ڕۆڵی میدیا یان هێزە سیاسییەكان؟

ڕۆڵی میدیا یان هێزە سیاسییەكان؟

ئازاد ئیبراهیم ئەحمەد


186 جار خوێندراوه‌ته‌وه

بەهیچ شێوەیەك لەگەڵ ئەوەدانیم بڵێین ئەم دۆخە سیاسییە پڕ تەشەنوجەی نێوان لایەنەكان بەرهەمی شێوە كاركردنی میدیاكانە. نابێت میدیا بەوە تاوانبار بكەین كە هەناسەیەكیان بۆ ئومێدبەخشین نەهێشتووەتەوە. بەڕاستی لەدۆخێكی لەم شێوەیەدا كە نێوانی حیزبە سیاسییەكان ئاڵۆزە؛ میدیایش هەر ئەوەندەی پێدەكرێت واقیع بگوێزێتەوە. دەپرسین بۆ هێزە سیاسییەكان هیواو ئەمەلێكیان هێشتۆتەوە لەنێوان خۆیاندا تاكو میدیاكانیش ئەو هیوا و ئەمەلە بگوێزنەوە بۆ خەڵكی؟!

بەپێچەوانەی هەر كەس و لایەنێك كە دەڵێت ئەم دۆخە دەستی میدیایشی تێدایە و ئەوانیش تاوانبارن، من دەڵێم نەخێر هەم میدیاكەیش و هەم دۆخە سیاسییەكەیش بەرهەمی ناكۆكی حیزبەكانن. چونكە:

یەكەم:
لەبنەڕەتدا لەلایەك هێزە سیاسییەكان خۆیان بەمەبەست ئەم هەموو میدیا بینراو، بیسراو و خوێنراوەیان بۆ جەنگێكی لەم شێوەیە دروست كرد. لەلایەكیتریشەوە كاتێك میدیا بووە میدیای تاكە كەس و بازرگانان و شیرینی نەوت و زۆن زۆنێنێ!، ئیتر سیاسەتی كاركردنی میدیا لەژێر دەسەڵاتی حیزبدا نەماو تاكە كەس بەویستی خۆی سیاسەت دادەڕێژێت. بۆیە تاكەكەسیش ئەم میدیا دەباتە جەنگەكەوە.

دووەم:
لەدۆخێكی ئاوهایشدا كە حیزبەكان ناكۆك دەبن و جگە لەهێرش بۆسەر یەكتر هیچیتریان نییە ؛ میدیاكان چی بگوێزنەوە بۆ بینەر؟! حیزب پانتایی كاری میدیاكانی داگیركردووە، باشووری كوردستان جیهانێكیتر نییە كۆمپانیایەكی قازانج نەویست هاوكاری میدیاكان بكات و ئازادی كاركردن بدات بەمیدیاكەی، ئێرە كوردستانە! لەئێرە دروستكردنی پرۆژەی ڕێگاوبان بۆ بانگەشەی هەڵبژاردنەو لەشكرێك میدیاو میدیاكار دەخرێتە خزمەت ڕوماڵی ئەو پرۆژەوە! ، كەواتە هەرگیز چاوەڕێی بێلایەنی لەمیدیا ناكرێت.

ئەو گرژیانەی ئەمڕۆ لەكوردستان دەبینرێت تەنانەت بە گرژی نێوان میدیاو میدیاكارانیشەوە، بەتەواوی شێوە هەرەمییە، لەلوتكەی دەسەڵاتی حیزبەكانەوە شۆڕدەبێتەوە بۆ دامێن. ئەگەر لوتكەی هەرەمەكە كە دەسەڵاتە كۆكبوون لەنێوان خۆیان، ئەوا ڕێگایش بە میدیا نادەن كۆكبوونیان تێكبدات و هێرش بكات، هەركە لەنێوان خۆیان تێكچوون ئەوا دەبێت میدیاو جەماوەریش هێرش بكەن و قسەیان هەبێت.

نێوانی ئەم هێزە سیاسییانە لەدۆخێكی هێرش و ئاڵۆزیدابێت یان لەدۆخێكی ئاشتی و كۆكبووندا، میدیا ناتوانێت بڕیاری خۆی بدات و تەنها پەیامی سەرەوە جێبەجێ دەكات. لەهەردوو بارەكەیشدا ڕۆڵی هێزە سیاسییەكان گەورەتر و گرنگترە بۆ هێوركردنەوەی بارودۆخەكە.

ئازاد ئیبراهیم ئەحمەد



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved