مەراسیمی شاهانەی  شازادە نێچیرەڤان!

مەراسیمی شاهانەی شازادە نێچیرەڤان!

بێستون محەمەد ساڵح


533 جار خوێندراوه‌ته‌وه

"نیرۆن مرد ، وەلێ ڕۆما ژیایەوە"
لەسایەی حەقیبە وزاریەكەی نێچیرەڤان چوار ساڵی ڕابورد زیاتر لە  (40)ترلیۆن دۆلار حوكمەتەكەی قەرزارە ، پێی بڵێن چۆن و بۆچی؟!...

بێگومانم وەڵامەكەی دەڵێت(شەڕی داعش و دابەزینی نەوتە لە جیهان)!...

ئەو دەمەی (ناپلیۆن) نەمسا داگیر دەكات، داوا لە دەست و پێوەند و ئەفسەره ‌نزیكەكانی دەكات كە سیخوڕێك بدۆزنەوە تابتوانن  ڕۆچنە نێو سوپای نەمساو و خاڵی لاوازیان بۆ دەست نیشان بكات، پاش هەوڵێكی دانەبڕاو توانیان كەسێكی نەمساوی بدۆزنەوە كاری  قاچاخچێتی لەسەر سنور دەكرد.

دانوسانكەرەكانی ناپلیۆن توانیان بە چەردەیەك پارە لەتەك ئەم سیخوڕە نەمساویە ڕێك بكەون و تا ببێتە تەتەر و ڕێنیشاندەری سوپاكەی ناپلیۆن و دزەكردنیان بۆ نێو سوپای نەمسا.

هەر بەكردەیی و لەڕێگەی چاوساغی و زانیاریەكانی ئەم سیخوڕە سوپای ناپلیۆن توانی بگاتە شوێنێكی سەختی جوگرافیا و سنوری سوپای نەمسا.

سوپای ناپلیۆن لەشوێنە ستراتیژیەكانی سوپای نەمسا جێگیربوو، پاش ماوەیەك كابرای سیخوڕی نەمسایی بۆ دیدارێك دێتە لای ناپلیۆن.

دەست و پێوەند كابرا دەكەنە ژورەوە ناپلیۆن لە ھۆڵێكی قەشەنگ و تا چاو بڕبكا گەورە بە دەست و پێوەند میوان دەورە دراوە.

لە دوورەوە كابرای سیخوڕ دەبینێت و چەردەیەك پارەی بۆ فڕێ دەدات لە پاداشتی خیانەتە گەورەكەی كردویەتی دەرهەق نەمسا .

سیخوڕەكە وتی: گەورەم پایەداری مەزن خۆشحاڵ دەبەم و شەرەفێكی گەورەیە دەست لە نێو دەستی بەڕێزتان بنێم!..

لە وەڵامدا ناپلیۆن وتی: بەڵام من شەرەفمەند نابم دەست بخەمە نێو دەستی سیخوڕێكی گەورە دژ بەنیشتمانەكەی خۆی ئیش بكات.

سیخوڕەكە ڕۆشت و لە پشتەوە ناپلیۆن دەستێكی بەتوندی لە پشتی دا.

ئامادەبوان زۆر سەریان سوڕما لەم كارەی ناپلیۆن چونكە ئەم سیخوڕە خزمەتێكی باشی سوپاكەی كردووە، لێیان پرسی بۆ بەم شێوەیە ڕەفتاری لەتەك ئەم سیخوڕە كرد؟!..

لەوەڵامدا ناپلیۆن وتی: خیانەتكار بە خاك و نیشتمان وەك ئەو كەسە وایە دزی لەباوكی بكات و بیخاتە خزمەت دزەكانەوە، لە ئەنجامدا نە باوكی لێیخۆش دەبێت و نەدزەكانیش سوپاسی دەكەن!...

بێینەوە سەر مەراسیمە شاهانەكەی شازادە نێچیرەڤان بارزانی كە بەنیازن لە (10 حوزەیران 2019) گەورەترین مەراسیم ئامادەكارو ساز بكرێت تا شایستەی ڕێوڕەسمی سپاردنی چوارساڵی ئایندە وەك سەرۆكی هەرێم ناوزەد بكرێت و سوێندی قانونی بخوات !..

سوێندەكەی شازادە لە قانونی ژمارە (1)ساڵی 2005 قانونی سەرۆكایەتی هەرێمی هەمواركراو بەدەق لە مادەی نۆهەم هاتووە:   (سوێند بێ بەخوای مەزن ، پارێزگاری لە مافەكان و دەسكەوتەكان و یەكڕیزی و بەرژەوەندیەكانی هاوڵاتیانی هەرێمی كوردستان بكەم و ئەرك و فەرمانەكانم بەدروستی و دڵسۆزی ئەنجام بدەم.)

(بۆی مەگەڕێن ئێوە حیزب گەلێكن دونیا لەدەرگای بارگاكانی حیزبەكانتانەوە دەبینن!!...

كڵاوڕۆژنەی بارەگاكانتان سیخناخ بوە بەمەحسوبیەت و مەنسوبیەت و كاری ناشەرعی!...

واز بێنن ئێوەو چەمكی هاوڵاتیبون لەدەرەوەی بازنەی هۆشیاری دووكارلێكی كیمیاوی دژ بەیەكن دوو تەنۆڵكەی ناوكە ئەتۆمیەكی دونیا وێرانكەرن!...

لێگەڕێن ئێوە مامۆستای شەڕی ناوخۆن هاوڵاتیبون لای ئێوە چ مانایەكی هەیە؟!...)بەشێك لە وتارێكم (دەستوری هاوڵاتیبون)(سایتی سپی میدیا)1 / 9 / 2015....

بیلموناسەبە نازانم تا چەندە هەواڵەكە دروستە دەڵێن مەرسومی یەكەمی شاهانە لەلایەن شازادەوە كە هێشتا سوێندی نەخواردووە گفتی شاهانەی داوە هەركەس و خێزانێك لە هەندەرانەوە  بگەڕێتەوە بۆ هەرێمی كوردستان تەكریم و خەڵاتی مادی و  مەعنوی لەلایەن حوكمەتەوە پێ دەبەخشرێت ئەگەر حوكمەتیش نەچێتە ژێر باری ئەم مەكرەمانەوە ئەوا شازادە لە گیرفانی تایبەتی خۆی تەواوی پێویستیەكانی ژیان و بەڕێوەبردنی ڕۆژانەی بۆ مسۆگەر دەكات!...(بارگرانی و گرفت بۆ حكومەتەكەی ئامۆزا)

جا ئەوە ئەبو قاسمی شابی قەسیدەیەكی بەناوبانگی هەیە بۆ بەرخۆدان و شۆڕش و گیانی فیداكاری و خۆشەویستی نیشتمان هەموان لە ڕۆژانی ئامادەییدا وەك وانە خوێندومانە بەوە دەست پێ دەكات  و دەڵێت:

(اژا الشعب یوما أراد الحیاە     فلا بد ان یستجیب للقدر)....

وەلێ لەسایەی سیستمی حوكمڕانی خراپ و تاك حزب و میراتگری و قۆناغی دەرەبەگی زۆر لە ڕۆشنبیران دەڵێن ئەبو قاسمی شابی بمایە قەسیدەكەی ڕەش دەكردەوە!...

هەر بۆیە یەك لە ڕۆشنبیرە عەرەبەكان بەناوی (جەلال عامر)  لەسایەی ئەم حوكمرانیە فاسد و تاك ڕەوانەدا بە ئیجازەی ئەبو قاسمی شابی دەنوسێت:

(اژا الشعب یوم أراد الحیاە        فلیهاجر  فورا)...

جا ئەوە وتەیەكی (كارڵ كراوس ) هەیە دەڵێت( فەساد زۆر خراپترە لە لەش فرۆشی، چونكە لەشفرۆشی  ماهیەتی ئەخلاقی  تاك گەنە دەكات ‌، وەلێ فەساد تەواوی ئەخلاقی  دەوڵەت  گەنە دەكات)!...
وێنەیەك بۆ:...........

بێستون محەمەد ساڵح



ads

زۆرترین خوێندراوە

ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved