دەسەڵاتی سادی و كۆمەڵگای ماسۆشی

27/05/2020

مەجید ساڵح

ئەمیل سیوران فیلسوفی رومانی: نائومێد بوونی خەڵك بەگشتی هۆكاری سەرەكی لەناوچوونی نەتەوەكانە، هەر نەتەوەیەك توشی ببێ، بۆ هەتا هەتایە ناتوانی جارێكی دیكەلەسەر پێی خۆی بوەستێتەوە.

(1)
چەمكەكانی "سادیزم" و "ماسۆشیزم" لەسەرەتادا وەك دوو زاراوەی بۆ پێناسەكردنی رەفتاری سێكسی تاكەكان دەركەوتن و زانایانی دەرووناسی بۆیان دەركەوت مرۆڤەكان لە كاتی سێكسدا حەزیان لە ئازارە، "سادیەكان" چێژ لە ئازار و ئەزیەت و تەنانەت كوشتنی بەرامبەرەكەیان وەردەگرن و "ماسۆشیەكانیش" پێیان خۆشە بەرامبەرەكەیان ئەوپەڕی توندوتیژی و ئازاریان بدات و بە ئیهانەكردنیان دەگەنە حاڵەتی "Orgasm".

بناغەی زاراوەی سادیزم دەگەرێتەوە بۆ رۆمانوس و ئەفسەری فەرەنسی "ماركیز دو ساد" كە لەسەدەی هەژدەیەمدا ژیاوە و چەندین جار بەهۆی رەفتارە توندوتیژەكانی لە كاتی سێكس كردندا زیندانی كراوە، لە رۆمانەكانیشدا بانگەشە بۆ توندوتیژی دەكات لە كاتی سێكس كردندا.

بەڵام ماسۆشیزم دەگەرێتەوە بۆ ناوی رۆمانوسی نەمساوی "لیبولد زاخر ماسوش" كە لە سەدەی نۆزدەیەمدا ژیاوە. هەردوو زاراوەكەش لە لایەن زانای دەرونناس "ریچارد فون كرافت إیبنج" داهێنراون

 (2)
بەڵام لە ئێستادا بەكارهێنانی ئەو دوو چەمكە تەنیا لە مەسەلەی سێكسدا قەتیس ناكرێن و لە زۆر بواری دیكەی وەك رەفتاری توندوتیژی خاوەن هێز و دەسەڵاتەكان بۆ ئیهانە كردن و سەركرز كردنی نەیارەكانیان، یان حەزی تاكەكان بۆ خۆمەزڵووم پیشاندان و تەنانەت چێژ وەرگرتن لەوەی نەیارەكانی ئیهانە و سەركرز و ئازاری بدەن، بەكاردێن.

لەوەش زیاتر لە ئێستادا ئەو دوو زاراوەیە بۆ دەرخستنی رەفتاری حكومەتەكان بەرامبەر كۆمەڵگانیان و كۆمەڵگاكان بەرامبەر حكومەتەكانیان بەكاردێت و دەكرێ هەندێ كۆمەڵگا بە "كۆمەڵگای سادی" و هەندێكی دیكەش بە "كۆمەڵگای ماسۆشی" ناوببرێن.

(3)
مێژوو پێمان ئەڵێ هەندێ ماوی كەمی لێدەرچێ، ئەگینا كۆمەڵگای ئێمە هەزاران ساڵە لەژێرداگیركەریدا ژیاوە، بەشی زۆری ئەو داگیركەرانەش هەموو شێوازەكانی سادیزمیان بەرامبەر بە كورد بەكارهێناوە، ئەوەش كەسایەتییەكی نێگەتیڤ و ملكەچی لەلای تاكی كورددا دروست كردوە؛ هەستی خۆ بەكەم زانین و نەمانی متمانە بەخۆكردنی لە ناخی كۆمەڵگاكەماندا بەرادەیەك چاندوە چێز لە ئازار وەردەگرێ. 

لەرووی دەروونییەوە بەشێكی زۆری كۆمەڵگای ئێمە تا رادەی كۆیلایەتی پێی خۆشە خزمەتی داگیركەرەكەی بكات و هەر فەرمانێك لەلایەن ئەوەوە پێی بكرێت بێ بیركردنەوە جێبەجێی دەكات. 

لە دوای راپەڕینەوە "سادیەت"ی داگیركەران جێگەی خۆی بۆ سادیەتی فەرمانڕەوایی حیزبە كوردستانییەكان چۆڵ كرد، رەفتاری دەسەڵاتی خۆیی لە هەندێ رووەوە گۆڕا، بەڵام مەسەلەی ئازاردانی كۆمەڵگا و بەرپاكردنی گۆمی خوێن لە شەڕی ناوخۆی چوار ساڵەدا گەیشتە ترۆپك. كۆمەڵگاش لە رێگەی دابەش بوونی بەسەر حیزبەكاندا،  و بوون بە سوتەمەنی ئاگری ئەو شەڕە درێژەی بە رەفتارە ماسۆشیەكەی خۆیدا.

لە دوای شەڕی شێوازی سادیزمی دەسەڵات و ماسۆشیزمی كۆمەڵگای ئێمە گۆڕانی بەسەردا هاتووە. هەردوو حیزبی دەسەڵاتدار لە نێوان خۆیاندا پارەو دەسەڵاتیان برابەش كرد، لە رێگەی میدیا و سۆسیال میدیاكانیانەوە سادیەتیان بەرامبەر كۆمەڵگا لە شەڕی كوشت و بڕەوە گۆڕی بۆ شەڕی نائومێد كردن و نادادپەروەری كۆمەڵایەتی و ژێر پێخستنی یاسا....

كۆمەڵگاش ماسۆشیزمی خۆی گۆڕی بۆ ئەوەی بەشەوقەوە گوێ لە خستنەڕووی مەسەلە نێگەتیڤ و نائومێدكەرەكن بگرێ، بەڕادەیەك لە ئێستادا كۆمەڵگای ئێمە تا زیاتر باسی كێشەوگرفت و خراپی دۆخەكە و پیشاندانی رەشبینی بۆ بكەیت، زیاتر جێگەی پەسەندیت، تا زیاتر تۆی نائومێدی و رەشبینی بەگوێدا بدەی زیاتر بە ئازا و زانا و چاونەترست دادەنێت، تەنانەت ئەگەر باسی تروسكایەك لە ئومێد و خۆشبینی بۆ بكەیت، یەكسەر تۆمەتی ئەوەت بۆ هەڵدەبەستن كە تۆ لەبەرامبەر ئەوەدا پارەت وەرگرتووە.. جێگەی داخە كۆمەڵگای ئێمە بگاتە ئەو رادەیەی چێز لە رەشبینی و نائومێدی و خۆئازاردان ببینێ و لەسەری رابێت.

پرسیارەكە ئەوەیە تاكەی ئەمە بەردەوام دەبێ؟ لەوەش گرنگتر ئایا ئێمە نەگەیشتوینەتە ئەو مەترسیەی كە ئەمیل سیوران باسی دەكات؟

مەجید ساڵح


ئەم وتارە دەربڕی بۆچونی نووسەر خۆیەتی