لە مەسەلەی كورددا، بەتایبەت لەم بەشەی باشووریدا، یەكێك لە هۆ گرنگەكانی تێكشكانە یەك لە دوای یەكەكانی، دابەشكردنە، لە هەموو رووەكانییەوە، سیاسی، بیركردنەوە و رەفتاری، بە واتایەكی تر، بناغەی تێكشكاندنەكان لەسەر ئەم جوداییە هەڵچنراو بوون، بۆیە هەمیشە دیوارەكە لار بووە و بە ) با) یەكی تۆزێ بەهێز هەرەسی هێناوە و چینەكانی كەمدەرامەتی ئەم بەشە لە نەتەوەكەی بوون بە ژێرەوە، مانای بناغەكە كوردستانی نەبووە، هەر حیزبە بۆ خۆی، جا وەرە و بڕوانە، دابەش بوونەكە تا چ رادەیەك ڕۆ كراوەتە ناو هۆش و ڕۆحی ئەم بەشە لە نەتەوەكەوە.
كەسیان دروستبوونەوەی تاكی كوردیان، لە بەرنامەیاندا نەبوو، كە هیوادارین، ئەو هێز و بیر و كەسایەتیە دڵسۆزانەی كە هێشتا ماون و ڕوانینی تریان هەیە، بەدەر لە ڕوانینی. ئەو دەستە و پارتانەی لەسەر ناكۆكی دروست بوون، بتوانن ئینسانێكی كوردی دی پەروەردە بكەن، كە ئەمەش دەبێت لە ( ڕەفتار و كرداردا)، بسەلمێنرێ، ئێمە پێویستمان بە چەندین گاندی و ماندێلا هەیە بۆ دروست بوونەوە.
ئێستا كاراكردنەوەی پەرلەمانێكی ناكارا، جێبەجێ بوو، بەو جۆرەی كە بینیمان، بەرپرسان و زۆرێك لە پەرلەمانتاران خۆشحاڵ و ئەمبەشەش لەنەتەوەكە لە چاوەڕوانی گۆدۆدایە.
دەڵێم ڕەنگە سیزیفش كورد بووبێت، بۆیە بەردەكەی هەمیشە لێ گلۆردەبووەوە، لە لوتكەوە بۆ دۆڵەكە.
لە كوردستان و لە باشوورەكەیدا تا چاو بڕكا و دڵ حەزنەكا، بەرپرس فرە و لێپرسراو وا لە قات و قڕیدا، ئا لەم حاڵەتەدا، ئەركی ئەو كەسانەیە كە بە پاكی ژیاون و گەندەڵ نەبوون و چاك رەفتاریان كردووە و جا ئەگەر پێویست بووبێ قسەیان كردووە، ئەركی ئەوانە كە قسەی دڵیان بكەن، تۆ ناچار نیت، قسە بكەیت، بەڵام ئەگەر قسەت كرد، دەبێ راستی بێژی.
ئاوا كردنەوەی پەرلەمان لەوسەرەتایانەی دروستبوونی هەرێمەوە. هەنگاوێكی دروست بوو بە هیوای چوونە ناو قۆناغێكی نوێوە لە بزوتنەوەی سەدان ساڵەی ئەم نەتەوەیەدا، ئومێدی زۆری لەسەر بنیات نرا و نەتەوەكە لەهەرچوارپارچەدا پشتیوانی خۆیان پیشاندا، كوردەكە ئاهێكی تێهاتێ و ئێدی شتەكان لە بیر چوونەوە.
مرۆڤ دەبێت شتی خراپ لە دڵیدا نەهێڵێ، ئەمە بۆ ژیانی رۆژانە فرە چاكە، بەڵام رووداوە گشتییەكان و تێكشكانە نەتەوەییەكان دەبێت فرە بە ووردی لێكۆڵینەوەیان بۆ بكرێت و كەسایەتی و رێكخراو و هۆكان دیاری بكرێت و لە جێگای خۆیاندا دابنرێن، چونكە تێكشكانی نەتەوەیی بەرۆكی نەتەوەكە دەگرێ، وەك تێكشكانی دەستە و تاقمێك نییە، بۆیە دەبێت لێكۆڵینەوەی لەسەر بكرێت بەمەبەستی دووپات نەبوونەوەی.
بەڵام وەك شاعیر دەڵێت " خەم دەوامی زۆرە، زوو دەڕوا لەدڵ سەیر و سەفا" ئەم دڵخۆشییە زۆری نەخایاند، پەرلەمان داخراو، خەونەكان بوونە، تراویلكە و دیسان ئاهەكان لە سینەدا تاسان.
ئیتر پەرلەمان نەیتوانی ئەو رۆڵەی خۆی لە چەسپاندنی یاساكانیدا بگێڕێت و كەی ویستیان دەرگایان داخست و كەیش گەرەكیان بووە، دەرگایان كردۆتەوە، لە باشووری كوردستان، بەهانە بۆ رق و كینە و پێك هەڵپژان، هەمیشە هەیە، ئێستا بەتەیبەت لەم ساڵانەی دوایدا، ئەمە بۆتە كلتوری سەردەست و دیار، بردویانەتە ناو كۆمەڵگا ، خێزان و بازار و پەیوەندیە كۆمەڵایەتییەكانی بە تەواوی شێواندوە، رق ئاسان و خۆشەویستی فرە سەخت بووە، ئیتر ئەوە ئاكامی رەفتاری دەسەڵات و بوونی زەمینەی دەیان ساڵەیە، لەناو ئەم بەشە لە نەتەوەی كورد دا، گەشەكردنی ئەم رەفتارانەی ئاسان كردوە.
حاڵی بەشەكانی تریش لە ئێمە باشتر نییە، بەتایبەت رۆژهەڵات كۆپی باشوورە ( حیزبەكانیان )، كە ئەو سەرچاوە بووە، ئێستا بەهۆی حزبەكانییەوە گەرەكییەتی باشوور كۆپی بكاتەوە، كە سپاس بۆ خوا، ئەم كۆپی كردنە لە رووبەرێكی تەسكدا، لە ناو حیزبەكانی ڕۆژهەڵاتدا ماوەتەوە و، هیوادارین تەشەنە نەكات بۆ ناو ئەو بەشە لە نەتەوەكەمان لە ڕۆژهەڵات.
زەمینەی باشتر بیركردنەوە لە ڕۆژهەڵات بەهێزتر و ڕەسەنترە، كە ئەو ئومێدەمان پێدەبەخشێ.
بوونی پەرلەمانتارانی هۆشمەند و نوێنەری راستەقینەی خەڵك، مەرجی یەكەم و لە پێشینەی، ژیانێكی شەرفاتمەندانە و پێكهێنانی ژینگەیەكی گونجاو و كۆمەڵگایەكی یاساییە بۆ گەشەكردنی تاكەكانی كۆمەڵ بە ئاراستەی یەكتر قەبووڵ كردن و ڕاهێنانی تاكەكانی نەتەوەیەك و پێدانی توانای بەرگری كردن لە مافەكانی خۆیان، بەو مەرجەی كە پەرلەمانتاران وەكیلی ڕاستەقینەی ئەم بەشە لە نەتەوەكە بن، دەنا ......بوون و نەبوونیان چ لە حاڵی هاوڵاتیان ناگۆڕێ، كورد پەرلەمانتاری خەمخۆری مەسەلە نەتەوەیەكەی دەوێ.
نەك هەرزەوەكیلانی شاری خامۆشان..!!!
بۆ ئەوەش، جارێكی تر، چەكدار و بێ چەك، ئازاد و دیل، بچوك و گەورە، كوڕ یا باوك، دەولەمەندن و بیدەرامەت، قارەمان یا ترسنۆك، دۆرا و یا سەركەوتوو، نەتوانن دەرگای ئازادیی و شوێنی دانانی یاساكان (حكومەت وكۆمەڵ دەبێت یاسا بیانبات بەڕێوە)، بۆئەوەی هیچ هێزێك نەتوانێ سنووری ئەو شوێنە ببەزێنێ، من پێشنیاری ئەوە دەكەم كە فراكسوێنە ئۆپۆزسێۆنەكانی ناو پەرلەمانی كوردستان، داوای هێزێكی نێونەتەوەیی بكەن بۆ پاراستن و بەرگری لە دەنگی خەڵك، تا ئەو كاتەی ئەم بەشە لە نەتەوە، بە مێژووی خۆیدا دەچێتەوە و دەرسی لێ وەردەگرێ و ئیدی خۆی دەگاتە ئاستێك لە ئازادی، كە لێپرسینەوە قەبوڵ بكات و بەرپرسیاریش هەڵگرێ و بۆ قارەمانەكانی جێ نەهێڵیت!!!.
سەرنج / پێش چوونی ( گۆڕان بۆ ناو حكومەتی بنكە فراوان) ئەوەیان بە زۆر لە بەرپرسەكانیان وت، كە مانەواتان تەنها مەسەلەی كاتە، بە گوێیان نەكردین، كە پەرلەمانیان داخست، پێشنیازیان پێكردن، لەو شوێنەدا كە ڕێگای چوونەوەیان نەدرا، پەرلەمانی كوردستان بە چەند خانوویەكی با لە قوڕش بێت پێك بێنن، نەیان بیست، وتیان بەسەر شاخێكدا سەركەون و بڕۆنەوە ناو پەرلەمان، گوێیان پێنەداین، هاتنەوە بۆ سلێمانی و وتیان زوڵمان لێكراوە!!!
دوو هەزار و پێنج سەد ساڵە، زوڵم لە كورد دەكرێت، كێ بیستی؟!، یان ئەگەر زوڵم لێكرنەكەشیان سەلماند، چیان بۆ نەهێشتنی ئەم زوڵمە ئینسانییە كرد؟!
ئەگەر نەتوانی خۆت بسەپێنی و بوونی خۆت نەسەلمێنی و ڕیگای ڕزگاربوونت لێ هەڵە بووبێت، كەس لە رێی خوادا ئەوەت بۆ ناكا و خوداش بەندەیەكی خۆشناوێ، دەرس لە مێژووەكەی وەرنەگرێ.....
ئەوا جارێكی تر گۆڕان، چوەوە ناو حكومەتێكی بنكە تەسك، ئەوە هەڵوێستی خۆیانە و بڕیاری خۆیانە نەك بڕیاری زۆرینەی دەنگدەرانشیان، بەڵام ئەگەر ئەمجارە، دەركران و چاكسازیان بۆ نەكرا ( كە بۆیان ناكرێت)، تكایە هۆش و كاتەكانی خەڵك، چی تربە خۆتانەوە مژوڵ مەكەن و بەفیڕۆ مەدەن.
چونكە ئێمە پاساوەكانمان ئەزبەر كردووە، ئێدی باشترە دان بە شكستی یەكم و دووەمتاندا بنێن و خەونی ڕەنگاو ڕەنگ بۆ ئەم بەشە لە نەتەوەی كورد نەبینین. نانەكەیان لێ سەندووین، گەرەكتانە
بە پێدانەوەی نیوەی نانە دزراوەكەمان، ستایشتان بكەین؟!!
كامەران قازی
ئەم وتارە دەربڕی بۆچونی نووسەر خۆیەتی