماوەی چل ساڵی رەبەقە لە كیشمە كیشی سیاسەتی نێودەوڵەتیدا درێژە بە جۆرە گەمەیەكی سیاسی سەیر دەدات ، سەیر چونكە لە لایەك نازانرێ گەلۆ جیهان یاری بە ئێران دەكات یان ئیران یاری بە جیهان دەكات ، لە لایەكی تر ئایا ئەم هەڵكوتانە سەر ئیرانە بەم كتوپرە سیاسەتی ئەمەریكای لە پشتەوەیە یاخود بەرژەوەندی تاجرە سیاسیەكانی دەوروبەری ترامپ ، جا بە هەر دیوێكدا بێ ، شێكسپیر واتەنی بێ یان نەبێ ئەوە پرسیارەكەیە ، 

ئەگەر ترامپ وەك بازرگانێكی سیاسی كە سەرۆكی بەهێزترین و گەورەترین دەوڵەتی دنیایە ، بە شوێن پارەو بەرژەوەندیدا بگەرێ ،ئەوا رەنگە ئێران بتوانێ لەم نێوەندەدا ئەگەر لە دەقەی ئاخەریشدا بوە خۆی بە چەمكی سیاسەتەوە بگرێتەوە بە جۆرێك لە جۆرەكان رزگای ببێ ، خۆ ئەگەر ئەمە سیاسەتی ئەمەریكا بێ و بەشوێن پاراستنی ئەمنی قەومی ئەمەریكادا بگەرێ ، ئەوا بێ شك كەوا رەشەكەیەو بە غەیری لادان هیچ مەجالێكی تری تیدا نی یە ، 

رۆژانە لە روخسارو لێدوان و خەمساردی قسەی سەرانی ئێران وا دەردەكەوێ كە بۆنی كەوا رەشەكەیان كردبێ و وەلی بیانەوێ جارێ ورە ور بە وەزعەكە بكەن بە هۆی كۆمەڵگای نێودەوڵەتی لە لایەك وە تیجارەتی ئێران و ئەوروپا لە لایەكی تر ،تا ئەو مەسەلەیە دوا بخەن ، كاتیكیش دەروانیتە توێتەكانی ترامپ كە رۆژانە بە ئاراستەی ئەزمەی ئیران دەینێریت ، وا پیشان دەدات كە بە جۆرێك خوازیاری لێكتێگەیشتنكی جدی یە بەڵام بێ پێچ و پەنا ، 

ئێران لەبەردەم دوو حاڵەتدایە ، یەكێكیان تەقینەوەی تەحەمولی گەلانی ئێرانە كە ئیدی گرانی باری گوزەران و سەختی باری دەسەڵاتی مەلا تا بیناقاقایان رۆشتوە ، ئەوی تریان ، ئەو فراوانخوازیانەی ئێرانە لە رۆژهەڵاتدا كە  بە جۆرێك بڵاو بۆتەوە كۆ كردنەوەی بە سەلامەتی و رازی كردنی هەموو لایەك گەلێ سەختە ، ئێران لەبەردەم دوریانێكدایە ، یان ئەوەتا شەپقەی ئەمەریكی لەسەر دەكات و تەسلیم بە بەرژەوەندی ئەمەریكای ترامپ دەبێ ، یان بە عەمامەكەی خۆیانەوە بەرەنگای دەبنەوە و بە شەرێكی پر خوێنرشتن و وێران كاری كۆتایی پێ دێ ، رەنگەكانی تابلۆكە بە ئاسانی لێك جیا ناكرێنەوە ، بەڵام كە كار لە نەڕەی مەرگ بۆ ئەمەریكاوە گەیشە نوزە نوزی با دەستی هاوكاری دریێژكەین ، دیارە گەرمی كەوا رەشەكە پروكانونی وەلی هەر ئومێدیان بە یاساكەی سوڵتان سولێمان هەیە لە ئاخردا خودا رەحمیان پێ بكات ، كە هەم عیقاب و هەم سەواب .

دانا رەشید



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved