هەردوو حزبی سیاسی یەكێتی و پارتی لە خولی پێنجەمی هەڵبژاردنی پەرلەمانی كوردستان ، زۆرینەی دەنگەكانی هەرێمی كوردستان بەدەست دەهێنن ، بە تایبەت یەكێتی كە پێشتر لە پەرلەمانی كوردستان خاوەنی 18 كورسی پەرلەمانی بووە واچاوەڕوان دەكرێت ، لەم خولەی هەڵبژاردنی پەرلەمانی كوردستان لە سێبەری دروشمی ( خزمەت و هەلی كار و ئارامی ) ژمارەی كورسییەكانی زیاد بكات و واش پێشبینی دەكرێت ژمارەی كورسییەكانی لە نێوان ( 22 بۆ 26 ) كورسی پەرلەمانی بێت.
سەرباری ئەوەی پارتی بەسەرۆكایەتی ( مەسعود بارزانی ) بەهەرشێوەیەك بێت دەیەوێت ژمارەی كورسییەكانی زیاد بكات و كورسییەكانی لەناو پەرلەمان بكاتە (43 ) كورسی پەرلەمانی ، بەم ئەنجامە چاوەڕوانكراوە ، هەرێمی كوردستان بەرەو دووجەمسەری دەچێتەوە.
هەژموون و دیاردەی ئۆپۆزسیۆن بوون لای خەڵك چیتر وەك رابردوو سەنگ و كاریگەری نامێنێت ، بەڵكو لەم ماوەی بانگەشەی هەڵبژاردن دەركەوت كە هاوڵاتیان لە هەرێمی كوردستان بەدووی دەرفەتێكی دی دەگەڕێن تا ژیانیان خۆش گوزەران بكات ، خەڵكی ئەم هەرێمە بە ئەزموونی سیاسی خۆی باش لەوە گەیشتووە كە هەرێمی كوردستان ناتوانێت لەو دوو هێزە زیاتر ئەڵتەرناتیڤێكی باشتر بدۆزێتەوە هەرلەبەر ئەوەش ئەو دوو هێزە واقعی بەڕێوبردنی ووڵاتن ، لەم هەڵبژاردنەدا خۆری ئاسۆی یەكێتی گەش دەبێت و پارتیش وەك هێزی یەكەمی سیاسی لە هاوكێشەی سیاسی لە هەرێمی كوردستان دەمێنێتەوە.
لە دوای 30 سێپتەمبەر كە دوارۆژی ئەو مانگەیە ، پەڕەیەكی سیاسی نوێ لە ژیانی سیاسی كۆمەڵگە هەڵدەدرێتەوە و هەردوو واقع پێكەوە بە هاوبەشی لە سەر بنچینەی كار و كرداری خزمەت ئەم هەرێمە بەڕێوە دەبەن لە سەر ئاستی عێراقیش لەدوای ئەم دەرئەنجامانە كۆدەنگی كوردی لە بەغدادیش دروست دەبێت .
رێبین عومەر
ئەم وتارە دەربڕی بۆچونی نووسەر خۆیەتی