خۆپیشاندان دەگاتە هەرێم؟

07/11/2019

دانا سەعدی

 ئەمە ئەو پرسیارەیە  لەساتەوەختی سەرهەڵدانی خۆپیشاندانەكانی بەغداد و چەند شارێكی دیكەی ناوەڕاست و باشوری عێڕاق   تا دەگەینە ئەمڕۆ ئاڕاستە دەكرێت كەلە دوو هەفتەی بەردەوامبونی خوێناویترین ڕژانەسەرشەقامی جەماوەر نزیكدەبینەوە و لەگەڵیدا مشتومڕێكی زۆری بۆ ناو تۆڕەكۆمەڵایەتیەكان گواستۆتەوە .

لێكەوتەكانی ئەم دۆخەنوێیەی عێڕاق كە فرەڕەهەندە ، وەڵامەكانی ئەم پرسیارەش تایبەت بە كردن یان نەكردنی خۆپیشاندان لەهەرێم كە زیاتر لە یەك وەڵامە وەك هەموو ڕوداوەكانی تری ڕابردوو ، سەرلەنوێ شەقامی كوردستانی بەسەر دوو بەرەی  لەیەكدی جودادا دابەشكردوە ...
 
هەن پێیان وایە بەڵێ بەگشتی لە هەرێمی كوردستان  قەیرانەكان  زۆروزەوەندن ، پاڵنەرەكانی سەرهەڵدانەوەی خۆپیشاندانیش تیایدا ئامادە و بەهێز ، بەڵام ئەوەی ئامادە نیە  بزاڤێكە ڕاستەوخۆ  ڕابەڕایەتیەكەی لەئەستۆ بگرێت ، ڕێكی بخات و بە بەرنامەیەكی فرەلایەن ئاڕاستەی بكات  .

 هۆكاری سەرەكی ئەم ئامادەنەبونەش دەگەڕێننەوە بۆ ئەوەی  هەنوكە  ئۆپۆزسیۆنێكی كارا و بوێر  لەسەر شانۆی سیاسیی شك نابرێت  لە توانایدا بێت لە پانتاییەكی گەورەدا كار لەسەر ڕای گشتی بكات ، ڕووداو دروست بكات و  دواجار  بەرفراوانانەش شەقامی  پێ بجوڵێنێت ...

هەن پێیان وایە نەخێر هەلومەرج لەبار نیە ، چون سەرباری ئەوەی هۆكارگەلێك لە ناڕەزایی و توڕەیی و نائومێدی لەئارادان و پرسی چاكسازی ڕیشەیی و بەدامەزراوەكردنی جومەگەكانی حكومڕانیی سنوری دروشمبازییان تێنەپەڕاندوە ، بەڵام ئاڵنگارییەكان  بۆخۆیان مەترسیدارن و هەرێمی كوردستان بەدەست كارەساتەكانی دوو ساڵی ڕابردوی و پەرتبونی ناو ماڵەكەیەوە دەناڵێنێت و چیدی بەرگەی  پشێوی تر و لێكترازانی لەوە زیاتر ناگرێت .بە واتایەكی دی ئەم لێكدانەوەیە دێت و گەرەكیەتی پێمان بڵێت  "  ئەولەوییەت بۆ ڕەوینەوەی نائارامیەكان ، گەڕانەوەی ئاشتی و پێكەوەیی لایەنەكان و یەكگوتاریە ، با لانی كەم تا تێپەڕاندنی ساڵێك بەسەر دەستبەكاربونی حكومەتی نوێدا   شانسێك بدرێتە ئەو لایەنانەی  بەشدارن  و دواتر بەبەراورد بەو بەڵێنانەی پێشتر دابویان ، هەنگاوە كرداریەكانیان  بپێورێن و هەڵبسەنگێنرێن " .

هەروەها ئەشێت بۆ ئەم دۆخە ناسەقامگیرەی هەرێم كە تیایدا  خۆپیشاندان سەریهەڵنەداوە وا لێكدانەوەی بۆبكرێت و پاساو بهێنرێنەوە ،  گرێدراوی  چاوەڕوانیەك بێت بە دوائەنجامی خۆپیشاندانەكانی عێڕاقەوە ، بەواتایەكی دی  هاوڵاتیانی ئێمە  دانبەخۆگرتو چاوەڕوانن   تائەو دەمەی ململانێی جەمسەرەكان و  گۆڕانكاریەخێراكانی گۆڕەپانی خۆپیشاندانەكان بەرچاویان ڕۆشنتر دەكات ،  لایان ڕونتر دەكاتەوە  داخۆ  لەبەغدادی پایتەختدا دواجار چی ڕوودەدات و چارەنوسی عادل عەبدولمەهدی و كابینەكەی  بەرەوكوێ دەبەن .

 پەردەپۆش ناكرێت  دۆخی هەرێم لە ڕوی سیاسی ، هەروەها   ئابوری  تا دەگاتە كۆمەڵایەتیی ناجێگیرن ، كابینەی نۆهەمینی حكومەتیش كە زیاتر لە سێ مانگە پێكهێنراوە ، لەناو خۆیدا هەروەها لە ڕێگەی فڕاكسیۆنەكانی بەشداربوی ناو پەرلەمان هەمئاهەنگییان پتەو نیە و  خاڵی ناكۆكی نێوانیان پترترن لەو خاڵە هاوبەشانەی پێكەوە كۆیاندەكاتەوە . هەروەها كێشە كۆنە هەڵپەسێردراو و كەڵەكەبوەكانی كابینەكانی تر كە بارگرانین لە بەردەوامیدان و هێشتا ئاسۆی كەمكردنەوە و چارەسەركردنیان ڕون نین .

ناشاردرێتەوە مەترسی گەورە لە ئارادان ، بەتایبەتی لەو گۆشەیەوە  لەناو داواكانی خۆپیشاندەرانی پایتەختدا پرسی هەمواركردنی هەندێك ماددەی دەستوریش كراونەتە هاوپێچ  . لێرەدا مەبەست لەو ماددانەیە پەیوەست دەكرێن بە سیستێمی سیاسی لەعێڕاقدا و خواستێك لە پشتیانەوەن  هەرێمی كوردستان بكاتە ئامانج  . لەئەگەری هەمواركردنیاندا ترس لە ئارادایە چارەنوسی هەرێم وەك یەكەیەكی فیدڕاڵی بگۆڕێت ، یان دەسەڵاتەدەستوریەكانی كەمتر بكاتەوە ، دواجار دژ بە بەرژەوەندی باڵای ئێمە لەو پارچەیەی كوردستان بكەوێتەوە .

ماوەتەوە بڵێم ، گۆڕانكاریەكان بەهەر ئاڕاستەیەكدا ببرێن ، پێشهاتەكان هەرچیەك بن ، دۆخی حكومڕانی كوردستان پێویستی بە خێرا چارەسەركردنی كێشەكانی هەیە ، ئەم بێدەربەستیەی دەسەڵات و خۆدزینەوە لە چاكسازی تاسەر بێدەربەستی خەڵكی لێناكەوێتەوە كە حیزبەكان بەخوێندنەوەی خۆیان تەفسیری دەكەن .هەر بۆیە خۆپیشاندان وەك  پرسێكی زیندوو ، وەك ئەگەرێكی بەردەوام ، بە كراوەی دەمێنێتەوە  ، چون ئامڕازێكی گوشار و  پەرچەكردارێكی خەڵكە  دوای  نادادیەكانی دەسەڵات دروست دەبێت ، بەتایبەت  ئیدی كە هاوڵاتیان  هیچ متمانەیەك بە مژدەدرۆیینەكانی ئەو دەسەڵاتە و هیچ ئومێدیكیان بە ئەڵتەرناتیڤی دیكە نامێنێت.

دانا سەعدی