شەڕی یەكێتی و پارتی بۆچی؟

شەڕی یەكێتی و پارتی بۆچی؟

دانا هەڵەبجەیی


291 جار خوێندراوه‌ته‌وه

شەڕ ئەو كارەساتەیە كە دوو سەرۆك هەڵی ئەگرسێنن، و میللەتیش جێبەجی ئەكات. هەر وەك ئەو دوو فیلەن كە زۆران ئەگرن و میللەتیش وەك ئەو چیمەنەیە كە لەسەری تەپاوتلێ ئەكەن. لە كۆتاییدا دوو فیلەكە هەڵئەسنەوە، بەڵام چیمەنەكە وێران و ژێرپێ و لەقە ئەكەوێت.

یەكێتی و پارتی دوو هێزی سیاسی و سەربازی، ئیداری، ڕێكخراوەیین كە قەڵەمڕەوەی دەسەڵاتیان دیاریكراوە لە پانتاییەكی دیاریكراوی زەویدا.

ئەم دوو هێزە لە جەلالی و مەلاییەوە تا ئێستا بە دەیان كێرفی بەرز و نزم، شەڕ و ئاشتی، ململانێ و دەست لە ملاندا تێپەڕیوون.

مێژووییەك و ئەزمونێكی مارانگەستەیان لە پێكەوەیی و پێكدادان هەیە.

لە ماوەی ئەم شەش مانگەی سەروبەندی سازدانی حكومەتی نوێی هەرێمدا، كۆمەڵیك گەمە و گێژاو، كۆبوونەوە و تاكبوونە و نزیك و دووربوونەوەیان سازدا، هەرچەند لە پێش جەژندا كار گەیشتە ناپاكاندن و كەو ئاسا لەدژ یەكتر خوێندن، بەڵام باش بوو بە بروسكەیەك شەڕی  فەڕمی وەستێنرا،،.

بە داخەوە  میدیای نافەرمی و سۆسیالمیدیای سێبەر و هەندێ بالۆرەنووس، لە دنە و دانڕۆ كردن بەردەوامن، تەنانەت سینارێۆ و نواندنێكی بێتامانەشی تێكەوتووە.

ئەمانە نانیان لە تەنووری شەڕ و براكۆوژیدایە، جگە لە شەڕانگێزی و دەردە دەرونی، هیچی دیكە لە كۆڵ و كەماڵیاندا نییە.

ئەم پەتاییەی كە ئاسمانێك لە سوكایەتی و بنمیچێك لە بێ ڕێزی، كە هەموو سەرزەوی كوردستانی تەنیوە، هاوڵاتی كوردی بێ میزاج و مروەت كردووە،. بازاڕ بووەتە بازاڕی دەمشڕ و دەمەوەران، كاڵای بێ بەهای تەنگ ئەندیشەیان و كوڵ ئاوەزان، خراوتە سەر شۆستەكان و بواری بە پیادە نەهێشتووە هەنگاوێك هەڵنێت.

دوو بڕیاری چارەساز هەیە  لەم كاتەدا ڕەوایە بدرێت؛
یەكەم: هاوڵاتی و ئەندامانی هێزە سیاسییەكان فریوی شڵپوهۆڕی میدیا و سۆسیالمیدیای نابەرپرس و دەم هەراش نەخۆن. ئەمانە بڕیار و برەوەتی سیاسی نادەن.

دووەم: سەركردە و سیاسییە بەرپرسەكان و ژیرمەندان، بە ڕێگای دیالۆگ و ئاشتی و تەبایی، بە شێنەیی چارە و دەرمانی ئەم دۆخە بیمارە بكەن، دوور لە كۆڵنج و كەج و كوڕی میدیاكان.

ئەم هەموو بێژەر و میوانە ڕەزا قورسانەی كە دەیان ساڵە دووبارە ئەیانبینین و ئەیڵینەوە و ئەیجوێننەوە، جگە لە فشاری دەرونی و بێ ئومێدی، یەك شتیان بۆ هاوڵاتی و هێزەكان زیاد نەكردووە.

كەواتە گەركە بەر لە بازاڕی ئەوان بگیرێت و لێپرسراوانیش دڵنیایی بدەنە خەڵك كە ئەوان لە ململانێ و كۆنكرێنسی سیاسیدان، نەك دوژمنایەتی و شەڕە هێز و خێڵ و دەسەڵات.

لە 10/6/2019 لە هەولێر بۆنەسازی دەست بەكاربوونی سەرۆكی هەرێمی نوێی كوردستانە، و بانگهێشتی فەرمی سەرۆك كۆماری عێراق، هەنگاوێكی سەرەتایی تیمارسازە، بەشداری كاك بەرهەم  و پێشوازی ئەو لە لایەن  كاك مەسعودەوە، پیرۆزكردنی ئەركە نوێیەكەی كاك نێچیروان، بمانەوێت و نەمانەوێت چوونە ناو قۆناغێكی تازە و دەست خستنە ناو دەستی ئاشتی و پێكەوەییە.

ئەگەر سەرۆكی كۆمار و سەرۆكی نوێی هەرێم، كە كۆمەڵیك ئەرك و ماف و لێپرسراوییەتی گرنگ و مێژووییان لەسەرە، بتوانن ئەم بێچارەییە تێپەڕینن و دەسپێشخەری كۆتایی هێنان بن بەم قۆناغە، ئەوا ئازایەتییەكە بۆ ئەوەیان ئەگەڕیتەوە زیاتر لێبوردە و لێپرسراوانە ساردییەكەی نیوان یەكێتی و پارتی گەرم بكاتەوە.

ئیتر كاتی ئەوە هاتووە ئەو میللەتە لەوە زیاتر نەكەوێتە ژێرپێوە، لەم دۆخە تەمومژاوییەی ڕۆژهەڵاتی ناوین، با ئەو هەرێمە خۆی توشی هیچ شەڕیكی ماڵسوتاندن نەكات،،،.

هەر كەس و لایەنێك میللەتەكەمان بگەیەنێتە كەناری ئارام و ئاشتی و ئاسودەیی، شەڕ و پێكدادان و ڕق و كینە لە كۆڵ هەرێم بكاتەوە، شایانی دەستخۆشییە لەم كاتەدا، بابەتی نادادپەروەری و گەندەڵیش هیچی كەمتر لە شەڕی وێرانكاری، ئەویش ئەبێت قەلاچۆ بكرێت، ئیتر بە خۆشی بێت یا بە ترشی.

دانا هەڵەبجەیی



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved