یەكێك لەو فاكتەرە سەرەكییانەی ، كە بووە هۆی شكستە یەك لەدوای یەكەكانی حكومەتەكانی پێش قۆناغی بەحكومەتبوونی پارتی دادو گەشەپێدانی پارتەكەی ڕەجەب تەییب ئەردۆگان ، بە تایبەتیی لەنەوەدەكانی سەدەی ڕابردوودا ؛ فاكتەری قەیرانە ئابووریی و سیاسییەكانی ئەو حكومەتانەی پێشوو بوو ، لەپاڵ شكستی سیاسەتی دەرەكیی تووركیادا ، بەتایبەتیی لەقۆناغی دوای كۆتاییهاتنی ململانێكانی جەنگی ساردو گۆڕانكارییەكانی ناو یەكێتیی شۆرەویی و ئەوروپای ڕۆژهەڵات ؛ كە یەكێك لە دەرەنجامەكانی بریتیی بوو لەكەمبوونەوەی ڕۆڵی ستراتیژیی و سەربازیی و جیۆپۆلەتیكیی دەوڵەتی تووركیا ، لەدەوروبەرو ناوچەكەدا ، وەكو ئەندامێكی لەڕادەبەدەر نازكێشراوی پەیمانی باكووری ئەتڵەسیی .
پانۆرامای ڕەوتی ئیسلامی سیاسیی لەتووركیا
پارتی دادو گەشەپێدان ، لەئێستادا گەورەترین و بەتەمەنترین ئاراستەی درێژەپێدەری كاركردنی ڕەوتی ئیسلامیی سیاسیی دەمامكداری ناو تووركیایە .
بەچەشنی هەر چوار پارتە ئیسلامی سیاسییە هەڵوەشاوەكانی تری پێش خۆی ؛ لەڕووی زنجیرەی مێژووییەوە لەدوای ڕاگەیاندنی پارتی سەعادەت ؛ ئەم پارتە بریتییە لەشەشەمین هەوڵ و دەستپێشخەریی ، بۆ دروستكردن و ڕاگەیاندنی پارتێكی تری ئیسلامی سیاسیی ئەلتەرناتیڤ لەتووركیا ؛ وەكو میراتگری ئەو ڕەوتە ئیسلامیی سیاسییە دەمامكدارەی كە لەسەر دەستی نەجمەدین ئەربەكان (٢٩/١٠/١٩٢٦–٢٧/٢/٢٠١١) ، لەسەرەتای حەفتاكانی سەدەی ڕابردووەوە سەریهەڵداوەو قۆناغی جیاجیای بڕیوەو بەردەوامە .
پارتی دادو گەشەپێدان ؛ زادەی دوو فاكتەری پەیوەست بەڕەوتی ئیسلامی سیاسییە لەتووركیا ، یەكێكیان تەشەنەسەندنی ناكۆكییەكانی ناو دوایین پارتی ئیسلامی سیاسیی هەڵوەشاوە؛ بە ناوی پارتی فەزیڵە (١٧/١٢/١٩٩٨- ٢٢/٦/٢٠٠١) ، ئەوی تریشیان ؛ دروستبوونی بۆشایی كاری ئیسلامی سیاسیی ، لەدوای هەڵوەشانەوەی ئەو پارتەو دابەشبوونی میراتەكەی بۆ دوو گرووپ ، گرووپی یەكەم بریتیی بوون لەسەركردەو كادیرە پیرە كۆنەپارێزەكانی ناو پارتی فەزیڵە كە بە (نەوەی پاسەوانە كۆنەكان) ناسراون ، ئەم گرووپە یەك مانگ ، لەدوای هەڵوەشانەوەی پارتەكە ، ڕۆژی (٢٢/٧/٢٠٠١) ، بەبڕیارو ڕێنمایی پشتی پەردەی ئەربەكان و بەسەركردایەتیی ڕەجائی كۆتان ، پارتێكی تری تازەی ئیسلامی سیاسییان ، بەناوی پارتی سەعادەت ڕاگەیاندو تا ئێستا بەردەوامن ، بەڵام لاوازو داكشاوو پەراوێزن ، گرووپی دووەم بریتی بوون لەكادرو سەركردە گەنجەكان ، كە بانگەشەی تازەگەرییان ئەكردو لەناكۆكیی و ململانێیەكی تووندا بوون ؛ لەگەڵ سەركردە كۆن و تەقلیدییەكانی نەوەی یەكەمی كاری ئیسلامی سیاسیی لەتووركیا ، لەناو هەمان پارتی هەڵوەشاوە ، ئەمانیش بەسەركردایەتیی ئەردۆگان و عەبدوڵڵا گویل و عەلی باباجان و ژمارەیەكی تر ، لەكادیرەكان و پەرلەمانتارانی پارتی فەزیڵەی هەڵوەشاوە ، ڕۆژی (١٤/٨/٢٠٠١) ، پارتی دادو گەشەپێدانیان ڕاگەیاند .
پێشینەی مێژوویی سەرهەڵدانی دیاردەی ئیسلامی سیاسیی و دروستبوونی پارتی ئیسلامی سیاسیی لەتووركیا ؛ گرێدراوە بەنەجمەدین ئەربەكان ، ناوبراو بەئەندازیارو باوكی گیانیی ڕەوتی ئیسلامی سیاسیی لەتووركیا لەقەڵەم ئەدرێت ، پێنج جار پارتی ئیسلامی سیاسیی دامەزراندووە ؛ سێجار بەئاشكرا ، دووجاریش بەنهێنیی و لەپشتی پەردە ؛ ئەو كاتەی كە كاركردنی سیاسیی ، بەیاسا لێ قەدەغەكرابوو .
ئەو سێ پارتە ئیسلامی سیاسییەی كە ئەربەكان بەئاشكراو لەلایەن خودی خۆیەوە ڕاستەوخۆ دایمەزراندوون ، بریتیین لە؛ پارتی سیستەمی نیشتمانیی (٢٦/١/١٩٧٠–٢٠/٥/١٩٧١) ، پارتی سەلامەی نیشتمانیی (١١/١٠/١٩٧٢–١٢/٩/١٩٨٠) ، پارتی ڕەفاه (١٩/٧/١٩٨٣-١٦/١/١٩٩٨) ، پارتی چوارەم و پێنجەمیش ، كە لەپشتی پەردەوە دایمەزراندوون ، بریتیین لە؛ پارتی فەزیڵە (١٧/١٢/١٩٩٨–٢٢//٦/٢٠٠١) ، پارتی سەعادەت (٢٢/٧/٢٠٠١) .
پارتی دادو گەشەپێدان .. هەڵكشان بەرەو دەسەڵات
لەیەكەمین بەشدارییكردنیدا ؛ لەهەڵبژاردنی گشتیی پەرلەمانی تووركیا ، لەمانگی تشرینی دووەمی ساڵی (٢٠٠٢)دا ؛ ئەم پارتە توانی ببێتە براوەی یەكەمی پرۆسەی هەڵبژاردن ؛ ئەویش بەهۆی قۆستنەوەی كێشەو قەیرانە كەڵەكەبووە ناوخۆییەكانی حكومەتەكانی پێشوو ، هەر بۆیە لەهەڵمەتەكانی بانگەشەی هەڵبژاردن و چڕكردنەوەی ئەرك و پەیامەكانی ئەم پارتە تازە ڕاگەیەندراوەدا ؛ بەردەوام و بەپلەی یەكەم ، جەخت لەسەر چارەسەری كێشەو قەیرانە تەشەنەسەندووەكانی ناوخۆی تووركیاو خۆبەدوورگرتن لەتێوەگلان بەكێشەو ناكۆكیی و ململانێ دەرەكییەكان و قەیرانەكانی دەرەوەی سنوورەكانی تووركیا ؛ ئەكرایەوە .
ئەم پارتە لەسەرەتاكاندا ؛ كارنامەی خۆی لەچوارچێوەی هەوڵدان بۆ چارەسەری قەیرانە ئابوورییەكان و بەرەنگاربوونەوەی گەندەڵیی و چەسپاندنی دادپەروەریی و بانگەشەو بەڵێن ، بۆ دۆزینەوەی چارەسەر ؛ بۆ كێشە سیاسییە ناوخۆییەكان بەگشتیی و كێشەی كورد بەتایبەتیی داڕشتبوو ، لەسەر ئەم بنەمایە توانی بۆ چەندین خولی تری یەك لەدوای یەكی پرۆسەكانی هەڵبژاردن ؛ بەپشتبەستن بەچەندین دەستكەوتی ئابووریی و پەیڕەویكردنی سیاسەتێكی دیماگۆكیی پڕ لەبەڵێن و پەیمان ، بۆ چارەسەری كێشەی كورد ؛ سەركەوتن بەدەستبهێنێت .
پارتی دادو گەشەپێدان ؛ وەك هەڵگرو درێژەپێدەری پرۆژەی ئیسلامی سیاسیی لەتووركیا ، بەڵام جیاوازتر لەپارت و ڕێكخراوە تەقلیدییە ئیسلامی سیاسییەكانی تری تووركیاو جیهانی ئیسلامیی ، بەمیكانیزمەو ئامرازی جیاوازتر ، بەدەمامكی جیاجیا ، بەشێنەیی و بەنەخشەی ورد ؛ دوور لەورووژاندنی میدیایی و هەنگاوی زەق و هەراسانكەر لەبەرامبەر سیستەمی عەلمانیی ؛ بەپراكتیكیی هەنگاوی ناوە بۆ ئەنجامدانی چەندین گۆڕانكاریی ، لەبواری پەروەردەو خوێندن ، سیستەمی كۆمەڵایەتیی و كاروباری ئایینیی ، بووژاندنەوەی ڕۆڵ و بەشداریی ئایینی ئیسلام ، لەناو چەندین كایەی بنەڕەتیی و گرنگی ناو كۆمەڵگەو ناو دامودەزگەكانی حكومەت و دەوڵەتدا ، لەپاڵ ئەنجامدانی چەندین ڕیفۆرمی یاسایی و دەستووریی ، بەناڕاستەوخۆش كاری ئەكرد بۆ پەكخستنی پرۆسەی بوونە ئەندامی هەمیشەیی تووركیا ، لەناو یەكێتیی ئەوروپا ؛ لەڕێگەی ڕەتكردنەوەی مەرج و داواكارییەكانی ئەو یەكێتییە بۆ بوونە ئەندامی هەمیشەیی تیایدا ، هاوكات وەكو ئەلتەرناتیڤ ؛ پارتی دادو گەشەپێدان ؛ ستراتیژی بادانەوەی بەلای ڕۆژهەڵاتی ئیسلامییدا پەیڕەو كرد .
زۆرینەی ئەو هەنگاوو گۆڕانكاریی و ڕیفۆرمانەی پارتی ناوبراو ، بۆ هێنانەدی ئامانجی شارەوەی بەئیسلامیكردنەوەی كۆمەڵگەو سیستەم و دامودەزگەكانی دەوڵەتی تووركیاو گۆڕینی ناسنامەی ئەو دەوڵەتە بووە ؛ لەعەلمانییەوە بەرەو ئیسلامیی ، لەڕووی كەلتوورو مەعریفییشەوە ؛ گەڕانەوە بووە لەكەلتوورو مەعریفەی ڕۆژئاواییەوە بۆ كەلتوورو مەعریفەی ڕۆژهەڵاتیی ئیسلامیی ، ئەم میتۆدە لەكاری پارتی دادو گەشەپێدان ؛ لەئێستادا ڕوونترو بێباكتر درێژەی هەیە .
پارتی دادو گەشەپێدان لەتووركیا ، لەماوەی نێوان (٢٠٠٢-٢٠١٤)دا ؛ توانی لەڕووی ئابوورییەوە ، بووژانەوەیەكی بەرچاو بەسەر ڕەوشی داتەپیووی ئابووریی قۆناغی نەوەدەكاندا بهێنێت ، دیارە ئەمەش بەئەنجامدانی پرۆسیەكی ڕیفۆرمی ئابووریی درێژخایەن ، شایەنی باسە بەردەوامی ئەم ڕیفۆرمانەو دەركەوتنی ئەنجامەكانی لەسەر گەشەو بووژانەوەی ئابووریی تووركیا ؛ لەپرۆسەكانی هەڵبژاردنە گشتییەكانی شارەوانییەكان و پەرلەماندا ؛ چانسی سەركەوتنی بۆ ئەم پارتە ، بۆ چەندین جار تازە ئەكردەوە .
بووژانەوەی تاكڕەویی و سووڵتانییزم
ئەردۆگان لەدرێژەی هەنگاوو سیاسەتەكانییدا ؛ لەچوارچێوەی پرۆژەی پان ئیسلامییزمدا ؛ بەڵام بەناوو بەبەرگێكی جیاوازەوە ؛ لەدەسپێكی ڕووداوەكانی دیاردەی ناونراو بەبەهاری عەرەبیی ، كارنامەی داڕشت بۆ دەستتێوەردان لەكاروباری ناوخۆی چەندین وڵات و دروستكردنی پێگەو هەژموون تیایاندا ، لەم سۆنگەیەوە پەلی هاویشت بۆ دەرەوەی تووركیا ؛ بەڕادەیەك زیاترو خراپتر لەحكومەتەكانی پێش خۆی ، بەتایبەتیی لەدەستخستنە ناو كاروباری ناوخۆو رووداوەكانی ناو سووریاو میسرو لیبیاو دواتر خۆخزناندنە ناو كێشەو ململانێ و ناكۆكییەكانی نێوان (فەلەستین - ئیسرائیل) ، (سعودییەو ئیمارات - ئیخوان موسلمین) ،(سعودییەو ئیمارات - قەتەر) ، (هەرێمی كوردستان - حكومەتی عێراق)و چەندین پەلهاویشتنی تر ؛ بەرەو وڵاتانی باكووری ئەفریقیاو چەندین وڵات وناوچەی تر لەجیهاندا.
زۆربەی هەنگاوو سیاسەتەكانی دەرەوەی تووركیا و دەستتێوەردان و پەلهاویشتنەكان ، لەدەرەنجامدا بوونەتە هۆی دروستبوونی ترس و نیگەرانیی و نائارامیی و ناكۆكیی و كاردانەوەی هێزە نێودەوڵەتییەكان و چەندین وڵاتی تری ناوچەكە ، لەبەرامبەر سیاسەتی دەرەوەی تووركیا .
پرانسیپی سفركردنەوەی كێشەو ناكۆكییە دەرەكییەكانی تووركیا ؛ كە تێزیك بوو ئەحمەد داود ئۆغلۆی سەرۆك وەزیرانی پێشووی تووركیا دایڕشتبوو ، بۆ سەرلەنوێ پیاچوونەوەو بنیاتنانەوەی سیاسەتی دەرەوەی تووركیا ؛ بەئامانجی كۆتاییهێنان بەهەموو كێشەو ناكۆكیی و ململانێ دەرەكییەكانی تووركیا ، لەسەر بنەمای ئاشتیی و دۆستایەتیی و كارو بەرژەوەندیی هاوبەش ، كەچی ئەردۆگانی سەرۆك ؛ دەستی تێخست و بەئاراستەی زیاتركردن و ئالۆزكردنی كێشەو ناكۆكییە دەرەكییەكانی تووركیای برد ، ئەم بەلادا ڕێبردنە لەسیاسەتی دەرەوەدا ؛ بووە هۆی سەرهەڵدان و تەشەنەسەندنی ناكۆكیی ناوخۆیی ، لەناو خودی حكومەتەكەو لەناو پارتی دادو گەشەپێدانی فەرمانڕەوادا ، بەتایبەتیی لەنێوان ئەردۆگان و داود ئۆغلۆدا ، دواتر لەژێر تین و گووشاری ئەردۆگاندا ؛ ئۆغلۆی سەرۆك وەزیران ، ناچار بەدەست لەكاركێشانەوە كرا .
ویستی تاكرەویی لەئاراستەی كاركردنی ئەردۆگاندا ، چ وەكو سەرۆكی پارت ، چ وەكو سەرۆكی كۆمار ؛ بەتایبەتیی پاش ئەوەی كە بەهۆی ڕیفۆرمی دەستوورییەوە ، دەسەڵاتی زیاترو گرنگتری بۆ خۆی دەستەبەركرد ؛ بووە هۆی سەرهەڵدان و تەشەنەسەندنی ناكۆكیی و ململانێی ناوخۆیی و بەرۆكی حكومەت و پارتەكەی ئەردۆگانی گرت .
ئەردۆگان لەبەڕێوەبردنی ناكۆكیی و ململانێكانییدا ؛ بەدەستێك كەوتە زەبر وەشاندن لەهاوپەیمانەكەی دوێنێ ، ئەویش بزووتنەوەی خزمەت و فەتحولڵا گوولەنی ڕابەری بزووتنەوەكە ، بەدەستێكی تریش كەوتە پەراوێزخستن و تەنگ پێهەڵچنینی نەیارەكانی لەناو حكومەت و پارتەكەیدا ، ئەمە سەرەڕای قۆستنەوەی كودێتاكەی (١٥/٧/٢٠١٦) ، بۆ پاكتاوكردنی سوپاو دەزگای پۆلیس و دەزگای دادوەریی ؛ لەنەیارەكانی خۆی .
دووبارەبوونەوەی مێژوو
مێژووییەكی نزیك لەقۆناغێكی پێش وەرچەرخان و دوای وەرچەرخان ، كە زۆرینەی كارەكتەرەكانی ماون ، یان زۆرێك لەبینەری ڕووداوو گۆڕانكارییەكان ؛ كە تەمەن ڕێی پێداون فریای هەردوو قۆناغە لەیەكچووەكە بكەون و هێشتا یادەوەرییان سیخناخە بەچیرۆكەكانی پارتە فەرمانڕەواكانی قۆناغی شكستی ئابووریی و سیاسیی نەوەدەكانی سەدەی ڕابردووو قۆناغی ئێستای پارتی دادو گەشەپێدان ؛ درك بەدووبارەبوونەوەیەكی تراژیدیی چیرۆكی ڕووداوەكان لەتووركیادا ئەكەن .
سیاسەتەكانی ئەردۆگان لەناوخۆو دەرەوەی تووركیا ؛ ئەستێرەی درەوشاوەی ئابووری تووركیای بەرەو ئاوابوون بردووە ، لەم ساڵانەی دواییدا ؛ دۆخی ئابووریی تووركیا ؛ لەگەڕانەوەدایە بۆ دۆخی خراپ و داتەپیووی قەیراناویی نەوەدەكانی سەدەی ڕابردوو ،كە بووە هۆی شكستپێهێنانی چەندین حكومەت و هەرەسهێنانی چەندین پارتی سیاسی دەسەڵاتداری مێژوویی .
ئەو دۆخە ئابوورییە خراپەی كە زەمینەی خۆشكرد بۆ بوونە ئەلتەرناتیڤی پارتی دادو گەشەپێدان ؛ بەسەر پارتە سیاسییە مێژوویی و تەقلیدییە فەرمانڕەواكانی ڕابردوو ، ئێستا خەریكە دووبارە ئەبێتەوە بەسەر پارتی دادو گەشەپێداندا .
بەدەر لەدۆخی قەیرانی ئابووریی ، تووركیا بەردەوامە لەخوولانەوە بەدەوری هەمان بازنەی ڕابردوو ؛ بۆ ڕووبەڕووبوونەوەی سەربازییانەی كێشەی كوردو ئامادەنەبوون لەگۆڕینی سروشتی ئەو كێشەیە ؛ لەكێشەیەكی ناسێنراو و ئابڵۆقەدراو بەچەمكی ئاسایش ، بۆ كێشەیەكی سیاسیی و نەتەوەیی ڕەوا .
ئەم تێڕوانینە تەقلیدییە نەگۆڕەی پارتی دادو گەشەپێدان بۆ كێشەی كورد لەتووركیا ، چەندین دەرهاویشتەی سیاسیی و ئابووریی نەخوازراوی بۆ دەوڵەتی تووركیا لێ كەوتۆتەوە ،كە تیایدا تەنها میكانیزمەو ئامراز ، لای دەوڵەت بۆ چارەسەر ؛ بووەتە فاكتەری سەربازیی ، لەم سۆنگەیەوە حكومەتەكانی ڕابردوو ، بەتایبەتیی لەهەشتاكان و نەوەدەكانی سەدەی ڕابردوودا ؛ ئەزموونێكی بێ بەرهەم و شكستخواردوویان هەیە لە ڕووبەڕووبوونەوەی ئەم كێشەیەدا ، چ لەڕووی سەربازیی ، یان لەڕووی سەقامگیریی ئاسایش ، یان لەڕووی سیاسیی.
ڕەوشی ئێستای پارتی فەرمانڕەوا
پارتی دادو گەشەپێدان ؛ لەئێستادا گیرۆدەی چەندین كێشەی ناوخۆیی پارتەكەیە ، بەتایبەتیی مەترسیی ڕوودانی لێكترازانی گەورە لەجەستەی پارتەكەدا ، شانبەشانی تەشەنەسەندنی قەیرانی ئابووریی ناوخۆو گرژبوونی پەیوەندییە دەرەكییەكانی تووركیا ، لەگەڵ وڵاتانی ئەمریكاو ئەوروپاو شكستهێنانی لەسیاسەتی سفركردنەوەی كێشەو ناكۆكییە دەرەكییەكان ، هەروەها بێ بەشبوونی لەچنینەوەی دەسكەوتەكانی ڕووداوو گۆڕانكارییەكانی ناوچەكە ، لەلایەكی تریش دۆڕاندنی چەندین شاری گەورەی تووركیا ؛ لەدوایین هەڵبژاردنی شارەوانییەكاندا ، لەناویاندا ئەستەنبووڵ و ئەنقەرە ، ئەمانە لەگرنگترین هۆشداریی و ئاماژەكانی نزیكبوونەوەی چارەنووسی ئەردۆگان و پارتەكەیەتی ؛ لەچارەنووسی پارت و سەركردە ناودارەكانی قۆناغی نەوەدەكان ؛ كە لەسەر شانۆی سیاسیی و لەناو پرۆسەی فەرمانڕەواییدا ؛ كەوتنە پەراوێزەوەو ئاوابوون .
شكستەكانی ئەردۆگان و پارتەكەی لەفەرمانڕاوییدا ؛ لەلایەك یەكێتیی ڕیزەكانی پارتی دادو گەشەپێدان ، بەرەو لێكترازان ئەبات ، لەلایەكی تریش هێزەكانی ئۆپۆزسیۆن ؛ بۆ هەڵبژاردنی گشتیی داهاتووی پەرلەمان ، تۆكمەو بەهێز ئەكات .
لەئێستادا ئەردۆگان بۆ ڕووبەڕووبوونەوەی ئەو شكستە پێشبینیكراوە ؛ كار لەسەر ورووژاندنی هەستوسۆزی بیرباوەڕی ناسیۆنالیستیی تووركیی ئەكات ، تا لەم ڕێگەیەوە باسكی خۆی بۆ هەڵبژاردنی داهاتوو بەهێز بكات ، لەهەمان كاتدا هەوڵ ئەدات ؛ ئاراستەو فۆكس لەسەر كێشە ناوخۆییەكانی پارتەكەی و شكست و قەیرانەكانی حكومەتەكەی ؛ بگۆرێت بۆ مەترسیی لەدیاردەی فۆبیای كورد ، ئەیەوێت ڕووبەڕووبوونەوەو سەركەوتن بەسەر فۆبیای كوردیی ، لەو دیو سنوورەكانی دەوڵەتی تووركیا ؛ بكاتە ڕووداوی هەرە گەورە ، بەسەر شكستە ئابوورییەكانی ناوخۆ ، هەروەها ئەیەوێت قوورسایی و كاریگەریی لێكترازانی ناو پارتەكەی كەم بكاتەوە ، هاوكات ئەیەوێت دۆڕاندنی شارە گەورەكانی دوایین هەڵبژاردنی شارەوانییەكانی پێ پەردەپۆش بكات ، لەكۆتا جاریشدا ئەیەوێت تێكشكانی فۆبیای كورد ؛ بكاتە دەسكەوتێكی نەتەوەیی گەورە بۆ بووژانەوەی پارتەكەی و خۆی بكاتە سیمبوولێكی كاریزمیی نەتەوەیی ، تاكو ئەو سەركەوتنە بكاتە خۆراكی هەڵمەتی بانگەشەی هەڵبژاردنی گشتیی داهاتووی پەرلەمان ، وەك چۆن بۆڵەند ئەجاوید(٢٨/٥/١٩٢٥-٥/١١/٢٠٠٦)ی سەرۆكی پارتی چەپی دیموكراسیی ؛ پرۆسەی دەستگیركردنی سەرۆكی پەكەكەیان قۆستەوەو كردیانە سەركەوتنێكی نەتەوەیی گەورەو هەڵبژاردنی ساڵی (١٩٩٩)یان پێ بردەوە .
هەڵبژاردنی داهاتووی پەرلەمان لە تووركیا ، پێشبینیی ئەكرێت ببێتە قوورسترین پرۆسەی هەڵبژاردن ، لەبەردەم ئەردۆگان و پارتەكەی ، بۆیە ئەردۆگان بۆ درێژەپێدان بەسەپاندنی پێویستییبوونی مێژوویی خۆی و پارتەكەی ؛ بەشوێن گۆچانێكی سیحرییدا ئەگەرێ و تەنها تێكشكانی فۆبیای كوردیی لەبەردەستدا ماوە ، پێناچێت نەیارە دەرەكییەكانی لێ بگەرێن ؛ ئەم گۆچانە سیحرییە ؛ بكەوێتە دەستی ئەردۆگان وفریای بكەوێت !! .
نیاز سەعید عەلی
ئەم وتارە دەربڕی بۆچونی نووسەر خۆیەتی