ئەگەر بەرواردێكی تازەترین تیۆری دروستبوونی گەردون و كونە ڕەشەكە و تەقینە گەورەكە و كوانتۆم، لەگەڵ دۆخی نەتەوەی كورد (هەرێمی كوردستان) و دروستبوونی سیستەمێكی سیاسی دادپەروەر و هاوسەنگ بكەین؛ نە ئەوەندە ئەتوانرێت بە ئاسانی راڤەیەكی ساكاری بۆ بكرێت و نە ئەوەدندەش بە سانایی و سەرپێی ئەتوانرێت تێگەیشتمان بۆی هەبێت، هەردووكیان بە جۆرێكی جود دنیادیدی بۆ ئەكرێت،،،.
جوینەوە و وتنەوەی گەندەڵاندنی دەزگاكانی حكومەت. شیعر و شانامەكانی تاوانباركردنی یەكێتی و پارتی، پرتە وبۆڵە و بەیاننامە گرژ و مۆنەكانی ئۆپۆزسیۆن، خۆنواندن و باڵفشكردنەوەی حیزبە وردەواڵە چەكدارەكان، وە مشتومڕە بێ ئەنجام و بێ ئاكامەكانی دەموچاوە دووبارەبووەكانی سەر شاشە ئێچ دییەكان، ڕاگەیاندن و كۆنگرە ڕۆژنامەوانییەكانی وەزیرە لاڵەپەتییەكان؛ نە دۆخی سیاسی و ئابووری دانیشتوانی هەرێمیان پێ چاك ئەكرێت، نە چارەسازی قەیرانەكانی گوزەرانی خەڵك بوون و ئەبن.
میللەت لەنێوان پەردەپۆشكرنی دەسەڵات و پەردەهەڵماڵینی ئۆپۆزسێۆندا گیریان خواردووە، ژیانیان لی بووتە قەوانێكی سواو و قوڕسواندنێكی ڕۆژانەی بێ فەڕ، بە دیوارە گڵییەكانیان.
هەرێمی كوردستان(تەنانەت عێراقیش) لە چاوەڕێیەكی مەنگ و مەلولدان، چاوەڕێیەكی دەستەوەستان و خۆخەڵەفاندن كە هەموو چاوبەڕێی پەرچویەكی ناكاو ئەكەن، كە خۆیان و ناوچەكە سەراوژێر بێت، وە دەمداچەقیوی هەڵگەراندنەوەیەكی بنەرەتین كە ڕووبدات.
گلۆربوونەوەی بەهای لیرەی توركی و ڕیاڵی ئێرانی، پێكەوە دانولە نەكوڵانی شیعەكانی عێراق، پەشۆكاوی سونەكان، پەست و پەروازەیی حیزبە كوردییەكانی باشوور، دیالۆگی ڕۆژئاڤا و حكومەتی سوریا، خوێنساردی(باوەڕ پێنەمان)ی خەڵك بۆ وە بە هەڵبژاردن، بێچیقڵدانی ئەمریكا و ئێران وتوركیا، بەرامبەر یەك و هتد؛ ئاماژەی گۆڕنكارییەكی گەورەن لە خۆرهەڵاتی ناوەڕاست ئەكات.
پەیام و ئاماژەكانی ئەم دۆخەی ئێستا، جگە لە بێ چارەیی و بێ ئومێدی خەڵك، هێزە سیاسییەكانیشی گەیاندوەتە ئەو بڕوایەی كە كار لە دەستی ئەواندا نەماوە و ئەوەندە پارچە وپەرتەوازە بوون، كە ئەتوانم بڵێم مەحاڵە ئیتر نیشتمان و نەتەوە و ئاینیش بتوانێت هاوساز و كۆیان بكاتەوە.
ئەوانیش(سوودمەندانی عێراق و هەرێم) لە تونێلە تاریكەكان گیریان خواردووە، نە پول پاوەركەیان ئەتوانێت، دەسەڵاتی ڕەها بخاتەوە دەستیان، نە ئەشتوانن دەستبەرداری ئەو دۆلار و دەزگایە و ئەو گزی وفزییە بن، كە دەیان ساڵە كەڵەكەیان كردووە بۆ دەسەڵاتەكەیان.
كەواتە یا ئەوەتا ئەبێت میللەت وەك گیسكەكەی هەیاسی خاس، ڕۆژیك یا ماوەیەك قەڵەو و رۆژێك لاواز، ڕۆژێك تەڕوتوش و ڕۆژێك وشكەساڵی بێت، یاخود ئەوەتا لە هیچەوە ببن بە هێز و ووزە وەك تەقینەوە گەورەكە.
بژاردەیەكی خێرای چەتونگەرا لەبەردەستی هێزە سیاسییەكان هەیە، كە ئەتوانرێت دەستپێشخەرییەكی جەسوورانەی نیشتمانیی بكەن، بە هاوكاری و پاڵپشتی ئەمریكا بڕیارێكی یەكلاكەرەوە بدەن كە دەریخەن لەگەڵ سیاسیەتی نوێی ترامپن لە ناوچەكە، وە دەستهەڵگرن لە هەژموون و بەردەسیەتی ئێران و توركیا. چونكە ناوچەكە بەرەو ئەو كەنارە ئەڕوات كە یا ئەبێت لەگەڵ سیاسەتی ئەمریكا بێت یا نا، وە چارەنووسی حكومەتە ئانتی ئەمریكاییەكانی ناوچەكە چۆن لە هەڵوەریندان، ئاواش میللەتەكانیان توشی قەیرانی ئابوری و سیاسی و داڕمان و ئاژاوە و پاشاگەردانی ئەبێت.
یاریكردنی سێرك ئاسا لە سەر پەتی نێوان جەمسەرە گەرم و ساردەكان، گەورە و بچوكەكان، ئەنجامەكەی هەر كەوتن وهەڵوەشاندن و هەڵوەڕین ئەبێت.
تا كاتی ئەنجامدانی هەڵبژاردنەكانی كوردستانیش، نیشانەكانی گۆڕانكارییەكان زیاتر دەر ئەكەون.
ئیتر یا وەك گیسكەكەی هەیاسی خاس مانەوەیە، یا خۆئامادەكردنە بۆ تەقینەوە گەورەكەیە، كە لە كاو و ناكاوێكدا ناوچەكە بە گشتی ئەگرێتەوە.
دانا هەڵەبجەیی
ئەم وتارە دەربڕی بۆچونی نووسەر خۆیەتی