هەندێك لە دامەزراوە ئەمنیەی وهەواڵگریەكان كاتێك دەیانەوێت لێكۆڵینەوە لەگەڵ بە بەندیەكی سیاسی بكەن دوو جۆرە كەس بەو ئەركە هەڵدەستن دەكات بەمبەستی وەرگرتنی ئیعتراف ودانپێنانەكەی:
یەكەم: ئەفسەرێكی توندوتیژ وتوڕە وبێ بەزەیی، كە هەموو جۆرە ئەشكەنجەی جەستەیی ودەروونی لەگەڵ بەكاردەهێنێ.
دووەم: ئەفسەرێكی نەرم وهێمن ورووخۆشی بەبەزەیی -بەروكەش-، كە هەمان مەبەستی هەیە لە وەرگرتنی ئیعتراف ودانپێنان لە بەندكراوەكە؛ بەڵام بە شێوازێكی دبلۆماسی وگفتوگۆ ودانوستان وبەڵێنی ئازادكردن ئەگەر هاتوو هاوكار بوو.
فرسەت سۆفی نمونەی خۆپێگەیاندنی كوڕە هەژارێكە كە توانویەتی بەبێ پشتگیری عەشیرەت وسەروەت وسامانێكی بنەماڵەكەی بگاتە بەرزترین پۆستی كارگێری پارێزگایەكی گەورەی وەكو هەولێر كە پایتەختی هەرێمە -هەرچەندە نەوازاد هادی پێشوشی هەمان ئەو خەسڵەتەی تێدابەدی دەكرا-.
بەڵام چەند راستیەك هەیە لە خوارەوە روونی دەكەمەوە:
1- ئەو بەڕێزە هەرچەندە دكتۆرای هەیە لە یاسا ومامۆستا یاسایە لە زانكۆ، خۆی بە پرۆسەیەكی نادیموكراتی كراوەتە پارێزگار؛ چونكە ئەنجومەنێك دەنگی پێداوە كە خۆی ماوەی بەسەرچووە ولەلایەن پەرلەمانەكەی خۆیان ماوەكەی بۆ درێژكراوەتەوە بێ ئەوەی كاتێكی دیاریكراو دەستنیشان بكرێت بۆ هەڵبژاردنی ئەنجومەنی پارێزگاكان. ئەمە جگە لەوەی لەیاسا بنەڕەتیەكەدا هەیە كە دەبێ پارێزگار لەناو ئەندامانی ئەنجومەن هەڵبژێردرێت نەك لە دەرەوەی ئەنجومەن كەسێك دابنێن.
2- هەرچەندە لە ماوەی رابردووە، خەڵكێكی زۆری رۆژنامەنوس وچاڵاكوان وكادیری حزبی -بەبێ زانیاری وئاوەڕدانەوەی بابەتیانە لە رابردووی فرسەت صۆفی- پیاهەڵدانێكی زۆری بەسەركرا كە گوایە كەسێكی ئەكتیڤ وچاڵاك وچاونەترس بووە لە پرۆسەی چاكسازی و روبەڕوبونەوەی گەندەڵی؛ بەڵام ئەو بەڕێزە لە ماوەی زیاتر لە چوار ساڵی رابردوو كە ئەندامی پەرلەمانی كوردستان وئەندامی لیژنەی باڵای رووبەڕووبونەوەی گەندەڵی بووە بەفەرمانی مەسعود بارزانی كە باڵاترین دەسەڵاتی هەرێم وحزبەكەی خۆی بووە، نەیتوانیوە تەنانەت یەك كەیسی گەندەڵی یەكلابكاتەوە وتەنانەت یەك گەندەڵیش بداتە دادگا ولەپرۆسەیەكی یاسایی وشەفاف بەرهەمی رووبەڕبونەوەی گەندەڵیەكەی ببینین. زۆر خۆشحاڵ دەبوین وجێگای رێز دەبوو ئەگەر بیتوانیبا لەكەیسەكانی نەوت یاخود باج و گومركەكان و خزمەتی گشتی و خانەنشین و پاسەوانی بەرپرسان و هەروەها لە بواری موڵك و ماڵی گشتی لە زەوی و زار و زیادە رۆیی و زیادەرۆیی لەسەر كارەبا و ئاو و زەوی، یەك وەزیر، نا یەك بەرێوەبەری گشتی، نا یەك قائمقام، نا یەك بەڕێوەبەری ناحیە، نا یەك سەرۆك بەشی شاروانیشی بدابا دادگا، نا بیدابا لیژنەیەكی لێكۆڵینەوە، نا لێپرسینەوەی لەگەڵ یەك بەرپرسی بچوك بكردبا.
ئەو بەڕێزە لەگەڵ هاوپیشەكانی هەردەم خۆیان دزیوەتەوە لە چاكسازی ورووبەڕوبونەوەی گەندەڵی بە پێكهێنانی لیژنە لەدوای لیژنە ودەركردنی راپۆرت لەسەر راپۆرت. توانیوتەی هەردەم خۆشی دەرباز بكات لە بەرپرسیارێتیە گەورەكە بەبەخشینەوەی تۆمەتی گەندەڵی بە (گشت حزبەكان)؛ ئەوەش بۆ ئەوەی گەندەڵی هەردوو حزبە دەسەڵاتدارەكە سپی بكاتەوە بە تۆمەتباركردنی حزبەكانی تری وەك گۆڕان وكۆمەڵ ویەكگرتوو وشیوعی وهتد... من لێرەدا ئەستۆ پاكی نابەخشم بە حزبەكانی دەروەی پارتی ویەكێتی؛ بەڵام چۆن دەكرێ ئەو حزبانەی نەوت وگاز ودەروازەی سنوری وباج وهێزی سەربازی نەبێت یەكسانی بكەیت بە حزبەكانی دەسەڵات كە گیرفانی حكومەت وگیرفانی حزب وبەرپرسەكانیان یەك گیرفان بێت.
لە كۆتاییدا پێویستە ئاگاداری پیاوە باشەكان بین زیاتر لە خراپەكان؛ چونكە ئەوەی پیاوە خراپەكان بە توندوتیژیەكانیان تێیدا سەركەوتوو نەبوون بە هێمنی پیاوە باشەكان فریونەدرێین (وإن غدا لناڤره قریب).
رەعد رەفعەت
ئەم وتارە دەربڕی بۆچونی نووسەر خۆیەتی