خوا ئەقڵی ئەوەندە بەدادگەری دابەش كردووە، كەس بەشی خۆی پێ كەم نیە (دیكارت)
مەعریفە كۆیلەی ئامرازەكانیەتی (محمد شحرور)
زیاتر لە چارەگە سەدەیەكە، كورد لەباشوردا ئاشنای دەسەڵاتی خۆماڵی خۆی بووە، بەڵام ئەو دەسەڵاتە نەك هەمیشە دووچاری قەیران بووە، بەڵكو هەر لەخۆیدا دەسەڵاتێكی قەیراناوی بووە، دەسەڵاتێك بووە، بەردەوام لەژێر هەیمەنەی نەریتی خێڵ و حیزبدا بووەو، هەموو جومگەكانی ڕەنگدانەوەی دیوەخانگەرایی و دۆگمابوونی ناوچەگەری بووە، هیچ كات كارەكتەرە سەرەكیە بەردەوامەكانی لە زەمەنی ئێستادا ڕەویان نەكردووەو، هەمیشە بارگاوی بوون، بە ڕابردووی دوور و نزیكەیانەوە، هەڵبژاردن و دیاریكردنی خاوان بڕوانامەی بەرز كاریگەری لەسەر گۆڕینی شێوازی حوكمڕانی و بەرەو پێشچوون و گەشەی دەسەڵات نەبووە، چونكە بیرۆكە و پێشنیارەكانیان یان ڕەتكراوەنەوە، یان بەر لە خستەڕوویان خۆیان بەگوێرەی خواستی گەورەكانیان قاڵب بەندیان كردوون، كەهیچی وای لێنەماتەوە، یان بەكەڵكی سودگەیاندن نەماوە، تاكو ئەم دۆخە بەردەوام بێت، یان خۆی قەیرانی تر دەخوڵقێنێ، یان توانای بەرگەگرتنی قەیرانە سەپاوەكانی نابێت.
ئەم ڕۆژگارەی ئەمڕۆ كە دونیا پێیدا گوزەر دەكات، ئەگەرچی چەند مانگێكە بەهۆی تەشەنەسەندنی ڤایرۆسی كۆڕۆناوە، بەڵام كاریگەری چەندین ساڵەی لەسەر دیدگا سیاسی و ئابووریەكان داناوە، ڕوونە ئەگەر ئێستا كۆتایی بەم ڤایرۆسەكوشندەیە بێت، دەوڵەتە زلهێزەكان ئەگەر ئابووریەكەیان هاوكاریان بێت و بەزلهێزیان بهێڵیتەوە، ناچنەوە پێشبڕكێیەكەی پێشتریان كە ماشینەوەی دەستكەوتیان بووە، لەبەرهەمەئابووری و تەكنەلۆژیەكانیان و، درێژەدان بە ململانێ سیاسی و سەربازیەكان لە ڕێگەی بریكاریەكانیانەوە، بەڵكو بەمیكانیزمی نوێ و، گوڕوتینی نوێوە هەوڵی دابەشكردنەوەی جیهان و، پراكتیزەكردنی سیستەمێكی نوێی جیهانی دەدەن، كە زۆرترین سود بۆخۆیان بێت و، هاوپەیمانیەتیەكان لەنوێ داڕێژنەوە، ئەگەر هاوپەیمانیەتیەك لەگۆڕێ بمێنێ، چونكە دەنگە ناڕازیەكانی ئێستای یەكێتی ئەورووپا دەكرێ بە سەرەتای گۆڕینی هاوپەیمانیەتیەكان بزانرێن.
بۆئەم بارودۆخە نوێیە، كەڕوونیە كەی دێت، بەڵام ئەوە ڕوونە، تاكو ئەم قەیرانە جیهانیە بەهۆی ئەم ڤایرۆسەوە بەردەوام بێت، ململانێكانی داهاتوو قوڵترو قورستردەبن و، ڕەنگدانەوەو كاریگەریشیان لەسەر دەوڵەتە خاوەن سەرچاوەسروشتیەكان و دەستی كار زیاتر دەبێت.
بۆیە وەكو دەست پێشخەری و ئامادەكارییەك، ئەم حكومەت و پەرلەمانەی ئێستا هەڵبوەشێتەوەو، ئەنجومەنێك لە پسپۆڕانی ئەكادیمی سیاسی و ئابووری و تەكنۆكرات پێكبهێنرێت و، حیزب و لایەنەكان چۆن ئێستا ناتوانن بەموو لە ڕێنماییە پزیشكیەكان و شارەزایانی تەندروستی لابدەن، بەهەمانشێوە پەیمانی وابەستە بوون و لانەدان، لەنەخشەو پلانەكانی ئەوان بدەن و، سەرجەم جومگەكانی بەڕێوەبردنی ئەم حوكمڕانیە بە دەستوور و یاسای بەڕێوەبردن بە ئەقڵی پەتی و دور لەهیچ هەژمون و كاریگەریەك داڕێژنەوەو، هاوسەنگی و هەمانگی بۆ ئەم حكومڕانیە لەسەر ئاستی هەرێمانیەتی و جیهانی دروستبكەن ، دواتر ڕێگە بۆ هەڵبژاردن و هاوبەشی لایەنەكان، بە ڕەنگ و بەرگی نوێوە بكەنەوە، كەسەر لەبەری جیاواز بێت لە ڕابردوو، لە پێناوی مانەوە و، سەلامەتی ئەم میللەت و حكومڕانیەی دا، چونكە سەر لە بەری داهاتوو، لە ڕابردوو جیاوازە.
دڵشادی مەلا عەوڵڵا
ئەم وتارە دەربڕی بۆچونی نووسەر خۆیەتی