ئەو پیاوەی کەس ناوی نازانێ!

25/11/2020

عەبدولڕەزاق شەریف

بۆ یەکەمجارو کتێبێک، پێیان ئەوت نامیلکە، دیراسەیەک بوو بەکوردی لەسەر شێوازی بەرهەمهێنانی ئاسیایی (نمط الانتاج الاسياوي)، بەنهێنی کەوتە ناو ڕێکخستنەکانی کۆمەڵەوە لەشاخ‌و شار، سەرەتای هەشتاکان‌و ئەوکات لەئەدەبیاتی مارکسیزمدا، بەتایبەت لەبوارەکانی ئابوری سۆشیالیزم‌و مەتریالیزمی مێژویدا، ئەم باسە لەناو شیوعیەکانی ڕۆژهەڵاتی ناوه‌ڕاستدا، بابەتێکی نوێ بوو، قسەی زۆری لەبارەوە ئەکرا، هەمیشە بۆ ڕەتکردنەوەی تیوریستە شیوعیە عەرەبەکان‌و لەمەسەلە فکرییەکاندا، ئەبوایە ئێمەیش وەک کۆمەڵەو وەک ڕێکخراوێکی کوردستانی مارکس لینینی لۆژیکی وەڵامدانەوەمان هەبێت.

ئەوکاتەی ئەو نامیلکەیە بەناوی فەرید ئەسەسەرد بەدەستمان گەیشت‌و خوێندمانەوە، لەهەموو کتێبخانەی عەرەبیدا، سەرچاوە لەسەر ئەو مەسەلەیە لەپەنجەی دەست تێنەئەپەڕی، حەتمەن یەکەم نوسینیشە لەکتێبخانەی کوردیدا، شک نابەم بەدوایدا، هیچیتر نوسرابێ.

 ساڵ هات‌و چوو من گەیشتمە بەرگەڵو، لەبارەگای ئێزگەی گەلی کوردستان‌و لەناو مقەڕو ژیانی پێشمەرگایەتیدا، ئاواتێکم هاتەدی خاوەنی ئەو کتێبەم ناسی، نازانم بۆچی ئەو سەردەمە ئەوەی بەنوسین‌و لەدورەوە ناوت بیستبون، تەمەنای دیدارت ئەکردن، کە چاوت پێیان ئەکەوت پەشیمان ئەبویتەوە لەوەی کە پیاوی خەیاڵەکانی تۆ نەبون؟ من لەگەڵ فەریدو  شێرکۆ بێکەس‌و زۆری تر توشی ئەو پارادۆکسە بوم، چاوەڕێم ئەکرد ئەو بەڕەختی تفەنگ‌و حەماسی پێش شەهیدبونی شۆڕشگێڕێکەوە ببینم، بەڵام لەبێدەنگیدا وەک عاشقێکی بێ ئومێد، بەگوفتار وەک ئەکتەرێکی کۆمیدی، بەڕەفتار پیاوێکی بێ پەروا، دواتر تێگەیشتم بەعەقڵ‌و بیرکردنەوەش هاوشانی مام‌و کاکە نەوە ڕێکخەرو مونەزیری خەونە گەورەکانی شۆڕش‌و کۆمەڵەو یەکێتی نیشتیمانی کوردستان بوو.

دوای ڕاپەڕین داوای لێکردم پێکەوە سەردانی ناو هەولێر بکەین، ئێمە لەگەڵاڵەوە بەخاکی سوتماکی باڵەکایەتی‌و دەشتی هەریرو خۆشناوەتی دوای جەنگ‌و دوای ئەنفالدا ئەڕۆیشتین، هێشتا بەعس لەهەولێرو دوا خاڵی ئازادکراوی ئێمەش پیرمام.

گەیشتینە سیلەی کۆڵانێکی شارو ڕوخسەتی سەعاتێکی وەرگرت‌و لەچاو ونبوو، من بیستبوم ئەو لەحەفتاو حەوتەوە لەقەندیل‌و لەبەرگەڵو چەندینجار ڕوخسەتی وای وەرگرتوە دوای شەش مانگ بەکۆڵێ کتێبەوە سەری دەرهێناوەتەوە، بۆیە وتم شەش مانگت پێنەچێ من شارەزای هەولێر نیم!؟

دڵنیای کردم کە دێتەوەو دروست لەکاتی خۆیدا هاتە ناو ترومبێلەکەو من شۆفێرو ئەویش پیادە وتی: بۆ شەقڵاوەو بۆ ماڵی مام جەلال.

ئەمویست قسە بکات‌و دەنگی ماتۆڕی ئۆتۆمبیلەکە نەبێ هیچم نەژنەوت، پێشئەوەی بەسەفیندا داگەڕێین وتم: خوات بێت قسەیەک بکە، چی بوو؟ بیر لەچی ئەکەیتەوە؟ کەسوکار سەلامەتن؟

ـ لەهەولێرەوە تا ئێرە پەنجاوشەش جار گێڕەکەت گۆڕیوە !!

کەزانی لەو وەڵامە قوشقی بوم وتی: باشە چوم ژنم هێنا‌و ئەچم بەمام جەلال ئەڵێم! بەو هەواڵە ساردی کردمەوە.

گەیشتینە ماڵی مام‌و لەهۆڵەکەی خوارەوە هەر بەپێوەو پێش گفتوگۆ مام وتی: فەرید بیستومە بەتەمای ژن بخوازی؟ دەمودەست فەرید وتی: بەتەمام لەوانەیە!
ـ ناوی چییە؟
مام ئەو پرسیارەی لەفەرید کردو ڕوی لەمنیش کردو وتی: پانزە ساڵەو ناوی خۆی پێ نەوتوم ئێستا چۆن ناوی ژنەکەیم پێ ئەڵێ؟ ئەویش وتی: مام جەلال کە پێویستیکرد ناوەکەیت پێ ئەڵێم.