قارداش...

17/10/2019

پشکۆ ناکام


دوابەدوای هێرشە بەڕبەڕییەکەی سوپای دەوڵەتی پاشماوی عوسمانی بۆ سەر رۆژئاوا ، زۆرێک لە ووڵاتان و دامەزراوە جیهانییەکان هەریەک بەجۆرێک و بە ئاستێک ئیدانەی ئەو هێرشەیان کردوە لە ئیدانەی زارەکی تا سزادانی ڕژێمەکەی ئێردوگان ، بەڵام نە ئەوەی ناویان ناوە پارلەمان و نە ئەوەش کە خۆی ناوناوە حکومەت!!! لە هەرێم تا ئێستا و بەڕەسمی هیچ هەڵوێستێکی پشتگیریی لە رۆژئاوا دەرنەبڕیوە و" کالعادە" خۆیان کردوە بە کەڕەی شەربەت نەبادا پریشکێکی ئەم ئاگرەیان بەرکەوێ چونکە خۆیان لە فیتی خۆیان باش ئەزانن و خۆیان چاک ئاناسن ، پارلەمانی "سوید" کە پارلەمانی بەشێک لە کوردستان نیە بەهەزاران کیلۆمەتر لە رۆژئاواوە دوورە و ئاڵای کوردستان بەسەرییەوە نیە و لەوحەی هیچ جامانەبەسەرێکی لێ نیە بڕیاری سزایانی تورکیای دەرکردوە، بەڵام بەناو پارلەمانەکەی هەرێم!!نقەی لەخۆی بڕیوە ، ئاخۆ پارلەمانێک کە پاشکۆی حیزب نەک خەڵک بێت بە هیچ تەڕ ئەبێت..؟ لەوانەشە پارلەمان سەرقاڵ بێ و نەپەرژێتە سەر ئەوی چی ئەقەومێ ئەوەی پارلەمانتاران لە گفت و گۆیەکی مێژوویی و فەرهەنگیان کە ئاخۆ ڕێکەوت یان بەروارە!!

تا ئێستا بۆیان ساغ نەبۆتەوە کامیانە تا ئەگەر بەیاننامەی ئیدانەیان دژی تورکیا نووسی بزانن لەسەری بنووسن ڕێکەوت یان بەروار.هەر حکومەتیشە خۆی گرمۆڵە کردوە و ئەوەنەی تر بچووک بۆتەوە ، خواخوایەتی کەس پێی نەڵێ " بۆ قسە ناکەی؟" چونکە باش ئەزانێ بڵێ لەل تورکیا هەموو نهێنییەکان ئەخاتەڕوو" نهێنی گرێبەستە نەوتی و سەربازییەکان" ، جگە لەوە بەناو حکومەتەکەی هەولێر ڕۆحی چوە گەر خوانەکردە زمانی زەلەی کرد و منجەمنجێکی کرد بەدڵی تورکەکان  نەبێت ئەو کاتە تورکیا بکشێتەوە لە پارێزگاری کردنی بنەماڵە و پارتی پاشکۆی لە ناکۆکیەکانیان لەگەڵ هێزی گەریلای باکور ، جگە لەوەش داخستنی سنوور بە ڕووی بەقاچاخ بردنی نەوت و داهاتی گومرگ و لەلایەکی تریشەوە "ئەنقەرە" گرێ بەستە نەوتیە نهێنییەکان هەڵبوەشێنێتەوە ، جا بەناو حکومەتەکەی هەولێر کە بنەماڵە وەک "کێک" خۆی دروستی کردوە تا بینەقاقای لەقەرزایە ئەو کاتە گۆڵمەزەکە خۆش ئەبێت...

ئەمانە هەمووی لە لایەک و ئەوەی ئەمڕۆ تورکیا ئەیکات دەسەڵاتی هەولێر بەشێوازی بچووکتر و پێشتر ئەنجامی یاوە هەر لە هەڵکەننی جاڵ بەدرێژایی سنووری ڕژئاوا و نەهێشتنی گەیشتنی هاوکاری ئینسانی و پزیشکی بۆ خەڵکی مەدەنی و چاوساغی کردن بۆ " میت" و دروستکردنی هێز و حیزبی کارتۆنی،، کەواتە زیا ووتن نیە گەر بڵێین ئەم هێرشە تورکیە بە جۆرە ئەجندایەک لە خزمەتی دەسەڵاتی هەرێم و دژ بە خەڵکە ، دەسەڵاتێک خەڵکی بەشەکانی تری کوردستان لە کەمپێکا ئابڵۆقە بات چۆن بڕوا بەهاوسۆزی ئەکرێت. كاتێک کە چەن سەربازێکی تورکی کوژران بەناو سەرۆکی حکومەتی ئەوکاتە بە پەلەپروسکێ و لەخۆیان لاوانەوەوە گەشتە تورکیا و پرسەی بنەماڵە و حکومەتەکەی ڕاگەیان ، ئاخۆ جورئەتێک شک ئەبرێت کە هەمان بنەماڵە و هەمان دەسەڵات ئیدانەی ئەم هێرش و مەرامە داگیرکارییەی تورکیا بکات..!!
ئەوەی لەڕۆژئاوا رووئەیات زامێکی کوشەندە و تراجیدیایەکی ئینسانیە ، هەرچیەک بکرێت بۆ تیمار کردنی کەمە ، بەڵام ئێمەش خۆمان لە باشوور تووشی زامێکی درێژخایان بووین کە رێگرە لە بەتەنگەوە چوونی رۆژئاوامان و یارمەتی و هاوکارییان ، ڕۆژئاوا ڕووبەڕووی هێرشی تورکیا بۆتەوە ، ئێمەش لەژێر دەستی دەسەڵاتێکی گرێ دراوی هەمان تورکیا  کەنەفت کراویین ، تورکیا نازی ئاسا بەربۆتە ڕۆژئاوا ، حکومەتی هەرێمیش خەریکی نەوەت  ناردنە بە بەلاش ، چونکە پارەکەی دەمێکە وەرگیراوە و خەشنۆش کراوە...ئێمە شەرفانانمان لە سەردەمە ئەوانیش قارداش....

ئەم وتارە دەربڕی بۆچونی نووسەر خۆیەتی