کەرکوک و حیزبە کوردیەکان

کەرکوک و حیزبە کوردیەکان

مەلا فرمان


309 جار خوێندراوه‌ته‌وه


ئەم حیزبانە لە روی رۆڵ  و دەسەڵات و هەڵوێستا دەکرێن بە  2  دو بەشەوە:
1- پارتی و یەکێتی :
- ئەم دو حیزبە لە دامەزراوەکانی کەرکوک رۆڵیان هەبوە و بەدەستیانەوەبوە و خاوەن بریاربون. ئێستاش  بێ دەسەڵاتن و چەند بەڕێوەبەری دائیرەیەک بەدەستیانەوەیە. پارتی لە دەرەوەی سنوری پارێزگای کەرکوکە.
- لە بەغدا و لای هاوپەیمانان بە شێوەی حیزبیانە دەمسپێتی کەرکوک دەکەن.
- پشکیان هەیە لە سەروەت و سامانی ئەم شارە.
- ئاسایش و پێشمەرگە لای ئەم دو حیزبەیە.
- لە هەڵبژاردنە پڕ ساختەکاریەکانی پەرلەمانی عێراق نەیانهێشتوە  جگە لە خۆیان نوێنەری هیج  حیزبێکی تر دەربچێت.
- بەرپرسن لەو ماڵوێرانیەی بەسەر کەرکوک و کەرکوکیەکان هاتوە. ماڵوێرانیەکە هێند گەورەیە بەو رادەیەی بۆ سوککردنی باری  گلاوی خۆیان هەریەک ئەوی تر تەخوین دەکات، نمونە : ١٦ ئوکتۆبەر = ٣١ ئاب.
2- حیزبەکانی تر
- بۆ ئامادەبون لە کۆبونەوەکان زۆر ساز و ئامادەن و تێیاندا هەیە جوت پێ وەستاوە.
- لە هیج بریارێکدا پرس و ڕایان پێناکرێت.
- گوێڕایەڵی زۆریان تێدایە. 
- تەنها لە لاوازی هەڵوێست نەبی لە ئاست روداوەکان و ماڵوێرانیەکە بەرپرسنین.
- دەیانەوێ هەنگاو بنێن، بەڵام لە دویاندا نایەت.
لە ٢٠٠٣ بۆ ئێستا نمونە زۆرن، بەڵام پێموایە ئەم دو نمونەیەی خوارەوە بەسن:
1- لە سەرەتاوە دیاربو باسکردن لە دانانی پارێزگارێک بۆ کەرکوک وەک ماسی سەوداکردنە لە دەریا، بەڵام لەگەڵ ئەوەش لە دیاریکردنی ئەم پارێزگارە، ئەو حیزبانە وەک میوانیش  پارتی و یەکێتی بانگی نەکردن.
2- ئێستاس بۆ شاندی دانوستاندن لەگەڵ بەغدا  لەسەر پرسی کەرکوک جگە لە پارتی و یەکێتی نوێنەری هیج حیزبێکی تێدا نیە.
کەرکوک و بڕیاردان
بڕیاردان لەسەر کەرکوک لای کێیە؟ کادرەکانی کەرکوک یان خەڵکانی تر؟.
1- ریفڕاندۆم: بەشی هەرەزۆری کادرەکانی کەرکوک لەگەڵ ریفڕاندۆم نەبون لە کەرکوک. بەڵام لە سەرکردایەتی پارتی و یەکێتی بریاری لێدرا  و جێبەجێکرا. حیزبەکانی تریش هیچیان لە دەست نەهات، جگە لە  نەخێرەکەی نەوەی نوێ ئەوانی تر زۆر شەرمنۆکانەبون.
2- ١٦ ئوکتۆبەر:  لە پشتی کەرکوکیەکانەوە بەرنامەی بۆ داڕێژرا. حیزبەکانی تر ئەم فرسەتەیان نەقۆستەوە.
3- جگە لە هەڵبژاردنی ٢٠١٨ ، زۆربەی کەرکوکیەکان یەک لستیان بە زەرور زانیوە. بەڵام ئەوە سەرکردایەتی حیزبەکانە بەربەستیان بۆ دروست کردوە.
4- تەواوی کەرکوکیەکان پێیان باشە ، چەمچەماڵ و دوز ...هتد، بگەڕینەوە سەر کەرکوک. بەڵام سەرکردایەتی حیزبەکان  بە هۆی تەسکبینی حیزبی و بەرژەوەندی بازرگانیەوە دژی گەڕانەوەیانن. لە کاتێکدا گەڕانەوەی ئەم قەزا و ناحیە و گوندانە بەشێکن لە مادەی ١٤٠.   
5- دزین و بە تاڵانبردنی سەروەتی سەرزەمین و ژێرەکەی ، بەبڕیاری کێ بو؟ کێ بردێ؟ بۆ کوێ بردرا؟
رێگە چارە
لە ٢٠٠٣ وە بە کرداری دەرکەوت کە:
1- حیزبی دەسەڵاتداری کوردی شکستی تەواویان هێناوە لە ئیدارەدانی کەرکوک و ناوچە دابڕاوەکان. 
2- مانەوەی پارتی و یەکێتی ( نەوەکانی خوا لێخۆشبوان مام جەلال و مەلا مستەفا)  لە دەسەڵات بەو شێوەیەی رابردو و ئێستا، نەک هەر دوارۆژی کەرکوک ، بەڵکە هەرێم و بزوتنەوەی کوردایەتیش دەخەنە سەر دوریانی هات و نەهات. ئەمەش راستیەکە باشتروایە بەر لە هەمو کەس خۆیان پێی بزانن.
3- لە پرسی کەرکوکدا هێزەکانی بەناو ئۆپۆزسیۆن بونە بە رابردو.
گروپی فشار
کەواتە،  تاکە چارەسەر لای رۆشنبیر و سیاسی و خەمخۆرانی کەرکوک  خۆیانن. ئەم خەمخۆرانە پێویستە گروپی فشار دروست بکەن بۆ چارەسەری کێشەی شارەکەیان،  گروپێک هێند بەهێزبێت حیزبەکان لە دەرگای بدەن نەک بە پێچەوانەوە. 
ئەرکەکانی ئەم گروپە
1- فشاری جدی لەسەر حیزبە کوردیەکان و بەغدا دابنێن. بەشداربن لە بڕیاردان و ئاگاداری ئاراستەی روداوەکانبن.
2- پەیوەندی لەگەل یونامی و هاوپەیمانان دروست بکەن.
3- ، کاریگەری بەرچاویان لەسەر شەقامی کەرکوک هەبێت و ببنە جێی متمانەیان.
4- چاودێری زیندوکردنەوەی لیژنەکانی جێبەجێکردنی مادەی ١٤٠. 
5- فشارکردن بۆ پەیداکردنی پشتیوانی مادی  و مەعنەوی  تا بتواندرێت  زەمینەی گەڕانەوە بۆ کەرکوک سازبکرێت:
- رۆشنبیر و سیاسیەکانی کەرکوک لە هەرێم.
- ئاوارەکانی کەرکوک.
6- پێداچونەوە بە پەیوەندیەکان لەگەڵ پێکهاتەکانی کەرکوک.
7- راستە حیزبە کوردیەکان ماڵوێرانیان بەسەر کەرکوک هێناوە، بەڵام واقعێک هەیە پێویستە ئەو گروپە بە شێوەی تەندروست مامەڵەی لەگەڵ بکات. هۆکاری خێر بێت بۆ نزیکبونەوەی لایەنەکان لە یەکتر.  لە هەنگاونان باشترە  بیری دژایەتی و هەمو جۆرە کینە و رقێک وەلاوە بنێت. لە ئاست هەر هەڵە و ناهەقیەک دەنگ هەڵبڕێ و پەنا بۆ شەقام بەرێ.
8- دوای ئەم هەنگاوانە پێکهاتەی کورد  روسپیتر دەردەکەوێت و دەتوانێت لە خزمەتی کەرکوکدا بێت. بە بێ ئەم هەنگاوانە هەر هەوڵدانێک جگە لەوەی ئاسنی ساردکوتانە ، درێژەدانیشە بە شکستەکانی رابردو.




ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved