١٢١ ساڵ لەمەوبەر رۆژی ٢٢ی نیسانی ساڵی ١٨٩٨ یەکەمین رۆژنامەی کوردی بەناوی کوردستان لە شاری قاهیرە دەرچوو، کە سەرنووسەرەکەی میقداد مەدحەت بەدرخان بوو، بەلەبەرچاوگرتنی جیاوازی زۆری بارودۆخی رۆژنامەگەریی ئەوسا و ئێستا، دەتوانین بڵێین لە سەردەمی ئیستاماندا کاریگەرییەکانی رۆژنامەگەری کوردی بەسەر کۆمەڵگای کوردستانی روون و ئاشکران، تاڕاددەیەکی زۆر رۆڵیان هەیە لە گۆڕینی بیرکردنەوە و ئاراستەکانی مرۆڤی کوردستانی، بەوەی کە ئەم بوارە لەگەڵ رەوڕەوەی پێشکەوتنەکاندا گۆڕانکاری بەرچاوی بەسەردا هاتووە، خێراتر و وردتر لە جاران مەبەستەکانی دەپێکێت، بەڵام لەگەڵ ئەوەشدا دەتوانین بڵێین رۆژنامەگەریی لە وڵاتی خۆماندا هەم بێ کەموکوری نەبووە و هەمیش دەکرا زۆر باشتر لەوەی کردوویەتی خزمەتی بکردایە، بەتایبەت لەبەرئەوەی لە قۆناغێکداین هێشتا لە ئاستێکی پێشکەوتووی کاری پرۆفێشناڵانەدا نین، بەو مانایەی لە رووی داڕشتن و زمانەوانی و بێلایەنی و پیشەییەوە کەموکووری زۆر بەدی دەکرێت، بێجگە لەوەی تا ئێستا نەمانتوانیوە تەنانەت لەو مشتوڕانەشدا بەشداربین لە نێوان لایەنگرانی رۆژنامەی کاغەزی و ئەلیکتڕۆنیدا ئەنجامدەدرێن، ئەوەی کە جاران لەم ڕووەوە بەیەك رۆژ دەکرا، ئێستا لەیەك چرکە و خێراتریش ئەنجامدەدرێت، ئەوەی کە جاران چەند کەسێك دەیانتوانی دەستیان بە رۆژنامە بگات ئێستا بە هۆی سۆشیاڵ مێدیاوە هەموو کەسێك دەتوانێ دەستی بگات بەهەر هەواڵ و راپۆرت و بەدواداچوونێك. کەواتە دەبێ ئێستا وردتر و لێزانانەتر خەریکی کاری رۆژنامەوانی بین، شارەزایانەتر خۆمان لەو بابەتە هەڵقورتێنین، چونکەکاری رۆژنامەوانی جگە لەوەی بەهرەیە و پەیوەندی بە حەز و ئارەزووی کەسییەوە هەیە، بەڵام لەهەمانکاتدا پیشەیە و ئیتیك و رێسا و یاسا و چوارچێوە و تەکنیکی تایبەت بەخۆی هەیە، بەبێ لەبەرچاوگرتنیان پەیامەکەی ناگاتە ئەنجام.
لەرووی تیۆری و زانستییەوە پیشەیەکە تایبەت بە کۆکردنەوە و شیکردنەوەی هەواڵ و دڵنیابوون و بەدواداچوونی میسداقیەت و راستی و دروستی رووداوەکان و گەیاندنیانن بە خەڵك، بەشێوەیەکی راست و ورد و بابەتیانە و بێلایەنانە و لێبووردەیی و بەرپرسیارانە دەیانخاتە بەردەم خوێنەر و وەرگران، هاوکات پرەنسیپ و ئیتیك و ئەنجامدانی کار و چاڵاکی باشە.
لەم یادەدا دەشێ بڵێین ئەمڕۆکە باشترین خزمەتێك بتوانین بەبواری رۆژنامەگەری کوردی بکەین دوورخستنەوەیەتی لە دەستی حزبی و سیاسی و ئاراستە ئایینی و مەزهەبی و تایەفی و دەستەگەرییەکان، بۆ ئەوەی بتوانرێت پەیامە راستەقینەکەی رۆژنامەگەری بگاتە شوێنی خۆی، ئەویش خزمەتکردنی مرۆڤە لەرێگەی دەستنیشانکردنی کەموکورییەکان و گواستنەوەی سەرجەم رووداو و سەربردەکان وەکو خۆی، بۆ ئەوەی بتوانرێت بە شێوەیەکی راست و دروست کێشەکانی کۆمەڵگا چارەسەربکرێن.
راستتر دەبێ بتوانرێت کاری رۆژنامەگەریی لە کاری حزبی و سیاسی جیابکرێتەوە، چونکە تێبینییەکی زۆر هەیە لەسەر تێکەڵکردنی ئەو دوو بوارە، زۆر کەس لەپەنای کاری رۆژنامەگەرییدا یان هەر بەو ناوەوە خەریکی کاری دیکەیە و مەبەستی دیکەی شەخسی و حزبی و سیاسی و مەزهەبی هەیە، هەر ئەمەشە وایکردووە ناو و چەمکی نێگەتیڤ بۆ ئەو بابەتە داتاشرێت و بدرێتەپاڵ رۆژنامەنووس، ناوی وەك (رۆژنامەنووسی حزبی، راگەیاندنکاری مەزهەبی و نەتەوەپەرست، مێدیاکاری دیینی و مەزهەبی) هتد.. کە لەراستیدا ئەوانە هیچیان خەمی سەرەکییان کاری رۆژنامەگەریی نییە بۆ خزمەتکردنی خەڵك و کۆمەڵگا، بەڵکو لە بنچینەدا ئەوان خەریکی کاری دیکەی سیاسی و حزبایەتیکردنن، ئەمەش زۆر بە روونی لە کۆمەڵگای کوردستانی و عێراقیدا بەدیدەکرێت!
پێویستە حزب و دامەزراوە و لایەنە سیاسیی و دامودەزگا حکومییەکانیش ئەوانەی کە کەناڵی راگەیاندن و سەکۆی رۆژنامەوانیان هەیە ئیدی ئەو راستییە بزانن ئەگەر دەیانەوێ لەرێگەی کاری رۆژنامەوانییەوە مەبەستی تایبەتی خۆیان بپێکن، بەوە ناکرێت رۆژنامەنوسان ناچار بکرێن ئینتیمای حزبی و سیاسیان هەبێت، لەو سۆنگەیەوە پەیامەکەیان بگەیەنن، بەڵکو پێویستە هەموو لایەك لەوە تێبگەن ئەوە پشتگیریکردن لە سەکۆی ئازاد و راگەیاندنی بوێر و رۆژنامەوانی راستگۆیە دواجار بە قازانج تەواو دەبێت، نەك کڕین و دەستەمۆکردنی رۆژنامەنووسان.
لەکۆتاییدا و بەو بۆنەیەوە پیرۆزبایی لە سەرجەم رۆژنامەنووسانی کوردستان دەکەم، ئەوانەی کە لەو رێگەیەوە توانیویانە لەهەر کوێیەکدا کاری رۆژنامەوانیان کردبێت راستگۆیانە و ورد و بێلایەنانە مامەلەیان کردووە، بەو هیوایە ئەو بۆنەیە هاندەر بێت بۆئەوەی لە داهاتوودا کاری باشتر و جدیتر و راستگۆیانەتر ئەنجامبدرێن.
ئەم وتارە دەربڕی بۆچونی نووسەر خۆیەتی